ސޫރިޔާގެ ވަގުތީ ރައީސްގެ މަޤާމަށް އެޗްޓީއެސްގެ ވެރިޔާ އަޙްމަދު އަލްޝަރާޢު ޢައްޔަނުކޮށްފި

ސޫރިޔާގެ ވަގުތީ ރައީސްގެ މަޤާމަށް އެ ޤައުމުގެ ހަނގުރާމަވެރި ޖަމާޢަތް، ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ވެރިޔާ އަޙްމަދު އަލްޝަރާޢު ޢައްޔަނު ކޮށްފިއެވެ. މި ނިންމުން ނިންމާފައިވަނީ އަސަދުގެ ވެރިކަން ވައްޓާލުމުގައި ބައިވެރިވި އަސްކަރީ ކޮމާންޑަރުންގެ މެދުގައި ބޭއްވުނު ބައްދަލުވުމެއްގައެވެ.

އެޗްޓީއެސްއަކީ މިދިޔަ ޑިސެމްބަރު މަހު ސޫރިޔާގެ ކުރީގެ ރައީސް ބައްޝާރު އަލް-އަސަދުގެ ވެރިކަން ވައްޓާލުމުގައި އެންމެ އިސް ދައުރެއް އަދާކުރި ޖަމާޢަތެވެ. މި ޖަމާޢަތުގެ މަސައްކަތުން 13 އަހަރަށްވުރެ ދިގު މުއްދަތަކަށް ދެމިގެންދިޔަ ސޫރިޔާގެ އަހުލީ ހަނގުރާމަ ވަނީ ނިމުމަކަށް އައިސްފައެވެ.

ވަގުތީ ރައީސްގެ މަޤާމަށް ޢައްޔަނުކުރެވުނު ޝަރާޢު ވަނީ ޤާނޫނީ ކައުންސިލެއް އުފެއްދުމުގެ މަސައްކަތް ފަށާފައެވެ. އޭނާ ބުނެފައިވަނީ އެންމެ އިސްކަމެއް ދޭނީ ސަރުކާރަށް އައިސްފައިވާ ޤާނޫނީ ހުސްކަން ޝަރުޢީ އަދި ޤާނޫނީ ގޮތުގައި ފުރުމަށް ކަމަށެވެ. އަދި އިންތިޤާލީ އިންސާފުގެ ތެރެއިން ޤައުމުގައި މަދަނީ ހަމަޖެހުމާއި ޞުލްޙަ ޤާއިމު ކުރަން ޖެހޭ ކަމަށް އޭނާ ވަނީ ފާހަގަކޮށްފައެވެ.

އެޗްޓީއެސްއިން ބުނެފައިވަނީ މިހާރު އޮތް ޤާނޫނު އަސާސީއަށް ޢަމަލުކުރުން ހުއްޓާލާފައިވާ ކަމަށާއި، ޤާނޫނުހަދާ މަޖިލިސް އުވާލާފައިވާ ކަމަށެވެ. އައު ޤާނޫނު އަސާސީއެއް އެކުލަވާލައި ޢަމަލުކުރަން ފެށެންދެން ގުޅުންހުރި މަސައްކަތްތައް ކުރަމުންދާނީ އަލަށް އުފައްދާ ޤާނޫނީ ކައުންސިލުންނެވެ.

ޝަރާޢު އިތުރަށް ބުނެފައިވަނީ އިންތިޤާލީ މުއްދަތުގައި ޤައުމީ ބައްދަލުވުމެއް ބާއްވައި، އެންމެންގެ ބައިވެރިވުން އޮންނަ ސަރުކާރެއް ޤާއިމުކުރާނެ ކަމަށެވެ. ނަމަވެސް، ސޫރިޔާގައި އިންތިޚާބެއް ބޭއްވުމަށް އަދި ހަތަރު އަހަރެއްހާ ދުވަސް ނަގާނެ ކަމަށް އޭނާ ވަނީ ލަފާކޮށްފައެވެ.

މި ބަދަލާއެކު، ސޫރިޔާގެ ސިޔާސީ މަޝްރަޙުގައި އައު ބާބެއް ފެށިގެންދާއިރު، ޤައުމުގެ މުސްތަޤުބަލާމެދު ގިނަ ބައެއްގެ ސުވާލު އުފެދިފައިވެއެވެ.