ދުނިޔެ
މިސުރުން ފަލަސްތީނުގެ ރައްޔިތުން އެހެން ޤައުމުތަކަށް ބަދަލުކުރުމަށް ހުށަހެޅޭ ހުށަހެޅުންތައް ހަރުކަށި އިބާރާތުން އިންކާރުކޮށްފި

މިސުރުގެ ޕާލިމެންޓް މަޖިލީހުގެ ރައީސް ހަންފީ އަލް-ޖަބާލީ ފޮޓޯ:އިންޓަނެޓް
މިސުރުގެ ޕާލިމެންޓް މަޖިލީހުގެ ރައީސް ހަންފީ އަލް-ޖަބާލީ ވަނީ ފަލަސްތީނުގެ ރައްޔިތުން ޣައްޒާ އާއި ވެސްޓް ބޭންކުން އެހެން ޤައުމުތަކަށް ބަދަލުކުރުމަށް ހުށަހެޅޭ ހުށަހެޅުންތަކަށް ހަރުކަށި އިބާރާތުން އިންކާރުކުރައްވާފައެވެ.
މިސުރުގެ ޕާލިމެންޓްގެ ޖަލްސާއެއްގައި ވާހަކަފުޅު ދައްކަވަމުން އަލް-ޖަބާލީ ވިދާޅުވީ މިފަދަ ހުށަހެޅުންތަކަކީ ހަމައެކަނި ފަލަސްތީނުގެ ރައްޔިތުންނަށް ނުރައްކަލެއް ނޫން ކަމަށާއި، މުޅި ސަރަޙައްދުގެ ސަލާމަތާއި ރައްކާތެރިކަމަށް ވެސް ނުރައްކަލެއް ކަމަށެވެ.
މިސުރުގެ ޕާލިމެންޓުން ފަލަސްތީނުގެ މައްސަލައިގެ ޖިއޮގްރަފިކަލް އަދި ސިޔާސީ ޙަޤީޤަތް ބަދަލުކުރުމަށް ކުރެވޭ އެއްވެސް މަސައްކަތަކަށް މުޅިން އިންކާރުކުރަން
މިސުރުގެ ޕާލިމެންޓް މަޖިލީހުގެ ރައީސް ހަންފީ އަލް-ޖަބާލީ
މި ބަޔާން އައިސްފައިވަނީ އެމެރިކާގެ ރައީސް ޑޮނަލްޑް ޓްރަމްޕް މިސުރާއި ޖޯޑަނަށް ފަލަސްތީނުގެ ރައްޔިތުން އެ ޤައުމުތަކަށް ބަދަލުކުރުމަށް ގޮވާލައްވާފައިވަނިކޮށެވެ. އަލް-ޖަބާލީ ވަކިން ޓްރަމްޕްގެ ނަން ގެންނެވި ނަމަވެސް، މިފަދަ ހުށަހެޅުންތަކަކީ ފަލަސްތީނުގެ ރައްޔިތުންނަށާއި މުޅި ސަރަޙައްދަށް ނުރައްކަލެއް ކަމަށް ވިދާޅުވިއެވެ.
ޣައްޒާ "ސާފުކުރުމާ" ގުޅޭގޮތުން ޓްރަމްޕްގެ ބަސްފުޅުތައް ފެންނަމުންދަނީ އިޒްރޭލުގެ އިންތިހާ ކަނާތްފަރާތުގެ ސިޔާސީ ވެރިންގެ ވިސްނުމާ އެއްގޮތަށެވެ. މި ފަރާތްތަކުން ވަނީ ގިނަ އަދަދެއްގެ ފަލަސްތީނުގެ ރައްޔިތުން ޣައްޒާއިން ނެރެ، އެ ސަރަޙައްދުގައި ޔަހޫދީ އާބާދީތައް އަލުން ޤާއިމުކުރުމަށް ގޮވާލާފައެވެ.
މީގެ އިތުރުން، އިޒްރޭލުގެ ސިޔާސީ ވެރިން ވަނީ ވެސްޓް ބޭންކު އަތުލައިގަތުމަށް ވެސް ގޮވާލާފައެވެ. އިޒްރޭލުން ވަނީ 2023 ވަނަ އަހަރުގެ އޮކްޓޯބަރު މަހުން ފެށިގެން ވެސްޓް ބޭންކުގައި އަސްކަރީ ޙަރަކާތްތައް އިތުރުކޮށް، 800 އަށްވުރެ ގިނަ ފަލަސްތީނުގެ ރައްޔިތުން މަރާލާފައެވެ.