Ads by Exprox

ޚަބަރު

"ދިވެހީންގެ އުފެއްދުންތެރިކަމުގެ މައުރަޒު 2025" އަށް ކުރިމަތިލުމުގެ ފުރުޞަތު ހުޅުވާލައިފި

"ދިވެހީންގެ އުފެއްދުންތެރިކަމުގެ މައުރަޒު 2025" އަށް ކުރިމަތިލުމުގެ ފުރުޞަތު ހުޅުވާލައިފި

"ދިވެހީންގެ އުފެއްދުންތެރިކަމުގެ މައުރަޒު 2025" ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

27 ޖެނުއަރީ 2025، 10:57

27 ޖެނުއަރީ 2025، 10:57

ދިވެހި ސަގާފަތާއި އުފެއްދުންތެރިކަން ފާހަގަކޮށް، ޤައުމީ ހުނަރު ދައްކާލުމަށް ބޭއްވޭ "ދިވެހީންގެ އުފެއްދުންތެރިކަމުގެ މައުރަޒު 2025" އަށް ކުރިމަތިލުމުގެ ފުރުޞަތު ހުޅުވާލައިފިއެވެ. މި މައުރަޒުގައި ބައިވެރިވުމަށް ޝައުޤުވެރިވާ ފަރާތްތަކަށް http://expo.mv މެދުވެރިކޮށް އެޕްލިކޭޝަން ހުށަހެޅުމުގެ ފުރުޞަތު މިހާރު ވަނީ ހުޅުވާލާފައެވެ. މިމައުރަޒަކީ އިޤުތިޞާދީި ތަރައްޤީއާއި ވިޔަފާރިއާ ބެހޭ ވުޒާރާއިން އިންތިޒާމްކުރާ މައުރަޒެކެވެ.

މި މައުރަޒުގައި ބައިވެރިވެވޭނީ އަމިއްލަ ފަރުދުންނާއި، އަތޮޅުތަކާއި ސިޓީތަކުގެ ފަރާތްތަކާއި، ރަޖިސްޓްރީކޮށްފައިވާ ވިޔަފާރިތަކާއި، ތަޢުލީމީ އިންސްޓިޓިއުޓްތަކާއި، ޖަމްޢިއްޔާތަކާއި އަދި ޚާއްޞަ އެހީއަށް ބޭނުންވާ ފަރާތްތަކަށެވެ. ބައިވެރިވުމަށް އެދޭ ފަރާތްތަކުން އީފާސް މެދުވެރިކޮށް ރަޖިސްޓްރީ ކުރަންވާނެއެވެ.

މި މައުރަޒުގައި ބައިވެރިވެވޭ ކެޓަގަރީތަކުގެ ތެރޭގައި އަތްތެރި މަސައްކަތް، ދަނޑުވެރިކަން، މަސްވެރިކަން، ދަތުރުފަތުރު، އިމާރާތްކުރުން، އައިޓީ، ކްރިއޭޓިވް އާޓް، ފެޝަން ޑިޒައިން، ގަހަނާ އަދި އެހެނިހެން ތަކެތި، ހަކަތަ، ކާބޯތަކެތި، މެޝިނަރީ އަދި އިކުއިޕްމަންޓް، ވުޑްވޯރކް އަދި އެހެނިހެން އަމިއްލަ އުފެއްދުންތައް ހިމެނެއެވެ.

އަތްތެރި މަސައްކަތުގެ ދާއިރާއިން 7 ގިންތިއަކުން ކުރިމަތިލެވޭނެއެވެ. އެއީ ލިޔެލާޖެހި ތަކެތި، ރާއްޖެ ރަމްޒުކޮށްދޭ ސުވެނިއަރ، ކަނޑައިނެގުން (ކަރވިންގ)، ކަސަބުން އުފައްދާ ތަކެތި، ވިޔުމުގެ މަސައްކަތް، ކުނަލާއި ކުނަލުގެ އުފެއްދުން، އަދި އަތްތެރި މަސައްކަތުގެ އެހެނިހެން ބައިތަކެވެ.

ދަނޑުވެރިކަމުގެ ދާއިރާއިން 4 ގިންތިއަކުން ކުރިމަތިލެވޭނެއެވެ. އެއީ ދަނޑުވެރިކަމުގެ އުފެއްދުން (ވެލިއު އެޑިޝަން)، ދަނޑުވެރިކަމުގެ ދާއިރާގެ އާ އުފެއްދުން، ދަނޑުވެރިކަމުގެ އާލާތް (މެޝިނަރީ/ޓޫލްސް)، އަދި ދަނޑުވެރިކަމުގެ މަސައްކަތުގެ އެހެނިހެން އުފެއްދުންތަކެވެ.

