ރާއްޖޭގެ މަސްވެރިކަން ދުނިޔޭގެ ބާޒާރުގައި އިޝްތިހާރުކުރުމަށް އަލަށް އުފެއްދި ކުންފުނިން މަސައްކަތް ފަށައިފި

ރާއްޖޭގެ މަސްވެރިކަން ދުނިޔޭގެ ބާޒާރުގައި އިޝްތިހާރުކުރުމުގެ މަސައްކަތަކީ "މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ކޯޕަރޭޝަން" ކުންފުނިން މިއަހަރު އެންމެ އިސްކަމެއް ދީގެން ކުރިއަށްގެންދާނެ މަސައްކަތްކަމަށް އެ ކުންފުނީގެ މެނޭޖިންގ ޑިރެކްޓަރ އަޙްމަދު ޒަރީރް ވިދާޅުވެއްޖެއެވެ.

ރާއްޖޭގެ މަސްވެރިކަން ޕްރޮމޯޓްކުރަން ޚާއްސަކޮށްގެން ސަރުކާރުން މި ކުންފުނި އުފެއްދެވީ 4 ފެބްރުއަރީ 2024 ގައެވެ. މި ކުންފުނީގެ މައިގަނޑު މަޤްޞަދަކީ މަސްވެރިކަމުގެ އައު ބާވަތްތައް ތަޢާރަފްކުރުމާއި، މަސްވެރި އުފެއްދުންތައް އިތުރުކޮށް އެ އުފެއްދުންތައް ވިއްކޭނެ ބޭރުގެ ބާޒާރުތައް ގިނަކުރުމާއި މަހުގެ ބާވަތްތައް ޕްރޮމޯޓްކުރުމެވެ.

އަޙްމަދު ޒަރީރް ވިދާޅުވީ މިހާތަނަށް ކުރެވުނު މަސައްކަތްތަކުގެ ތެރޭގައި ކޯޕަރޭޓް ގަވަނަންސް އުސޫލާ އެއްގޮތަށް ކުންފުނި ހިންގުމަށް ބޭނުންވާ ޕޮލިސީތައް އެކުލަވާލައި އެޕްރޫވްކުރުން ހިމެނޭ ކަމަށެވެ. އަދި ކުރިއަށް އޮތް 5 އަހަރަށް ކުންފުނީގެ ބިޒްނަސް ޕްލޭނެއް އެކުލަވާލާފައިވާ ކަމަށްވެސް އޭނާ ވިދާޅުވިއެވެ.

މިހާރު ކުރިއަށްދާ މުހިންމު މަސައްކަތެއްގެ ގޮތުގައި ޒަރީރް ފާހަގަކުރެއްވީ ރައީސުލްޖުމްހޫރިއްޔާގެ ރިޔާސީ ވަޢުދާ އެއްގޮތަށް ރާއްޖޭގެ މަސްވެރިކަން އިޝްތިހާރުކުރާނެ ބްރޭންޑެއް ތަރައްޤީކުރުމުގެ މަސައްކަތެވެ. މި ބްރޭންޑް މިއަހަރުގެ ފުރަތަމަ ކުއާޓަރގައި ލޯންޗްކުރެވޭނެ ކަމަށާއި، މިއަހަރުގެ ތެރޭގައި ދުނިޔޭގެ އެކި ކަންކޮޅުތަކުގައި ރާއްޖޭގެ މަސްވެރިކަން އިޝްތިހާރުކުރެވިގެންދާނެ ކަމަށް އޭނާ ވިދާޅުވިއެވެ.

މީގެއިތުރުން، ރާއްޖޭގައި މަސްވެރިކަމުގެ އުފެއްދުންތައް އުފައްދާ ކުދި އަދި މެދު ފަންތީގެ ވިޔަފާރިތަކަށް ދިމާވާ ދަތިތަކާއި ގޮންޖެހުންތައް ދެނެގަނެ، އެ ފަރާތްތަކަށް އެހީތެރިވުމަށް އިސްކަންދޭނެ ކަމަށްވެސް ޒަރީރް ވިދާޅުވިއެވެ. މި މަސައްކަތުގެ ތެރެއިން، ކުރިއަށް އޮތް ހަފްތާއެއްހާ ދުވަހުގެ ތެރޭގައި ކައުންސިލްތައް މެދުވެރިކޮށް ރަށްރަށުގައި މަސްވެރިކަމުގެ އުފެއްދުންތައް އުފައްދާ ފަރާތްތައް ދެނެގަތުމުގެ މަސައްކަތް ފެށޭނެ ކަމަށް އޭނާ ހާމަކުރެއްވިއެވެ.