ޚަބަރު
ޝަންހާއީއިން ރާއްޖެއަށް މޯލްޑިވިއަންގެ ފުރަތަމަ ފްލައިޓުން 243 ފަތުރުވެރިން އައިސްފި

މޯލްޑިވިއަންގެ ވައިޑް-ބޮޑީ މަތިންދާބޯޓުން ޝަންހާއީއިން ރާއްޖެއައި ފަތުރުވެރިން ފޮޓޯ:ޕީއެސްއެމް
މޯލްޑިވިއަން އެއަރލައިންސްއިން ޗައިނާގެ ޝަންހާއީއަށް ފަށާފައިވާ ޝެޑިއުލް ދަތުރުތަކުގެ ފުރަތަމަ ފްލައިޓް މިއަދު ހެނދުނު ރާއްޖެއަށް އައިސްފިއެވެ. މި ފްލައިޓުގައި 243 ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ވަނީ ހާމަކޮށްފައެވެ.
މޯލްޑިވިއަންގެ ޝެޑިއުލް ދަތުރުތައް ޝަންހާއީއަށް ފަށާފައިވަނީ މި މަހުގެ 27 ވަނަ ދުވަހުއެވެ. މި ފްލައިޓުން ރާއްޖެ އައި ފަތުރުވެރިންނަށް މަރުޙަބާ ދެންނެވުމަށް ވެލާނާ އިންޓަރނޭޝަނަލް އެއަރޕޯޓުގައި ޚާއްސަ ހަރަކާތެއް ކުރިއަށް ގެންގޮސްފައިވެއެވެ. އެގޮތުން ފަތުރުވެރިންނަށް ދިވެހި ސަޤާފީ ބޮޑުބެރާއި ރަތް ފިނިފެންމަލުން މަރުޙަބާ ކިޔާފައިވެއެވެ.
މިހާރު މޯލްޑިވިއަނުން ޗައިނާގެ 3 މަންޒިލަކަށް ސީދާ ދަތުރުތައް ބާއްވަމުން ގެންދެއެވެ. އެއީ ޗެންޑޫ، ބެއިޖިން އަދި ޝެންހާއީއެވެ. ޗައިނާއަކީ ރާއްޖެއަށް އެންމެ ގިނަ ފަތުރުވެރިން އަންނަ ޤައުމެވެ. މިހާތަނަށް ޗައިނާއިން 23،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ވަނީ ހާމަކޮށްފައެވެ.
ސަރުކާރުން ބުނާ ގޮތުގައި، މޯލްޑިވިއަނުން ޗައިނާއަށް މި ފެށި ދަތުރުތަކާއެކު ރާއްޖޭގެ ފަތުރުވެރިކަމަށް ބޮޑު ކުރިއެރުމެއް ލިބޭނެއެވެ. އަދި ޗައިނާއިން ރާއްޖެއަށް އަހަރެއްގެ މައްޗަށް 40،000 ފަތުރުވެރިން ގެނެވޭނެކަމަށް ސަރުކާރުން ވަނީ އަންދާޒާކޮށްފައެވެ.