މަސްވެރިކަމުގެ ދާއިރާއިންވެސް 4 ގިންތިއަކުން ކުރިމަތިލެވޭނެއެވެ. އެއީ މަހުގެ އުފެއްދުން (ވެލިއު އެޑިޝަން)، މަސްވެރިކަމުގެ ދާއިރާގެ އާ އުފެއްދުން، މަސްވެރިކަމުގެ އާލާތް (މެޝިނަރީ/ޓޫލްސް)، އަދި މަސްވެރިކަމުގެ މަސައްކަތުގެ އެހެނިހެން އުފެއްދުންތަކެވެ.

ރަޖިސްޓްރީ ކުރެވުމުން ފޯނަށް ނޯޓިފިކޭޝަން ލިބޭނެއެވެ. އެޕްލިކޭޝަންގެ ސްޓޭޓަސް "މައި އެޕްލިކޭޝަން" މެދުވެރިކޮށް ބެލޭނެއެވެ. އިތުރު މަޢުލޫމާތު ހޯދުމަށް 3333105 އަށް ގުޅުއްވުމަށް އިޢުލާނުގައި ދަންނަވާފައިވެއެވެ.

މި މައުރަޒަކީ ދިވެހިންގެ އުފެއްދުންތެރިކަމާއި ހުނަރުވެރިކަން ފާހަގަކޮށް، ޤައުމީ ފެންވަރުގައި އެކަން ދައްކާލުމުގެ މުހިންމު ފުރުޞަތެއް ކަމުގައި ބެލެވެއެވެ. މިފަދަ މައުރަޒެއް ބޭއްވުމުގެ މަޤްޞަދަކީ ދިވެހިންގެ އުފެއްދުންތެރިކަމާއި ހުނަރުވެރިކަން އިތުރަށް ކުރިއެރުވުމާއި، އެކި ދާއިރާތަކުން ކުރިއަށް ދިއުމަށް ހިތްވަރު ދިނުމެވެ.

މި މައުރަޒުގައި ބައިވެރިވުމަކީ ވަކި ވަކި ފަރުދުންނަށާއި، އަތޮޅުތަކާއި ސިޓީތަކަށް އަދި އެކިއެކި މުއައްސަސާތަކަށް ލިބޭ ރަނގަޅު ފުރުޞަތެއް ކަމުގައި ފާހަގަކުރެވެއެވެ. ޚާއްޞަކޮށް ޒުވާނުންނަށް އެމީހުންގެ ހުނަރާއި ޤާބިލުކަން ދައްކާލުމުގެ މުހިންމު ފުރުޞަތެއް މި މައުރަޒުން ލިބިގެންދާނެއެވެ.މި މައުރަޒުގައި ބައިވެރިވާ ފަރާތްތަކަށް އެމީހުންގެ އުފެއްދުންތައް ޤައުމީ ފެންވަރުގައި ދައްކާލުމުގެ އިތުރުން، އެހެން ފަރާތްތަކާ ގުޅުން ބަދަހިކޮށް، އައު ވިޔަފާރީގެ ފުރުޞަތުތައް ހޯދުމަށްވެސް މަގުފަހިވެގެންދާނެއެވެ.

މި މައުރަޒުގައި ބައިވެރިވުމަށް ޝައުޤުވެރިވާ ފަރާތްތަކުން ވީ އެންމެ އަވަހަކަށް http://expo.mv މެދުވެރިކޮށް ރަޖިސްޓްރީ ކުރުމަށް އިލްތިމާސް ކޮށްފައިވެއެވެ. 

"ދިވެހީންގެ އުފެއްދުންތެރިކަމުގެ މައުރަޒު 2025" އަކީ ދިވެހި ސަގާފަތާއި، އާދަކާދައާއި، ހުނަރުވެރިކަން ދައްކުވައިދޭ މުހިންމު ހަރަކާތެއް ކަމުގައި ބެލެވެއެވެ. މި މައުރަޒު މެދުވެރިކޮށް ދިވެހިންގެ އުފެއްދުންތެރިކަމާއި ޤާބިލުކަން އިތުރަށް ފުޅާވެ، ޤައުމީ ތަރައްޤީއަށް އިތުރު ބާރެއް ލިބިގެންދާނެ ކަމަށް އުންމީދު ކުރެވެއެވެ.
                    


                    

މި ލިޔުން ކިޔާލުމުން

Ads by MSS