"ހާލު ކިހިނެއް؟" ޕްރޮގްރާމުގެ ތެރެއިން ގާފަރުގެ ހުރިހާ ގެއަކަށް ޒިޔާރަތްކޮށްފި

ނާޒުކު ހާލުގައި ދިރިއުޅޭ ފަރާތްތައް ދެނެގަތުމުގެ ގޮތުން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓުން "ހާލު ކިހިނެއް؟"ގެ ނަމުގައި ކުރިޔަށްގެންދާ ޙާއްސަ ޕްރޮގްރާމުގެ ތެރެއިން، މާލެ އަތޮޅު ގާފަރުގެ ހުރިހާ ގެއަކަށް ޒިޔާރަތްކޮށްފިއެވެ. 

އެގޮތުން މިނިސްޓްރީން ހާމަކޮށްފައިވަނީ، އެ ރަށުގެ 162 ގެއަކަށް ޒިޔާރަތްކޮށް، އެ ރަށުގެ ރައްޔިތުންގެ ހާލަތު ދެނެގަނެވިފައިވާ ކަމަށެވެ.

ގާފަރަކީ މާލެ އަތޮޅުން މި ޕްރޮގްރާމް ކުރިޔަށް ގެންދިޔަ ފުރަތަމަ ރަށެވެ. މާލެ އަތޮޅުގައި މި ޕްރޮގްރާމް ކުރިޔަށް ގެންދިއުމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓުން ނިންމާފައިވަނީ ދެ ފިޔަވައްސަކަށް ބަހާލައިގެންނެވެ.

މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓުން ހާމަކޯށްފައިވާ ގޮތުގައި މިހާތަނަށް "ހާލު ކިހިނެއް؟" ޕްރޮގްރާމުގެ ދަށުން ރާއްޖޭގެ 11،000 އަށްވުރެ ގިނަ ގޭބީސީއަށް ޒިޔާރަތްކޮށްފައި ވެއެވެ. އަދި އެ މިނިސްޓްރީން މަސައްކަތްކުރަނީ މި އަހަރު މުޅި ރާއްޖެއަށް މި ޕްރޮގްރާމް ފުޅާކުރުމަށްކަމަށް ވެސް ހާމަކޮށްފައިވެއެވެ.

މި ޕްރޮގްރާމަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ތަޞައްވުރުގެ ދަށުން ރައްޔިތުންގެ ޙާލަތު ދެނެގަނެ، ގާތުން ޚިދުމަތް ފޯރުކޮށްދިނުމުގެ މަޤްސަދުގައި ކުރިޔަށްގެންދާ ޕްރޮގްރާމެކެވެ. މި ޕްރޮގްރާމުގެ ތެރެއިން ރާއްޖޭގައި މީހުން ދިރިއުޅޭ ހުރިހާ ރަށެއްގެ ގެތަކަށް ޒިޔާރަތްކޮށް ހާލު ބަލައި، ދައުލަތުގެ އެހީތެރިކަން ބޭނުންވާ ފަރާތްތަކަށް އެ އެހީތެރިކަން ފޯރުކޮށްދިނުމަށް ސަރުކާރުން ވަނީ ނިންމާފައެވެ.