އިހަވަންދޫގައި ޕާސްޕޯޓާއި އައިޑީ ކާޑުގެ ޚިދުމަތް ފަށައިފި

ހއ. އިހަވަންދޫއިން ދިވެހި ޕާސްޕޯޓު ދޫކުރުމުގެ ޚިދުމަތާއި، ދިވެހި ރައްޔިތެއްކަން އަންގައިދޭ ކާޑު ޕްރިންޓުކޮށް ދޫކުރުމުގެ ޚިދުމަތް ފަށައިފިއެވެ.

މި ޚިދުމަތްތައް ރަސްމީކޮށް އެ ރަށުގައި ފަށާފައިވަނީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިހާރު ހއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން، އިހަވަންދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާގެ ތެރެއިންނެވެ.

މި ޖަލްސާގައި، މި ދެ ޚިދުމަތް ވެސް ރަސްމީކޮށް ފައްޓަވާދެއްވީ ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާނެވެ. އަދި ޕާސްޕޯޓުގެ ޚިދުމަތް ފެއްޓެވުމުގައި، ކޮންޓްރޯލަރ ޖެނެއަލް އޮފް އިމިގްރޭޝަން، މުޙައްމަދު ޝަމްޢާން ވަޙީދު ވެސް ވަނީ ބައިވެރިވެވަޑައިގެންފައެވެ.

މި ޚިދުމަތްތައް ރައްޔިތުންނާ ގާތުން ފޯރުކޮށްދިނުމަކީ ރައީސުލްޖުމްހޫރިއްޔާގެ ސިޔާސަތެކެވެ. އަދި މި މަސައްކަތް ރަސްމީކޮށް ފަށާފައިވަނީ މިދިޔަ އަހަރުގެ ނޮވެންބަރު މަހުގެ 16 ވަނަ ދުވަހުއެވެ. 

އައިޑީކާޑު ޕްރިންޓުކޮށް ދޫކުރުމުގެ މަސައްކަތް މިއަދު އެ އަތޮޅު ދިއްދޫގައި ވެސް ފަށާފައިވެއެވެ. މި ޚިދުމަތް ފަށާފައިވާއިރު، ޕާސްޕޯޓުގެ ޚިދުމަތަކީ އެ ރަށުން ކުރިން ވެސް ދެމުން އައި ޚިދުމަތެކެވެ.