ދުނިޔެ

ސީ.އައި.އޭ އިން ބުނަނީ ކޮވިޑް-19 ވުޖޫދަށް އައީ ޗައިނާގެ ލެބަކުން ލީކުވެގެން ކަމަށް

ސީ.އައި.އޭ އިން ބުނަނީ ކޮވިޑް-19 ވުޖޫދަށް އައީ ޗައިނާގެ ލެބަކުން ލީކުވެގެން ކަމަށް

ކޮވިޑް-19 ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

27 ޖެނުއަރީ 2025، 04:25

27 ޖެނުއަރީ 2025، 04:25

ޔުނައިޓެޑް ސްޓޭޓްސްގެ ސެންޓްރަލް އިންޓެލިޖެންސް އޭޖެންސީ (ސީ.އައި.އޭ) އިން ކޮވިޑް-19 ގެ އުފެދުމާ ގުޅޭ ގޮތުން އާ އެސެސްމަންޓެއް ހާމަކޮށްފިއެވެ. މި އެސެސްމަންޓްގައި ބުނެފައިވަނީ ކޮވިޑް-19 ވައިރަސް އުފެދުނީ ޖަނަވާރުންގެ ކިބައިން ނޫން ކަމަށާއި، ޗައިނާގެ ލެބޯޓަރީއަކުން ލީކުވެގެން ކަމަށް ވުމުގެ ފުރުސަތު ބޮޑު ކަމަށެވެ.

ނަމަވެސް، މި ނިންމުމުގައި އެޖެންސީގެ "އިތުބާރު ކުޑަ" ކަމަށް ވެސް ބުނެފައިވެއެވެ. ސީ.އައި.އޭގެ ތަރުޖަމާނެއް ވިދާޅުވި ގޮތުގައި "ޤުދުރަތީ ގޮތަކުން" ފެށުނު ކަމަށް ބެލުމަށް ވުރެ "ރިސާރޗާ ގުޅުންހުރި" ގޮތަކަށް ބަލިމަޑުކަން ފެށުނު ކަމަށް ބެލުމުގެ ފުރުސަތު ބޮޑުކަމަށެވެ.

މި އެސެސްމަންޓް ހާމަކުރުމަކީ ސީ.އައި.އޭގެ އާ ޑިރެކްޓަރ ޖޯން ރެޓްކްލިފްގެ ފުރަތަމަ ނިންމުންތަކުގެ ތެރެއިން އެއް ނިންމުމެވެ. ރެޓްކްލިފްއަކީ ކުރީގެ ރައީސް ޑޮނަލްޑް ޓްރަމްޕްގެ ފުރަތަމަ ދައުރުގައި ނެޝަނަލް އިންޓެލިޖެންސް ޑިރެކްޓަރުގެ މަޤާމު ފުރުއްވި ބޭފުޅެކެވެ. އޭނާ އަބަދުވެސް ތާއީދުކުރައްވަނީ ލެބް ލީކް ތިއަރީއަށެވެ.

ވޫހާން އިންސްޓިޓިއުޓް އޮފް ވައިރޮލޮޖީއަކީ ފުރަތަމަ ކޮވިޑް-19 ގެ ކްލަސްޓަރެއް ފެނުނު ހުއަނަން ވެޓް މާކެޓުން 40 މިނެޓުގެ ދުރުމިނުގައި އޮންނަ ތަނެކެވެ.

ކޮވިޑް-19 ގެ އަސްލާ ބެހޭ ގޮތުން އެއްބަސްވުމެއް އަދި ނެތެވެ. ބައެއް ފަރާތްތަކުން ތާއީދުކުރަނީ "ޤުދުރަތީ ގޮތުން އުފެދުން"  ތިއަރީއަށެވެ. އަނެއްބައި ފަރާތްތަކުން ތާއީދުކުރަނީ ލެބް ލީކް ތިއަރީއަށެވެ. ޗައިނާއިން ވަނީ ލެބް ލީކް ތިއަރީއަކީ ވޮޝިންގްޓަނުން ކުރާ "ސިޔާސީ މެނިޕިއުލޭޝަން" އެއް ކަމަށް ބުނެފައެވެ.
                    

މި ލިޔުން ކިޔާލުމުން

Ads by MSS