ނުކުޅެދުންތެރިކަން ހުންނަ މީހުންނަށް ދީނީ ޢިލްމު ފޯރުކޮށްދޭނެ ފަސޭހަ ގޮތްތަކާ ގުޅޭގޮތުން މަޝްވަރާކޮށްފި

ނުކުޅެދުންތެރިކަން ހުންނަ ކުދިންނާއި މީހުންނަށް ދީނީ ޢިލްމު ފޯރުކޮށްދޭނެ ފަސޭހަ ގޮތްތަކާ ގުޅޭގޮތުން އިސްލާމީ ކަންތައްތަކާ ބެހޭ ވުޒާރާއާއި އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާއާއި ދެމެދު މަޝްވަރާ ކުރައްވައިފިއެވެ. 

މި ބައްދަލުވުމުގައި ދެ ވުޒާރާގެ ވަޒީރުން ވަނީ ބައިވެރިވެވަޑައިގެންފައެވެ. އެގޮތުން މި ބައްދަލުވުމުގެ މައިގަނޑު އަމާޒަކީ، ދީނީ ހޭލުންތެރިކަން އިތުރުކުރުމާއި އަދި ދީނީ އެކިއެކި ހަރަކާތްތަކުގައި މުޖުތަމަޢުގެ އެއްވެސް ބަޔަކު ބާކީ ނުކޮށް، މިފަދަ ފުރުސަތުތައް ނުކުޅެދުންތެރިކަން ހުންނަ ފަރާތްތަކަށް ވެސް ފޯރުކޮށްދެވޭނެ މަގެއް ހޯއްދެވުންކަމަށް އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާއިން ހާމަކޮށްފައިވެއެވެ.

އަދި އިސްލާމީ ކަންތައްތަކާ ބެހޭ ވުޒާރާއިން ކުރައްވާ މަސައްކަތްތަކާއި ހިންގާ ޕްރޮގްރާމްތަކުގައި މި ވިސްނެވުން ގެންގުޅުއްވާކަން، އިޖުތިމާއީ ތަރައްޤީއާއި ބެހޭ ވަޒީރު ޑރ. އައިޝަތު ޝިހާމް ފާހަގަކުރައްވާފައިވެއެވެ.  އެގޮތުން "ރިސާލަތު" ޕްރޮގްރާމްގައި، ސައިން ލެންގުއޭޖް އިންޓަރޕްރިޓޭޝަން ހިމަނުއްވަވާފައިވާކަމީ، އަޑުއިވުމުގެ ނުކުޅެދުންތެރިކަން ހުންނަ ފަރާތްތަކަށް ދީނީ މަޢުލޫމާތު ލިބުމުގައި ދިމާވެފައިވާ ހުރަސްތަކަށް ނުހަނު ބޮޑު ލުއިކަމެއް ގެނެސްދޭނެ އަގުހުރި މަސައްކަތެއްކަން ވަޒީރު ފާހަގަކުރެއްވިއެވެ.

މި ޕްރޮގްރާމްގެ ކަރިކިއުލަމް ގެންނަވާފައި ހުންނަނީ ޒުވާނުންނާ ގުޅޭހެން ތިލަ އިބާރާތުން ކަމަށާއި، އިނގިރޭސި އަދި ދިވެހިބަހުން މި ޕްރޮގްރާމް ގެންނަވާކަމީވެސް އެކިފަރާތްތައް ޝާމިލްކުރުމަށް ކުރެވޭ މަސައްކަތުގެ ހެއްކެއްކަމަށް ވަޒީރު ވިދާޅުވިއެވެ.

"ރިސާލަތު" ޕްރޮގްރާމަކީ އިސްލާމް ދީނުގެ ރުކުންތަކަށާއި އަސާސްތަކަށް ލޯބިކުރާ ޖީލެއް ބިނާކުރުމުގެ މަޤްޞަދުގައި އިސްލާމީ ކަންތައްތަކާ ބެހޭ ވުޒާރާއިން ހިންގަވާ ޕްރޮގްރާމެކެވެ. 

ދީނީ ހޭލުންތެރިކަން އިތުރުކުރުމުގައި އަދި ދީނީ އެކިއެކި ހަރަކާތްތަކުގައި މުޖުތަމަޢުގެ އެއްވެސް ބަޔަކު ބާކީނުކޮށް ކުރިޔަށްގެންދިއުމުގެ ގޮތުން، އެކި ދީނީ ފޮތްތަކުގެ އޯޑިއޯ ވަރޝަން ތައްޔާރުކުރަމުންދާކަމީ ވެސް، އިސްލާމީ ކަންތައްތަކާ ބެހޭ ވަޒީރާއި އެ ވުޒާރާއިން މިކަމަށް ދެއްވަވާ އަހައްމިއްޔަތުކަން ފާހަގަވާ ކަމެއްކަމަށް ވަޒީރު ޑރ. އައިޝަތު ޝިހާމް ވަނީ ވިދާޅުވެފައެވެ.

އަދި މި މަސައްކަތަށް ކުރިޔަށްއޮތް ތާންގައި ވެސް އިސްލާމީ ކަންތައްތަކާ ބެހޭ ވުޒާރާއިން އެއްބާރުލުން ދެއްވާނެކަމަށް އެ ވުޒާރާއިން ވަނީ ވިދާޅުވެފައެވެ.