ޚަބަރު
ވިއްސާރައާ ގުޅިގެން ލ. ގަމުގައި ފެންބޮޑުވެ، އެމްއެންޑީއެފުން ފެންހިންދުމުގެ މަސައްކަތް ފަށައިފި

ފެންހިންދުމުގެ މަސައްކަތް ކުރަނީ، ފޮޓޯ: އެމްއެންޑީއެފް
ހުލާސާ
މިހާތަނަށް 15 ގެއެއްގައި ފެން ބޮޑުވެފައިވޭ.
ގޭގެއަށް ފެން ނުވަންނަ ގޮތަށް ވެލިބަސްތާ ޖެއްސުމުގެ މަސައްކަތް ވެސް މިހާރު ވަނީ ފަށާފައި.
ވިއްސާރައާ ގުޅިގެން ލ. ގަމުގައި ފެންބޮޑުވެ، އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ފެންހިންދުމުގެ މަސައްކަތް ފަށައިފިއެވެ.
އެ ރަށުގައި ފެންބޮޑުވީ، މިއަދު ފަތިހު ވެހެންފެށި ވާރޭ ހެނދުނު 8:30 ހާއިރު ހުއްޓާލުމަށްފަހު އަނެއްކާ ވެސް 10:30 އިން ފެށިގެން ބޯކޮށް ވާރޭވެހެމުން ދިއުމާ ގުޅިގެންކަމަށް، "ފަރުދުން" އަށް މަޢުލޫމާތު ދެމުން އެ ރަށުގެ ކައުންސިލުގެ ފަރާތުން ވާހަކަ ދެއްކެވި ބޭފުޅަކު ޙިއްސާކޮށްފައި ވެއެވެ.
ފެންބޮޑުވުމާ ގުޅިގެން މިހާތަނަށް 15 ގެއެއްގައި ފެން ބޮޑުވެފައިވާކަމަށާއި، އަދި ގިނަ ގޭގޭގައި ފެން ބޮޑުވީ، ފާޚާނާތަކުގެ ފެންހިންދާ ހޮޅިން ފެން އަރައިގެންކަމަށް ވެސް ކައުންސިލުން ހާމަކޮށްފައިވެއެވެ.
ބޮޑުވެފައިވާ ފެންގަނޑު ހިންދުމަށް ޕަންޕު ޖައްސައިގެން އެމްއެންޑީއެފުން މަސައްކަތް ކުރަމުންދާއިރު، ރަށުގެ ހުޅަނގު ފަރާތުން ދެ ކޯރު މޫދަށް ކަނޑައިގެން ފެން ހިންދުމުގެ މަސައްކަތް އަވަސްކުރެވޭތޯ ބަލަމުން އަންނަކަމަށް ވެސް ކައުންސިލުން ހާމަކުރިއެވެ.
މީގެ އިތުރުން، ކައުންސިލާއި، ފުލުހުންނާއި، އެމްއެންޑީއެފް ގުޅިގެން ގޭގެއަށް ފެން ނުވަންނަ ގޮތަށް ވެލިބަސްތާ ޖެއްސުމުގެ މަސައްކަތް ވެސް މިހާރު ވަނީ ފަށާފައެވެ.
މުޅި ރާއްޖެއަށް ކުރަމުންދާ މި ވިއްސާރައިގައި ކުރިއަށް އޮތް 24 ގަޑިއިރު ރާއްޖޭގެ ބޮޑު ސަރަހައްދަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާ (މެޓް) އިން މިއަދު ހެނދުނު ބުނެފައިވެއެވެ.