އުކާލާތަކެތީގެ ތެރެއިން ބޭނުންކުރެވޭ ތަކެތި ހަދިޔާ ކުރުމުގެ ޕްރޮގްރާމެއް އެޗްޑީސީއިން ފަށަނީ

ރަމަޟާން މަހަށް ތައްޔާރުވުމުގެ ގޮތުން، ގޭގޭގެ އާބާތުރަ ފިލުވުމުގެ ތެރޭގައި އުކާލާތަކެތީގެ ތެރެއިން ބޭނުންކުރެވޭ ތަކެތި އެހެން ގޭގެއަށް ހަދިޔާ ކުރުމުގެ ޕްރޮގްރާމެއް، ހުޅުމާލޭ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ފެށުމަށް ނިންމައިފިއެވެ.

އެ ކުންފުނިންކުރި އިޢުލާނެއްގައިވާ ގޮތުން، ގޭގޭގައި ބޭނުންކުރާ ތަކެތި އުކާލުމުގެ ބަދަލުގައި، އޭގެ ތެރެއިން ބޭނުންކުރެވޭ ޙާލަތުގައި ހުރި ތަކެތި ބޭނުންޖެހިފައިވާ ފަރާތްތަކަށް ހަދިޔާ ކުރުމަށް މަގުފަހި ކުރުމުގެ ގޮތުން، "އެއްގެއިން އަނެއްގެއަށް" ނަމުގައި ޕްރޮގްރާމެއް ފެށުމެއް ނިންމާފައިވާ ކަމަށެވެ.

އެގޮތުން، 1 ފެބުރުވަރީގައި މި ޕްރޮގްރާމް ފެށުމަށް ހަމަޖެހިފައިވާއިރު، މި ޕްރޮގްރާމުގައި ހުޅުމާލޭގެ ކޮންމެ ގެއަކަށްވެސް ބައިވެރިވެވޭނެއެވެ. އަދި ގެއަކުން ހަދިޔާކުރަން ބޭނުންވާ ތަކެތި، އެ ތަކެތީގެ ބޭނުންޖެހިފައިވާ އެހެން ގެއަކަށް ގެންދިއުމުގައި އެޗްޑީސީ އިން އެހީތެރިވެދޭނެކަމަށް ބުނެފައިވެއެވެ. 

އެހެންކަމުން، މި ޕްރޮގްރާމުގެ ދަށުން އެއްގެއިން އަނެއް ގެއަށް ތަކެތި ހަދިޔާކުރަން ބޭނުންވާ ފަރާތްތައް، 16 ފެބުރުވަރީ 2025ގެ ކުރިން އެ ކުންފުނީގެ ހޮޓްލައިން 7412111 އަށް ގުޅައި މަޢުލޫމާތު ސާފުކުރެއްވުމަށް، އެޗްޑީސީ އިން އެދިފައިވެއެވެ. 

މި ޕްރޮގްރާމުގެ ދަށުން ތަކެއްޗާއި ހަވާލުވުމަށް ހަމަޖެހިފައިވަނީ، ރަސްމީ ދުވަސްތައް އަދި ހުކުރު ދުވަހު މެންދުރު ފަހު 3-6 އަށް އަދި ހޮނިހިރު ދުވަހުގެ ހެނދުނު 10 އިން ހަވީރު 6 އަށެވެ.