ޚަބަރު
ހުރާއިން 46 ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮއްސި

ހުރާގައި އިމިގްރޭޝަނުން ކުރިއަށްގެންދިޔަ ޚާއްސަ އޮޕަރޭޝަންގެ ތެރެއިން ފޮޓޯ:އިމިގްރޭޝަން
ކ. ހުރާގައި ޤަވާއިދާ ޚިލާފަށް އުޅެމުންދިޔަ 46 ބިދޭސީން މޯލްޑިވްސް އިމިގްރޭޝަނުގެ ބެލުމުގެ ދަށަށް ގެނެވިއްޖެއެވެ. މިއީ ޤަވާއިދާ ޚިލާފަށް އުޅެމުންދާ ބިދޭސީން ހޯދުމަށް އިމިގްރޭޝަނުން ކުރަމުންދާ މަސައްކަތުގެ ތެރެއިން ހިންގުނު އޮޕަރޭޝަނެކެވެ.
މި އޮޕަރޭޝަން ކުރިއަށް ގެންދިޔައީ ބުދަ ދުވަހު ހެނދުނު 6:00 އިން ފެށިގެން ހަވީރު 5:00 އާ ހަމައަށެވެ. މި އޮޕަރޭޝަނަކީ ރާއްޖޭގައި ޤަވާއިދާ ޚިލާފަށް އުޅެމުންދާ ބިދޭސީންގެ މައްސަލަ ހައްލުކުރުމަށް، މޯލްޑިވްސް އިމިގްރޭޝަނުން އިސްނަގައިގެން ތަންފީޒީ އިދާރާތަކާއެކު އެކުލަވާލާފައިވާ ޚާއްސަ ޓާސްކްފޯހުން ކުރިއަށް ގެންދިޔަ އޮޕަރޭޝަނެކެވެ.
އިމިގްރޭޝަނުން މަޢުލޫމާތު ދެއްވާފައިވާ ގޮތުގައި، މިދިޔަ އަހަރު ހިންގި އޮޕަރޭޝަންތަކުގައި އެކަނިވެސް 5600 އަށްވުރެ ގިނަ ބިދޭސީން ވަނީ އެމީހުންގެ މީހުންގެ ޤައުމަށް އަނބުރާ ފޮނުވާލާފައެވެ. މީގެ އިތުރުން، އާންމު ސަރަހައްދުތަކަށް އެއްވެ އުޅޭ ބިދޭސީންގެ މެދުގައި ފަހަކަށް އައިސް އާއްމު މަސްލަހަތު ގެއްލޭފަދަ ކަންކަން ހިންގަމުންދާތީ އެފަދަ ސަރަހައްދުތައް މޮނިޓަރކުރުމުގެ މަސައްކަތްވެސް އިމިގްރޭޝަނުން ވަނީ ފަށްޓަވާފައެވެ.
ރަށްރަށުގައި ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް، އިއްޔެ ހެނދުނު 6:00 އިން ހަވީރު 5:00 އަށް ޓާސްކުފޯހުން ވަނީ ކ. ހުރާގައި ހާއްސަ ރެއިޑު އޮޕަރޭޝަނެއް ކުރިއަށް ގެންގޮސްފައި. މި އޮޕަރޭޝަންގައި، ހުރާގައި ގަވާއިދާ ހިލާފަށް އުޅެމުންދިއަ 46 ބިދޭސީއަކު ވަނީ އިމިގްރޭޝަންގެ… pic.twitter.com/lXOVToCncD
— Maldives Immigration (@ImmigrationMV) January 30, 2025
އިމިގްރޭޝަނުން އިތުރަށް ވިދާޅުވެފައިވަނީ، ރާއްޖޭގައި ޤަވާއިދާ ޚިލާފަށް އުޅެމުންދާ ބިދޭސީން ފޮނުވާލުމުގެ އިތުރުން، ޤަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެ ފުރުސަތުވެސް ދަނީ ފޯރުކޮށްދެމުންނެވެ. އަދި ރާއްޖޭގައި އުޅެމުންދާ ބިދޭސީންގެ ބަޔޯމެޓްރިކް ޑޭޓާ އެއްކޮށް، ނިޒާމީ ގޮތުން މިމައްސަލަ ހައްލުކުރުމަށް ދިމާވެފައި ހުރި ގޮންޖެހުންތައް ހައްލުކުރުމަށް ސަރުކާރުން ދަނީ މަސައްކަތް ކުރަމުންނެވެ.