ކާވާ ބީޗް ވޮލީބޯލް ޗެމްޕިއަންޝިޕް: ކުޑަކާއްޓޭ އާއި އެޑަމްގެ ޕެއާރއަށް ތަށި ދިފާއެއް ނުކުރެވުނު

ސްރީލަންކާގެ ނެގަމްބޯގައި ކުރިޔަށްދިޔަ ކާވާ ބީޗް ވޮލީބޯލް ޗެމްޕިއަންޝިޕްގައި ރާއްޖޭގެ އިސްމާޢީލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް)ގެ ޕެއާރ މުބާރާތުގެ ކުއާޓާފައިނަލުން ކަޓައިފިއެވެ.   މި ޕެއާރ ވަނީ މީގެ ކުރިން ކަވާ ބީޗް މުބާރާތްތަކުގައި، ދެ ފަހަރު ރަން މެޑަލް އަދި ރިހި މެޑަލް ހޯދައިފައެވެ.

މި ފަަހަރުގެ މުބާރާތުގައި ރާއްޖެ އާއި ލަންކާގެ އިތުރުން، އިރާން، ބޫޓާން، ކިރްގިސްތާން އަދި ކަޒަކްސްތާން ވާދަކޮށްފައިވާއިރު، ރާއްޖޭގެ ފިރިހެން ދެ ޕެއާރ އާއި އަންހެން ދެ ޕެއާރ މި މުބާރާތުގައި ވާދަކޮށްފައިވެއެވެ. 

ކުޑަކާއްޓޭ އާއި އެޑަމްގެ ފުރަތަމަ މެޗުގައި ސްރީލަންކާގެ ދިލީޕާ އާއި މަލިތުގެ ޕެއާރއާ ބައްދަލުކޮށް 2-1 ސެޓުން (21-17، 14-21، 11-15) ބަލިވިއިރު، ދެވަނަ މެޗުގައި ކަޒަކިސްތާންގެ ގުރިން އާއި މުހައްމަދުގެ ޕެއާ އަތުން ވެސް ބަލިވީ 2-1 ސެޓުން (18-21، 21-19، 16-18) ނެވެ. އަދި އީރާނުގެ ގަލޭނޯވީ އާއި އަބޯލްހަސަން އަތުން ބަލިވީ ސީދާ ދެ ސެޓުން (16-21، 11-21) ނެވެ.

މި ޕެއާރގެ މައްޗަށް ކުއާޓާފައިނަލްގައި 2-0 ސެޓުން ކާމިޔާބު ހޯދީ ލަންކާގެ އަންޖަނާ އާއި ސަންދުންގެ ޕެއާރއެވެ.

ރޭންކިން ޕޮއިންޓު ތާވަލުގައި 144 ޕޮއިންޓާ އެކު، ކުޑަކާއްޓެ އާއި އެޑަމްގެ ޕެއާރ ފަސް ވަނައިގައި އޮތްއިރު، ރާއްޖޭގެ ދެ ވަނަ ޕެއާރ، މުޙައްމަދު ޢަލީ (ޑެންޒޯ) އާއި އަޙުމަދު މުޙައްމަދު (ކޯކޭ) ގެ ޕެއާރ އަށް ވެސް 144 ޕޮއިންޓް ލިބިފައިވެއެވެ.

ޑެންޒޯ އާއި ކޯކޭގެ ޕެއާރ ވަނީ ގްރޫޕްގައި، ބޫޓާންގެ ޖުމޭ އާއި ޑޯޖީގެ ޕެއާރ ސީދާ ދެ ސެޓުން (21-14، 21-12) ބަލިކޮށްފައެވެ.  

އެ ޕެއާރއަށް ދެން ކުޅުނު މެޗުތައް ކާމިޔާބު ކުރެވިފައެއް ނުވެއެވެ. އެގޮތުން ސްރީލަންކާގެ އަންޖަނާ އާއި ސަންދުންއާ ބައްދަލުކޮށް ސީދާ ދެ ސެޓުން (11-21، 14-21) މެޗު ގެއްލުނުއިރު، ކަޒަކްސްތާންގެ ޔަކޯވިއޭވް އާއި ބޮގާޓޫގެ ޕެއާރ އަތުން 2-0 ސެޓުން (14-21، 11-21) އަދި ލަންކާގެ ނަތިން އާއި މަދޫޝާގެ ޕެއާރ އަތުން ވެސް ބަލިވީ 2-0 ސެޓުން (10-21، 15-21) އެވެ.

