ޒަކާތު ހައުސްގެ އިމާރާތުން ލިބޭ އާމްދަނީ ދޭނީ ޒަކާތުގެ ޙައްޤުވެރީންނަށް: ވަޒީރު ޝަހީމް

ޒަކާތު ހައުސްގެ އިދާރާގެ ގޮތުގައި ހަދާ އިމާރާތުގެ ބައެއް ފަންގިފިލާތައް ކުއްޔަށް ދީގެން ލިބޭ އާމްދަނީ ދޭނީ ޒަކާތުގެ ޙައްޤުވެރީންނަށް ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

ވަޒީރު މިކަން ހާމަކުރެއްވީ ޒަކާތު ހައުސްގެ އިމާރާތާ ގުޅޭގޮތުން މީޑިއާތަކަށް މަޢުލޫމާތު ދެއްވަމުންނެވެ. މި ބައްދަލުވުމުގައި ވަޒީރު ވިދާޅުވީ "ބައިތުއްޒަކާތު" ގެ ނަމުގައި އިމާރާތްކުރާ ދިވެހިރާއްޖޭގެ ޒަކާތު ހައުސްގެ ޢަމަލީ މަސައްކަތް މިއަހަރު ފެށޭނެ ކަމަށެވެ.

ވަޒީރު އިތުރަށް ވިދާޅުވީ މި އިމާރާތަކީ 10 ފަންގިފިލާއަށް ހެދޭ އިމާރާތެއް ކަމަށާއި، އެ އިމާރާތުގައި ޒަކާތު ހައުސްގެ އޮފީސް ބަޔާއި ކުއްޔަށްދޭ ބައިތައް ހިމެނޭނެ ކަމަށެވެ. އަދި ކުއްޔަށް ދީގެން ލިބޭ އާމްދަނީ ހޭދަކުރާނީ ޒަކާތް ޙައްޤުވާ މީހުންނަށް ކަމަށްވެސް ވަޒީރު ވިދާޅުވިއެވެ.

މިއަހަރުގެ ތެރޭގައި ޒަކާތު ހައުސްގެ އިމާރާތެއް އެޅުމުގެ މަސައްކަތް ފެށޭނެކަން ވަޒީރު ޑރ. މުޙައްމަދު ޝަހީމް ހާމަކުރެއްވީ މިދިޔަ އަހަރުގެ ނޮވެންބަރު މަހުގެ ތެރޭގައެވެ. އިމާރާތަށް ބޭނުންވާ ބިން މިހާރު ހަމަޖެހިފައިވާކަމަށް ވަޒީރު ވިދާޅުވެފައިވެއެވެ.

ރާއްޖޭގައި ޒަކާތް ނެގުމާއި ޒަކާތް ބެހުމުގެ ނިޒާމު ހަރުދަނާކޮށް، ޒަކާތުގެ ފަރުޟު އަދާކުރުމަށް ހޭލުންތެރިކަން އުފެއްދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއްދެއްވާ ކަމެކެވެ. ޒަކާތުގެ ކަންކަން ބެލެހެއްޓުމަށް ވަކި ޚާއްސަ އިދާރާއެއްވެސް  ސަރުކާރުން އުފެއްދެވީ ޒަކާތުގެ ނިޒާމު ހަރުދަނާކުރުމުގެ ގޮތުންނެވެ.

ޒަކާތުގެ ނިޒާމު ހަރުދަނާކޮށް، ހޭލުންތެރިކުރުމަށް ކުރެވުނު މަސައްކަތްތަކާއެކު މިދިޔަ އަހަރު ވެފައިވަނީ އެންމެ ގިނަ އަދަދަކަށް މުދަލު ޒަކާތުގެ ގޮތުގައި ފައިސާ ލިބުނު އަހަރަށެވެ. އެގޮތުން 101 މިލިޔަނަށްވުރެ ގިނަ ރުފިޔާ މުދަލު ޒަކާތުގެ ގޮތުގައި މިދިޔަ އަހަރު ލިބުނުކަން އިސްލާމީ ކަންތައްތަކާބެހޭ ވުޒާރާއިން ވަނީ ހާމަކުރައްވާފައެވެ. 2023 ވަނަ އަހަރު މުދަލު ޒަކާތުގެ ގޮތުގައި ލިބުނީ 89.5 މިލިޔަން ރުފިޔާއެވެ.