ސްނޯރކްލިންއަށް ދިޔަ ފަތުރުވެރިއަކު ގެއްލިގެން ހޯދަނީ

ރ އަތޮޅުގެ ރިޒޯޓެއްގައި ސްނޯރކްލިންއަށް ގޮސް އުޅުނިކޮށް ގެއްލުނު ފަތުރުވެރިއަކު ހޯދަމުންދާކަމަށް ފުލުހުން ހާމަކޮށްފިއެވެ.

ފުލުހުންގެ މީޑިއާ އޮފިޝަލް ހާމަކޮށްފައިވާ ގޮތުގައި، ގެއްލިފައިވަނީ އަފްތާބު ޚާން ނަމަކަށްކިޔާ އިންޑިއާގެ 25 އަހަރުގެ ފިރިހެނެކެވެ.

މިމީހާ ގެއްލިފައިވަނީ އާދިއްތަ ދުވަހުގެ މެންދުރުފަހު 3:35 ހާއިރުކަމަށާއި، އެކަން ފުލުހުންނަށް ރިޕޯޓުކޮށްފައި ވަނީ އެ ދުވަހުގެ 4:00 ހާއިރުކަމަށް ވެސް ފުލުހުން ހާމަކޮށްފައިވެއެވެ. 

އޭނާ ގެއްލުނުތާ މިހާރު 24 ގަޑިއިރުވެފައިވާއިރު، އަދިވެސް އޭނާ ފެނިފައެއް ނުވެއެވެ.

މި މައްސަލައާ ގުޅޭ ތަޙުޤީޤެއް ފުލުހުން ހިންގަމުންދާއިރު، އޭނާ ހޯދުމުގެ މަސައްކަތް އެމްއެންޑީއެފް އިން ދަނީ ކުރަމުންނެވެ.

މި މައްސަލައާ ގުޅޭ އިތުރު މަޢުލޫމާތެއް ފުލުހުން ޙިއްސާކޮށްފައެއް ނުވެއެވެ.