މި ރަމަޟާން މަހު މޮރޮކޯގައި ދީނީ ތަޤުރީރެއް ދެއްވުމަށް އެ ޤައުމުގެ ސަރުކާރުން އިސްލާމިކް މިނިސްޓަރަށް ދަޢުވަތު ދެއްވައިފި

މި ރަމަޟާން މަހު މޮރޮކޯގައި ދީނީ ތަޤުރީރެއް ދެއްވުމަށް އެ ޤައުމުގެ ސަރުކާރުން އިސްލާމިކް މިނިސްޓަރ، ޑރ. މުޙައްމަދު ޝަޙީމް ޢަލީ ސައީދަށް ދަޢުވަތު ދެއްވައިފިއެވެ. މި ދަޢުވަތު އެ މަނިކުފާނާ ހަވާލުކުރެއްވީ މޮރޮކޯގެ ރެސިޑެންޓް އެމްބެސްޑަރ މުޙައްމަދު މަލިކީއެވެ.

އިސްލާމީ ކަންތައްތަކާ ބެހޭ ވުޒާރާއިން ހާމަކޮށްފައިވާ ގޮތުގައި، މިނިސްޓަރ ޝަޙީމަށް ތަޤުރީރު ކުރެއްވުމުގެ ދަޢުވަތު ލިބުނީ 'ހަސަނީ ފިލާވަޅު' ގައެވެ. މިއީ މޮރޮކޯގައި ރަމަޟާން މަސް އިޙުޔާކޮށް ދިރުވުމުގެ ގޮތުން އެ ޤައުމުގެ ރަސްގެފާނު، މުޙައްމަދު ހަވަނަގެ ބެއްލެވުމުގެ ދަށުން ބާއްވާ މޮރޮކޯގެ އެންމެ ފާހަގަކޮށްލެވޭ އަދި އެންމެ މަތީ އިސްލާމީ ހަރަކާތެވެ.

މި ސެޝަންގައި ދުނިޔޭގެ އެކިކަންކޮޅުތަކުން ޢިލްމުވެރިން ބައިވެރިވެ ދީނީ އަދި ފިކުރީ މައުޟޫއުތަކާ ބެހޭގޮތުން މަޝްވަރާކުރައްވާ، ސެޝަންތައް ދެއްވައެވެ.

މި ދަޢުވަތު ދެއްވުމުގެ އިތުރުން، މިނިސްޓަރ ޝަހީމްގެ އަރިހަށް އެމްބެސްޑަރ ކުރެއްވި ޒިޔާރަތުގައި، ދިވެހިރާއްޖެއާއި މޮރޮކޯއާއި ގުޅިގެން ދީނީ ރޮނގުން ކުރިއަށް ގެންދެވިދާނެ ކަންކަމާއި ގުޅޭގޮތުން މަޝްވަރާ ކުރައްވާފައިވެއެވެ.

އަދި މޮރޮކޯގައި އިމާމުން ތަމްރީނު ކުރުމަށް ހުރި ފުރުސަތުތަކާ ގުޅިގެން ވެސް ދެ ބޭފުޅުން މަޝްވަރާކުރައްވާފައިވެއެވެ.