ޚަބަރު
ދިއްދޫ އިސްލާމީ މަރުކަޒުގެ މަސައްކަތް ނިމުމަކާ ގާތްވެއްޖެ

ދިއްދޫ އިސްލާމީ މަރުކަޒު ފޮޓޯ:އިންޓަނެޓް
ހއ. ދިއްދޫގައި އިމާރާތްކުރަމުންދާ އިސްލާމީ މަރުކަޒުގެ މަސައްކަތް ނިމުމަކާ ކައިރިވެއްޖެއެވެ. ދިއްދޫ ކައުންސިލްގެ ރައީސް ޢަބްދުﷲ ރަޝީދު މިއަދު ވިދާޅުވި ގޮތުގައި، މި މަރުކަޒުގެ ސްޓްރަކްޗަރގެ މަސައްކަތް މިހާރު ވަނީ ނިމިފައެވެ. އަދި މަރުކަޒުގެ ޤުއްބު ބެހެއްޓުމުގެ މަސައްކަތްވެސް ވަނީ ނިންމާލެވިފައެވެ.
ކައުންސިލްގެ ރައީސް އިތުރަށް ވިދާޅުވި ގޮތުގައި، މިހާރު ކުރިއަށްދަނީ މަރުކަޒު ޒީނަތްތެރިކުރުމުގެ މަސައްކަތެވެ. މި މަރުކަޒަކީ 1500 މީހުންގެ ޖާގައިގެ ބިނާއެކެވެ. ދެ ފަންގިފިލާގެ މި އިމާރާތުގައި 450 މީހުންގެ ޖާގައިގެ މަލްޓިޕަރޕަސް ހޯލަކާއި، 30 ކުދިންގެ ޖާގައިގެ 4 ކްލާސްރޫމާއި، ދެ ސެމިނަރ ރޫމް އަދި އިސްލާމިކް ލައިބްރަރީއަކާއި އޮފީސްބައެއް ހިމެނޭނެ ކަމަށް އިސްލާމީ ކަންތައްތަކާ ބެހޭ ވުޒާރާއިން މަޢުލޫމާތު ދެއްވާފައިވެއެވެ.
މި މަޝްރޫޢުގެ މަސައްކަތް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާއެވެ. މަސައްކަތް ހަވާލުކުރެވުނީ 2023 ވަނަ އަހަރުގެ މެއި މަހުގެ ތެރޭގައެވެ. އަދި 540 ދުވަހުގެ ތެރޭގައި މަސައްކަތް ނިންމުމަށް ވަނީ އެއްބަސްވެފައެވެ.
ހއ. ދިއްދޫ އިސްލާމިކް ސެންޓަރުގެ މަސައްކަތުގެ އަދާހަމަ. pic.twitter.com/7j7ljkWFXV
— Ministry of Islamic Affairs (@MVIaffairs) January 26, 2025
އިސްލާމީ ކަންތައްތަކާބެހޭ ވުޒާރާއިން ހާމަކުރި ގޮތުގައި މި މަޝްރޫޢަށް 50.8 މިލިއަން ރުފިޔާ ޚަރަދުވާނެއެވެ. މި މަރުކަޒު ނިމުމުން ދިއްދޫގެ ރައްޔިތުންނަށް ދީނީ އަދި އިޖްތިމާޢީ ޚިދުމަތްތައް ފޯރުކޮށްދިނުމަށް ބޮޑު ފަސޭހައެއް ވާނެ ކަމަށް ބެލެވެއެވެ.