ވިޔަފާރި / ޚަބަރު
ބޭރުފައިސާ މާރުކުރަން ބީއެމްއެލްއިން ޚާއްޞަ ޕޯޓަލްއެއް ޤާއިމުކޮށްފި

ބޭންކް އޮފް މޯލްޑިވްސް ފޮޓޯ: މޯލްޑިވްސް ފައިނޭންޝަލް ރިވިއު
ބޭންކް އޮފް މޯލްޑިވްސް (ބީއެމްއެލް) އިން ފަތުރުވެރިކަމުގެ ދާއިރާގެ ވިޔަފާރިތަކަށް އަމާޒުކޮށްގެން އޮންލައިން ބޭރުފައިސާ މާރުކުރުމުގެ އައު ޚިދުމަތެއް ތަޢާރަފުކޮށްފިއެވެ. މި ޚިދުމަތް ތަޢާރަފުކޮށްފައިވަނީ އިންޓަރނެޓް ބޭންކިންގ މެދުވެރިކޮށެވެ.
މި އައު ޚިދުމަތުގެ ދަށުން ރިސޯޓު، ހޮޓެލް، ގެސްޓްހައުސް އަދި ފަތުރުވެރިކަމުގެ ދާއިރާއާ ގުޅުންހުރި އެހެނިހެން ވިޔަފާރިތަކަށް ބޭރުފައިސާ މާރުކުރެވޭނެއެވެ. މި ޚިދުމަތް ތަޢާރަފުކޮށްފައިވަނީ ފޮރިން ކަރަންސީ އެކްޓް (32/2024) އަދި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ކަރަންސީ ރެގިއުލޭޝަން (2024/R-91) އާ އެއްގޮތްވާ ގޮތުގެ މަތިންނެވެ.
މި އޮންލައިން ޕްލެޓްފޯމުގެ ޒަރީއާއިން ވިޔަފާރިތަކަށް ގާނޫނާއި ގަވާއިދުގެ ދަށުން މާރުކުރަން ޖެހޭ (މެންޑޭޓަރީ އެކްސްޗޭންޖް) ހުރިހާ މުއާމަލާތެއް ފަސޭހަކަމާއެކު ޓްރެކްކޮށް ރިވިއު ކުރެވޭނެއެވެ. މި ޕްލެޓްފޯމު މެދުވެރިކޮށް ބޭންކަށް ޑޮލަރު މާރުކުރެވޭނީ 15.42 ރުފިޔާގެ ރޭޓުންނެވެ.
ބީއެމްއެލްއިން މި އޮންލައިން ޕްލެޓްފޯމް ގާއިމުކޮށްފައިވަނީ ފަތުރުވެރިކަމުގެ ދާއިރާގެ ވިޔަފާރިތަކަށް ލާޒިމްކޮށްފައިވާ ބޭރު ފައިސާ މާރުކުރުމަށް މަގުފަހިކޮށްދީ، ވީހާވެސް ފަސޭހަކަމާއެކު މި ޚިދުމަތް ލިބޭނެ ގޮތް ހެދުމުގެ މަޤްޞަދުގައެވެ. މި ޚިދުމަތުގެ ސަބަބުން ފަތުރުވެރިކަމުގެ ދާއިރާގެ ވިޔަފާރިތަކަށް ބޭރުފައިސާ މާރުކުރުމުގެ މަސައްކަތް ފަސޭހަވެ، ހަލުވިވެގެންދާނެ ކަމަށް ބެލެވެއެވެ.