ޚަބަރު
މިސުރުގެ ރައީސް ސީސީ ޣައްޒާގެ ރައްޔިތުން ބޭރުކުރުމަށް އިންކާރުކުރުމާ ގުޅިގެން އައްބާސް ޝުކުރު އަދާކުރައްވައިފި

ރައީސް މަޙްމޫދު އައްބާސް އަދި މިސުރުގެ ރައީސް އަބްދުލް ފައްތާޙް އައް-ސީސީ
ފަލަސްތީނުން ރައްޔިތުން މަޖުބޫރުން ބޭރުކުރުމުގެ އެމެރިކާގެ ރައީސް ޓްރަމްޕްގެ ޕްލޭނަށް ރައީސް ސީސީ އިންކާރުކުރެއްވުމާ ގުޅިގެން ފަލަސްތީނު އޮތޯރިޓީގެ ރައީސް މަޙްމޫދު އައްބާސް މިސުރުގެ ރައީސް އަބްދުލް ފައްތާޙް އައް-ސީސީއަށް ޝުކުރު އަދާކުރައްވައިފިއެވެ.
ބުދަ ދުވަހު ބޭއްވުނު ނޫސްވެރިންގެ ބައްދަލުވުމެއްގައި ރައީސް ސީސީ ވިދާޅުވީ ޣައްޒާއިން ރައްޔިތުން ބޭރުކުރުމުގައި މިސުރު ބައިވެރިނުވާނެ ކަމަށެވެ. އަދި މިއީ އިންސާފުވެރިކަމެއް ނޫން ކަމަށް ވެސް ވިދާޅުވިއެވެ. މި ބަސްފުޅުތަކާ ގުޅިގެން ރައީސް އައްބާސް ވަނީ ރައީސް ސީސީއަށް ސިޓީއެއް ފޮނުއްވާފައެވެ.
"އަޅުގަނޑުމެންގެ ރައްޔިތުން ޣައްޒާއިން ބޭރުކުރުމަށް އިންކާރުކުރައްވައި މިސުރުން ގެންގުޅުއްވާ ސާބިތު ކަމަށް އަޅުގަނޑުމެން ވަރަށް ބޮޑަށް އަގުވަޒަންކުރަން،" އައްބާސް ސިޓީގައި ވިދާޅުވިއެވެ.
މީގެ އިތުރުން، "ފަލަސްތީނު ރައްޔިތުންނަށް ކުރެވޭ އަނިޔާއާ ދެކޮޅަށް ތެދުވެވަޑައިގަތުމާއި، ފަލަސްތީނުގެ މައްސަލައަށް މިސުރުން އަބަދުވެސް ދެއްވާ އެހީތެރިކަމަށް" ވެސް އައްބާސް ވަނީ ޝުކުރު އަދާކުރައްވާކުރައްވާފައެވެ.
އެމެރިކާގެ ރައީސް ޓްރަމްޕް ވިދާޅުވެފައިވަނީ މިސުރާއި ޖޯޑަންގެ ރަސްގެފާނު ޢަބްދުﷲ ދެވަނައަށް، ޣައްޒާއިން ފަލަސްތީނުން ބޭރުކުރުމުގެ އޭނާގެ ޕްލޭނަށް އެއްބާރުލުން ދެއްވާނެ ކަމަށް އުންމީދުކުރައްވާ ކަމަށެވެ. ނަމަވެސް މިސުރުގެ ރައީސް ސީސީ ވަނީ މި ޕްލޭނަށް އިންކާރުކުރައްވާފައެވެ.