ހޯކްސްގެ އުޅަނދެއްގައި ސިއްރުން ސިނގިރޭޓު އެތެރެކުރި މައްސަލައެއް ތަޙުޤީޤުކުރަން ފަށައިފި

ހޯކްސްގެ އުޅަނދެއްގައި ސިއްރުން 200 ކާޓަން ސިނގިރޭޓު އެތެރެކުރި މައްސަލައެއް ތަޙުޤީޤުކުރަން ފަށައިފިއެވެ.

ފުލުހުން ހާމަކޮށްފައިވާ ގޮތުގައި މި މައްސަލައިގައި ތުހުމަތުކުރެވެނީ ދަ ހޯކްސް ޕްރައިވެޓް ލިމިޓެޑްގެ ފޮރިންގޮއިންގ އުޅަނދެއްކަމަށްވާ ދަ ހޯކްސް ޖަވާހިރު ބޯޓުން މި ސިނގިރޭޓްތައް ރާއްޖެއަށް އެތެރެކޮށްފައިވާ ކަމަށެވެ.

އެ އުޅަނދުގައި ރާއްޖެ އެތެރެކޮށްފައިވަނީ 200 މާސްޓަރ ކާޓަން މެންޗެސްޓަރ ސިނގިރޭޓްކަމަށް ވެސް ފުލުހުން ހާމަކޮށްފައިވެއެވެ. 

ތަޙުޤީޤަށް މިހާތަނަށް އެނގިފައިވާ ގޮތުގައި، ބޯޓުގެ މެނިފެސްޓުގައި ނުހިމަނައި ވަގަށް ރާއްޖެ އެތެރެކުރަން އުޅުނު މި ސިނގިރޭޓު ކާޓަންތައް ހިފައިގެން ދަ ހޯކްސް ޖަވާހިރު ބޯޓު ރާއްޖެ އައިސްފައިވަނީ 2024 އޮކްޓޯބަރު 24ވަނަ ދުވަހުއެވެ. އަދި މި ތަކެތި ބާލާފައިވަނީ 2024  އޮކްޓޫބަރު 25 ވަނަ ދުވަހުގެ ރޭގަނޑުގެ ވަގުތެއްގައި. ކ. ތިލަފުށީގައި ހުންނަ ހޯކްސް ބޯޓު ޔާޑުގެ ޖެޓީއަށެވެ. 

މި މައްސަލައާ ގުޅިގެން ފުލުހުންގެ ތަޙުޤީޤު ހިންގަމުންދަނީ ދެ ކަމަކަށެވެ. އެއީ ކަސްޓަމްސްގެ ގާނޫނު (ގާނޫނު ނަންބަރު 08/2011) ގެ 97 ވަނަ މާއްދާގެ ދަށުން ދިވެހިރާއްޖެއަށް ސިއްރުން މުދާ އެތެރެކުރަން އުޅުމުގެ ކުށާއި، މަނީ ލޯންޑްރިންގ އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނު (ގާނޫނު ނަންބަރު 10/2014) ގެ 53 ވަނަ މާއްދާގެ ދަށުން މަނީ ލޯންޑްރިންގގެ ކުށަށެވެ.

މި މައްސަލައާ ގުޅިގެން ދަ ހޯކްސްއިން ކުރިން ބުނެފައިވަނީ، މިއީ އެކުންފުނިން ކުރި ކަމެއް ނޫންކަމަށާއި، ނަމަވެސް މިއީ ކުންފުނީގެ ރިސޯސް ބޭނުންކޮށްގެން އެ ކުންފުނީގެ މުވައްޒަފުންތަކެއް ކުރިކަމެއް ކަމަށެވެ. އަދި ތުހުމަތު ކުރެވުނު މުވައްޒަފުންތައް ވަގުތުން މަސައްކަތުން އެކަހެރިކޮށް، ކަމާބެހޭ އިދާރާތަކަށް އެކަން ރިޕޯޓްކޮށްފައިވާނެކަމަށް ވެސް ހޯކްސްއިން ހާމަކޮށްފައިވެއެވެ.