ދެ ލޯންޗެއް އެކްސިޑެންޓުވުމުގެ ހާދިސާގައި މީހަކު މަރުވުމާ ގުޅިގެން ކައްޕިންނަށް ދަޢުވާކުރަން ފޮނުވައިފި

ފޭދޫ ފިނޮޅު ކައިރީގައި ދެ ލޯންޗެއް ޖެހި ހިނގި އެކްސިޑެންޓަކާ ގުޅިގެން، އެ ދެ ލޯންޗުގެ ކައްޕިންނަށް ދަޢުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވައިފިއެވެ.

މި ހާދިސާ ހިނގާފައިވަނީ 2023  އޭޕްރީލް 29 ވަނަ ދުވަހުގެ 16:42 ހާއިރުއެވެ. އަދި މި ހާދިސާގައި އެކްސިޑެންޓުވެފައި ވަނީ “ސަސް އީ ސްޕީޑް” ނަމަކަށް ކިޔާ ލޯންޗަކާއި “އެމްޑަބްލިޔުއެސްސީ މެރިން 2” ނަމަކަށް ކިޔާ ލޯންޗެވެ. 

މި ހާދިސާއާ ގުޅިގެން އެތަނުން އެއް ލޯންޗުން ދަތުރުކުރި މީހަކު ނިޔާވީ، އޭނާއަށް ލިބުނު އަނިޔާތަކަށް އޭޑީކޭ ހޮސްޕިޓަލުގައި ފަރުވާކުރަމުން ދަނިކޮށެވެ. ނިޔާވެފައިވަނީ އުމުރުން 52 އަހަރުގެ ފިރިހެނެކެވެ. އަދި އޭނާ ނިޔާވެފައި ވަނީ އެ ދުވަހުގެ 18:15 ހާއިރެވެ.

މި މައްސަލައާ ގުޅިގެން ދައުވާ ކުރަން ފޮނުވާފައިވަނީ ކ. ކާށިދޫ / ހީނާވިލާ، ޔާނިސް ޙަމީދު (35އ) އާއި ހދ. ނޮޅިވަރަމް / ގްރީންހައުސް، މުޙައްމަދު ޖަމީލް (43އ)ގެ މައްޗަށެވެ.

މި މައްސަލައިގެ ތަޙުޤީޤު ނިންމުމަށްފަހު ދަޢުވާ ކުރުމަށް 2023  ޖޫން 4 ގައި ވެސް ޕީޖީ އޮފީހަށް ފޮނުވާފައިވެއެވެ. ނަމަވެސް މައްސަލަ އިސްލާހުކުރަންޖެހޭކަމަށް ބުނެ އަނބުރާ ފޮނުުވުމާލުމުން، ދެވަނަ ފަހަރަށް މައްސަލަ ޕީޖީ އޮފީހަށް ފޮނުވާފައިމިވަނީ 2025 ޖަނަވަރީ 15 ވަނަ ދުވަހުއެވެ.