ޚަބަރު
ކުޑަކުއްޖަކު ދުއްވަނިކޮށް ފެންސަށްއެރި ޕިކަޕް ޓޯވކޮށްފި

އެކްސިޑެންޑު ހިނގިއިރު ޕިކަޕް ދުއްވަން އިނީ ކުޑަކުއްޖެއް---
ހުލާސާ
ޕިކަޕު ފެންސަށް އެރީ ކޮންޓްރޯލް ނުވެގެން ގޮސް.
ފުލުހުން ދަނީ މި މައްސަލަ ތަޙުޤީޤު ކުރަމުން.
އުމުރުން 18 އަހަރު ނުފުރޭ ކުޑަކުއްޖަކު ދުއްވަނިކޮށް ކުޅުދުއްފުށީ އެއާރޕޯޓުގެ ފެންސަށްއެރި ޕިކަޕް ޓޯވކޮށްފައިވާކަމަށް ފުލުހުން ހާމަކޮށްފިއެވެ.
މި ހާދިސާއާ ގުޅޭ ވީޑިއޯއެއް ސޯޝަލް މީޑިއާގައި ދައުރުވެފައިވާއިރު، އެ ވީޑިއޯއިން ފެންނަ ގޮތުގައި އެ ޕިކަޕު ފެންސަށް އެރީ ކޮންޓްރޯލް ނުވެގެން ގޮހެވެ. ފެންސަށް އެރުމާއެކު ޕިކަޕުން ދެމީހަކު ނިކުމެގެން ގޮސް، މި އެކްސިޑެންޓުގެ ސަބަބުން ލިބުނު ގެއްލުންތައް ބަލާތަން ފެނުނެވެ. ދެން އެއަށްފަހު އެ ދެ މީހުން އަނބުރާ ޕިކަޕަށް އަރައިގެން ދިޔައީއެވެ.
މި މައްސަލައާ ގުޅިގެން ފުލުހުން ހާމަކޮށްފައިވާ ގޮތުގައި، ފުލުހުން ބެލިބެލުމުން ޕިކަޕް ފެންސަށް އެރިއިރު ދުއްވަން އިނީ 18 އަހަރު ނުފުރޭ ކުޑަ ކުއްޖެކެވެ. އަދި މި ހާދިސާއާ ގުޅިގެން އެ ޕިކަޕް ޓޯވްކުރުމަށްފަހު، މައްސަލަ މިހާރު ބަލަމުން އަންނަކަމަށް ވެސް ފުލުހުން ހާމަކޮށްފައިވެއެވެ.
ލައިސަންސް ނެތި އުޅަނދު ދުއްވުމާއި އެކަމަށް މަގުފަހު ކުރުމަކީ ޤާނޫނީ ކުށެކެވެ. އަދި މިފަދަ ހާލަތްތަކުގައި އުޅަނދުގެ ވެރިފަރާތް ޖޫރިމަނާ ކުރުމުގެ އިތުރުން، އެ އުޅަނދެއް ޓޯވކޮށް، މައްސަލަބަލާ އިތުރު ފިޔަވަޅު އެޅުން ވެސް ހިމެނެއެވެ.