އެމެރިކަން އެއަރލައިންސްގެ މަތިންދާބޯޓެއް ހެލިކޮޕްޓަރެއްގައިޖެހި ވެއްޓިއްޖެ

ވޮޝިންގްޓަން ޑީސީގެ ރީގަން ނެޝަނަލް އެއަރޕޯޓް ކައިރީގައިވާ ޕޮޓޯމެކް ކޯރަށް މަތިންދާބޯޓެއް ވެއްޓިއްޖެކަމަށް ޑީސީ ފަޔަރ އެންޑް އެމަރޖެންސީ މެޑިކަލް ސަރވިސަސްއިން މަޢުލޫމާތު ދީފިއެވެ. ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން ބުނެފައިވަނީ މި ހާދިސާ ހިނގާފައިވަނީ އެމެރިކަން އެއަރލައިންސްގެ ފްލައިޓް 5342 އާއި ސިކޯސްކީ އެޗް-60 ހެލިކޮޕްޓަރެއް ޖެހުމުގެ ސަބަބުންކަމަށެވެ.

އެފްއޭއޭ އިން ބުނެފައިވާ ގޮތުގައި މި ހާދިސާ ހިނގާފައިވަނީ މަތިންދާބޯޓު ރަންވޭއަށް އަންނަމުންދަނިކޮށެވެ. ހާދިސާގައި ޖެހުނު މަތިންދާބޯޓަކީ ޕީއެސްއޭ އެއަރލައިންސްގެ ބޮމްބާޑިއަރ ސީއާރްޖޭ 700 ރީޖަނަލް ޖެޓެކެވެ. މި ބޯޓު ފުރާފައިވަނީ ކެންސަސްގެ ވިޗިޓާއިންނެވެ.

އެމެރިކަން އެއަރލައިންސްއިން ސީއެންއެންއަށް މަޢުލޫމާތު ދީފައިވާ ގޮތުގައި މި ފްލައިޓުގައި 60 ފަސިންޖަރުންނާއި 4 ކުރޫ މެންބަރުން ތިބިއެވެ. މި ހާދިސާއާ ގުޅިގެން ރީގަން ނެޝަނަލް އެއަރޕޯޓް ވަނީ ބަންދުކޮށްފައެވެ.

ނެޝަނަލް ޓްރާންސްޕޯޓޭޝަން ސޭފްޓީ ބޯޑު (އެންޓީއެސްބީ) އިން މިހާރު ވަނީ މި ހާދިސާގެ ތަޙުޤީޤު ފަށާފައެވެ. އެފްއޭއޭ އިން ބުނެފައިވަނީ މިހާތަނަށް ލިބިފައިވާ މަޢުލޫމާތަކީ އިބްތިދާއީ މަޢުލޫމާތު ކަމަށާއި، އިތުރު މަޢުލޫމާތު ލިބުމާއެކު ހިއްސާކުރާނެ ކަމަށެވެ.

ސެނެޓަރ ޖެރީ މޯރަން ވަނީ އެކްސް ގައި ޕޯސްޓެއް ކުރައްވައި، މި ހާދިސާގައި ހިމެނުނު އެންމެންނަށް ދުޢާ ކޮށްދިނުމަށް އެދިވަޑައިގެންފައެވެ.