ކުޅުދުއްފުށީ ސިޓީގައި ކުރިޔަށްގެންދިޔަ "ޙާލު ކިހިނެއް؟" ޕްރޮގްރާމް ކާމިޔާބުކަމާއެކު ނިންމާލައިފި

ނާޒުކު ހާލުގައި ދިރިއުޅޭ ފަރާތްތައް ދެނެގަތުމުގެ ގޮތުން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓުން "ހާލު ކިހިނެއް؟"ގެ ނަމުގައި ކުރިޔަށްގެންދާ ޕްރޮގްރާމުގެ ތެރެއިން، ކުޅުދުއްފުށީގައި މި މަހުގެ 18ވަނަ ދުވަހު ފެށި ޕްރޮގްރާމް ކާމިޔާބުކަމާއެކު މި މަހުގެ 25ވަނަ ދުވަހު ނިންމާލައިފިއެވެ. 

ތަފާތު ދެ ފިޔަވައްސަކަށް ބަހާލައިގެން ކުޅުދުއްފުށީ ސިޓީގައި ކުރިޔަށް ގެންދިޔަ މި ޕްރޮގްރާމުގެ ތެރެއިން، އެ ސިޓީގެ 1،300 ގޭބިސީއަކަށް ޒިޔާރަތްކޮށްފައިވާކަމަށް މިނިސްޓްރީ އިން ހާމަކޮށްފައިވެއެވެ. އަދި މި ޒިޔާރަތުގެ ތެރެއިން، ނާޒުކު ހާލަތުގައި ދިރިއުޅޭ ފަރާތްތައް ދެނެގަނެވިފައިވާ ކަމަށާއި، އެ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ފެށިފައިވާކަމަށް ވެސް މިނިސްޓްރީ އިން ހާމަކޮށްފައި ވެއެވެ. 

މި ޕްރޮގްރާމަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ތަޞައްވުރުގެ ދަށުން ރައްޔިތުންގެ ޙާލަތު ދެނެގަނެ، ގާތުން ޚިދުމަތް ފޯރުކޮށްދިނުމުގެ މަޤްސަދުގައި ކުރިޔަށްގެންދާ ޕްރޮގްރާމެކެވެ. މި ޕްރޮގްރާމުގެ ތެރެއިން ރާއްޖޭގައި މީހުން ދިރިއުޅޭ ހުރިހާ ރަށެއްގެ ގެތަކަށް ޒިޔާރަތްކޮށް ހާލު ބަލައި، ދައުލަތުގެ އެހީތެރިކަން ބޭނުންވާ ފަރާތްތަކަށް އެ އެހީތެރިކަން ފޯރުކޮށްދިނުމަށް ސަރުކާރުން ވަނީ ނިންމާފައެވެ.

މި ޕްރޮގްރާމާ ގުޅިގެން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓުން ހާމަކޮށްފައިވާ ގޮތުގައި، އެކަކު އަނެކެއްގެ ހާލު ބަލައި އެހީތެރިކަން ފޯރުކޮށްދިނުމުގެ ރީތި ސިފަތައް ދިވެހި މުޖުތަމަޢުގައި އަށަގެންނެވުމާއެކު، ސަރުކާރާއި ރައްޔިތުންނާއި ދެމެދު ގުޅުން ބަދަހިކޮށް އިތުބާރު އުފެއްދުމަކީ މި ޕްރޮގްރާމުން ހާސިލްކުރަން ބޭނުންވާ ނަތީޖާއެކެވެ. އެހެންކަމުން މިފަދަ މުހިންމު ޕްރޮގްރާމެއް ކުރިއަށްގެންދިއުމުގައި، މުޖުތަމަޢުގެ އެހީތެރިކަމާ ފުރިހަމަ އެއްބާރުލުން ދިނުމަށް އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާއިން ވަނީ އެދިފައެވެ.