ކުއާޓާ ފައިނަލުގައި ޑެންޒޯ އާއި ކޯކޭ ބައްދަލުކުރީ، ގްރޫޕް ސްޓޭޖުގައި އެޑަމް އާއި ކުޑަކާއްޓޭގެ ޕެއާރ ވެސް ބަލިކުރި ލަންކާގެ ދިލީޕާ އާއި މަލިތުގެ ޕެއާރއާއެވެ. އެ މެޗުން ޑެންޒޯ އާއި ކޯކޭ ބަލިވީ 2-0 ސެޓުން (12-21، 12-21 ) އެވެ.

މި މުބާރާތުގައި ވާދަކުރި އަންހެން އެއް ނަމްބަރު ޕެއާ އަކީ ހައްވާ ރާޝިދާ (ހައްވަ) އާއި އައިޝަތު މާޖިދާ (މާޖީ) އެވެ. ދެން ވާދަކުރީ އާމިނަތު އަރީޝާ (އަރީ) އާއި ފާތިމަތު ޒީނިޔާ (ޒީ)ގެ ޕެއާރއެވެ. މި ދެ ޕެއާރގެ ތެރެއިން ހައްވަ އާއި މާޖީގެ ޕެއާރ ވަނީ ގްރޫޕް ސްޓޭޖުގައި މެޗެއް ކާމިޔާބުކޮށްފައެވެ. އެއީ، ބޫޓާނުގެ ޒަންގްމޯ އާއި ލޭކީއާގެ ޕެއާރއާ ދެކޮޅަށް ކުޅެގެން 2-0 ސެޓުން (21-16، 21-08) ނެވެ.

ހައްވަ އާއި މާޖީގެ ޕެއާރ ސްރީލަންކާގެ ޝެހާނީ އާއި ޗަތުރިކާގެ ޕެއާރ އަތުން 2-0 ސެޓުން (07-21، 07-21)، އަދި ހަމަ އެ ޤައުމުގެ ކަސޫނީ އާއި ވަސަނާ އަތުން 2-0 ސެޓުން (11-21، 17-21) ވަނީ ބަލިވެފައެވެ. 

މީގެ އިތުރުން، ކަޒަކްސްތާންގެ ރީޔުކޯވާ އާއި ކަރީމޯވާގެ ޕެއާރ އަތުން 2-0 ސެޓުން (15-21، 12-21)، އަދި ކުއާޓާ ފައިނަލުގައި އެ ޤައުމުގެ ކަބުލްބެކޯވާ އާއި އިވާންޗެންކޯގެ ޕެއާ އަތުން ވެސް ބަލިވީ 2-0 ސެޓުން (15-21، 08-21) ނެވެ. 

ރާއްޖޭގެ އަންހެން ދެވަަނަ ޕެއާރ، އަރީ އާއި ޒީގެ ޕެއާރއަށް ކުޅުނު އެއްވެސް މެޗެއް ކާމިޔާބެއް ނުކުރެވެއެވެ. އެގޮތުން، ފުރަތަމަ މެޗުގައި ކަޒަކްސްތާންގެ ކަބުލްބެކޯވާ އާއި އިވާންޗެންކޯގެ ޕެއާރ އަތުން 2-0 ސެޓުން (14-21، 13-21) ބަލިވިއިރު، ދެން ކުޅުނު މެޗުގައި ކިރިގިސްތާންގެ ރަސުލްބެކް ކީޒީ އާއި އައިޓްބެކޯވާގެ ޕެއާރ އަތުން 2-1 ސެޓުން (21-19، 14-21، 09-15) ނެވެ.

ޒީ އާއި އަރީގެ ޕެއާރ ވެސް ވަނީ ލަންކާގެ ދެ ޕެއާރ އަތުން ބަލިވެފައެވެ. އެއީ، ލަންކާގެ ދީޕިކާ އާއި ކަސޫނީގެ ޕެއާ އަތުން 2-0 ސެޓުން (18-21، 14-21) އާއި ކުއާޓާފައިނަލުގައި ކަސޫނީ އާއި ވަސަނާގެ ޕެއާރ އަތުން 2-0 ސެޓުން (13-21، 14-21) ނެވެ.

ރާއްޖޭގެ އަންހެން ދެ ޕެއާރ އަށް ވެސް ރޭންކިންގައި ލިބިފައިވަނީ ފަސްވަނައެވެ. އެއީ 144 ޕޮއިންޓާއެކުއެވެ.