ޕްރިޒަންސް އޮފިސަރުން ހޯދުމަށް އިޢުލާންކޮށްފި

މޯލްޑިވްސް ކަރެކްޝަނަލް ސާރވިސަސްގެ ޕްރިޒަންސް އޮފިސަރުންގެ ވަޒީފާއަށް ކުރިމަތިލުމުގެ ފުރުސަތު ހުޅުވާލައިފިއެވެ. 

"ޕްރިޒަން ޕްރައިވެޓް" އެއްގެ ގޮތުގައި އޮޕަރޭޝަނަލް މަސައްކަތްތަކުގައި ހަރަކާތްތެރިވާން ޖެހޭ މި މަޤާމަށް، ހުރިހާ އެލަވަންސްތަކެއް ހިމެނޭހެން 15،000ރ. އަށް ވުރެން މަތީ މުސާރައެއް ކަނޑައަޅާފައިވެއެވެ. މީގެ ތެރެއިން، ސާރވިސް އެލަވަންސާއި ލިވިންގް އެލަވަންސް ލިބެން ފަށާނީ ހުވާކުރުމުންނެވެ.

މި މަޤާމަށް ހޮވޭ ފަރާތްތަކުން މަސައްކަތްކުރަން ޖެހޭނީ، މާފުށި ޖަލާއި އައްސޭރި ޖަލު އަދި ހުޅުމާލެ ޖަލުގެ ތެރެއިން އެ އިރެއްގައި ކަނޑައަޅާ ޖަލެއްގައެވެ.

މި މަޤާމަށް ކުރިމަތިލެވޭނީ 18 އަހަރާއި 35 އަހަރާއި ދެމެދުގެ ދިވެހިންނަށެވެ. އަދި ސާނަވީ އިމްތިހާނަކުން މަދުވެގެން 2 މާއްދާއިން ދައްވެގެން 'ޑީ' ފާސް ލިބިފައިވުމާއެކު، ސެކަންޑްރީ އިމްތިޙާނުން ދިވެހި އަދި އިސްލާމް މި ދެ މާއްދާއިން ދައްވެގެން 'ސީ' ފާސް ލިބިފައިވުން ނުވަތަ ޕްރިޒަން އޮފިސަރުންގެ ވަޒީފާއަށް ބޭނުންވާ ނުވަތަ ގުޅުންހުރި ދާއިރާއަކުން ދިވެހިރާއްޖޭގެ ޤައުމީ ސަނަދުގެ އޮނިގަނޑުގެ ލެވެލް 3 ގެ ސަނަދެއް ނުވަތަ އެއަށްވުރެ މަތީ ސަނަދެއް ޙާޞިލު ކޮށްފައިވުމަކީ މި މަޤާމަށް ކުރިމަތިލުމުގެ ޝަރުތެކެވެ.

Looking for a Job?
Become a Prison Officer!
Check out 👇https://t.co/yCoJkkU6yK pic.twitter.com/GHf0O5Q8Wp

— Maldives Correctional Service (@CorrectionsMv) January 27, 2025

މީގެ އިތުރުން، ޖިނާއީ އެއްވެސް ބާވަތެއްގެ ކުށެއް ޝަރީއަތަށް ސާބިތުވެފައިވާ މީހުންނާއި، މަނާ ކުރެވިފައިވާ މަސްތުވާ އެއްޗަކުން އެކަހެރިވުމަށް ފަރުވާ ހޯދާފައިވާ ފަރާތަކަށް މި ފުރުސަތު ނުލިބޭނެކަމަށް ކަރެކްޝަނަލް ސާރވިސަސްއިން ހާމަކޮށްފައިވެއެވެ. 

މި މަޤާމަށް ކުރިމަތިލުމުގެ ސުންގަނޑިއަކީ 2025 ފެބްރުއަރީ 16 ވާ އާދިއްތަ ދުވަހު 15:00އެވެ.