ވެލެންސިއާ ކޮޅަށް ގިނަ ގޯލުތަކެއް ޖެހުމަށްފަހު ބާސެލޯނާއިން ހާލަތު ބަދަލުކޮށްފި

ސްޕެނިޝް ލަ ލީގާގައި ވެލެންސިއާ ކޮޅަށް ގިނަ ގޯލުތަކެއް ޖެހުމަށްފަހު ބާސެލޯނާއިން ހަތަރު މެޗަށްފަހު ލީގުގައި މޮޅެއް ހޯދައިފިއެވެ. އެސްޓޭޑިއޯ އޮލިމްޕިކޯ ލުއި ކޮމްޕެނީގައި ކުޅުނު މި މެޗު ބާސެލޯނާއިން ކާމިޔާބުކޮށްފައިވަނީ 7-1 އިންނެވެ.

މި މެޗުގައި ބާސެލޯނާގެ ފާރމިން ލޮޕޭޒް ވަނީ ދެ ގޯލު ކާމިޔާބު ކުރުމުގެ އިތުރުން، ދެ ގޯލަށް އެސިސްޓު ވެސް ކޮށްދީފައެވެ. 

ބާސެލޯނާއިން މެޗުގެ ލީޑު ނެގީ، ތިން ވަނަ މިނެޓުގައި ފްރެންކީ ޑީ ޔޮންގްއެވެ. އެ ޓީމުން ލީޑު ފުޅާކުރީ އޭގެ ފަސް މިނެޓު ފަހުން ފެރަން ޓޮރޭޒްގެ ގޯލަކުންނެވެ.

އަދި މެޗުގެ 14ވަނަ މިނެޓުގައި ބާސެލޯނާގެ ތިންވަނަ ގޯލު ކާމިޔާބުކުރީ، އެ ޓީމުގައި މިވަގުތު އެންމެ މޮޅަށް ކުޅެމުން އަންނަ ރަފީނިއާއެވެ. 

ބާސެލޯނާގެ ފާރމިން ލޮޕޭޒް ކާމިޔާބުކުރި އިތުރު ދެ ގޯލާއެކު، އެ ޓީމުން ފުރަތަމަ ހާފު ނިންމާލީ ފަސް ގޯލުގެ ލީޑެއްގައެވެ.

ވެލެންސިއާގެ ހަމައެކަނި ގޯލު މެޗުގެ 59ވަނަ މިނެޓުގައި ހޫގޯ ޑުރޯ ކާމިޔާބުކޯށްދިނީ ޑިއެގޯ ލޮޕޭޒް ގޯލު ކުރިމައްޗަށް ހުރަސްކޮށްލި ބޯޅައަކުންނެވެ.

އޭގެ ފަހުން ލެވަންޑޯސްކީ ކާމިޔާބުކުރި ގޯލަކާއި، ވެލެންސިއާގެ ސީޒަރ ޓަރޭގާއަތުން ބައިކޮޅަށް ވަތް ގޯލަކާއެކު، ބާސެލޯނާއިން މެޗު ނިންމާލީ ބޮޑު ތަފާތަކުންނެވެ. 

މިއީ މިދިޔަ އަހަރުގެ އޯގަސްޓު މަހަށްފަހު ބާސެލޯނާއިން މިހާބޮޑު ތަފާތަކުން މެޗެއް ކާމިޔާބުކުރި ފުރަތަމަ ފަހަރެވެ. އެ ޓީމުން ވަނީ މިދިޔަ އަހަރުގެ އޯގަސްޓު މަހު ރިއަލް ވަލެޑޮއިޑް 7-0 އިން ބަލިކޮށްފައެވެ.

މި ނަތީޖާއާއެކު، ބާސެލޯނާއިން މިވަނީ ހެންސީ ފްލިކް އެ ޓީމާ ހަވާލުވިފަހުން ކުޅުނު 32 މެޗުން 100 ގޯލު ހަމަކޮށްފައެވެ. މިއީ ހެލެނިއޯ ހެރޭރާއަށްފަހު، އެންމެ އަވަހަށް އެ ޓީމަށް 100 ގޯލު ހަމަކުރެވުނު ފަހަރެވެ. 1959ގައި ހެރޭރާ އެ ޓީމާ ހަވާލުވުމަށްފަހު 31 މެޗުން 100 ގޯލު ހަމަކޮށްފައިވެއެވެ. 

ލަ ލީގާގައި ބާސެލޯނާ މިވަގުތު އޮތީ ތިން ވަނައިގައެވެ. ލީގުގެ އެއްވަނައިގައި ރިއަލް މެޑްއިޑް އޮތްއިރު، ދެވަނައިގައި އޮތީ އެތުލެޓިކޯ މެޑްރިޑެވެ.