ޚަބަރު
ޕީޕީއެމް އުވާލައި ސިޔާސީ ޕާޓީގެ ދަފްތަރުން އުނިކޮށްފި

ޕީޕީއެމްގެ ސިޔާސީ ހަރަކާތެއްގެ ތެރެއިން ފޮޓޯ:އެމްވީ ޕްލަސް
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލައި، ސިޔާސީ ޕާޓީގެ ދަފްތަރުން އުނިކޮށްފައިވާ ކަމަށް އިލެކްޝަންސް ކޮމިޝަނުން އިއުލާނުކޮށްފިއެވެ. މި ނިންމުމަކީ ޕީޕީއެމްގެ އަމިއްލަ އެދުމުގެ މަތިން ނިންމާފައިވާ ނިންމުމެކެވެ.
— Elections Commission (@ElectionsMv) January 30, 2025
ޕީޕީއެމް އުވާލުމަށް އެ ޕާޓީގެ ސެނެޓުން ނިންމީ މިދިޔަ އަހަރުގެ ޑިސެންބަރު މަހުގެ 2 ވަނަ ދުވަހު ބޭއްވި ބައްދަލުވުމެއްގައެވެ. މި ނިންމުން ނިންމި ސަބަބުގެ ގޮތުގައި ޕީޕީއެމުން ބުނެފައިވަނީ، މިހާރު އެ ޕާޓީ މަސައްކަތްކުރަމުންދަނީ ކޯލިޝަނެއްގެ ތެރެއިން ކަމަށްވާތީއާއި، މިވަގުތު ވެރިކަން ކުރަމުންދަނީ އެ ޕާޓީގެ އުސޫލުތަކާއި ފިކުރާ އެއްގޮތް ޕާޓީއެއް ކަމުގައިވާ ޕީޕަލްސް ނޭޝަނަލް ކޮންގްރެސް (ޕީއެންސީ) ކަމަށްވެފައި، ގިނަ އަދަދެއްގެ މެންބަރުން ޕީއެންސީއާ ގުޅެމުންދާތީ، ވަކިން ސިޔާސީ ހަރަކާތެއް ކުރިއަށް ގެންދިއުމުގެ ބޭނުން ނުފެންނާތީ ކަމަށެވެ.
އިލެކްޝަންސް ކޮމިޝަނުން ބުނެފައިވަނީ، ސިޔާސީ ޕާޓީގެ ޤާނޫނުގެ 30 ވަނަ މާއްދާގެ (ހ)ގެ 2 ވަނަ ނަންބަރުގައިވާ ގޮތުގެމަތިން ޕީޕީއެމް އުވާލުމަށް އެ ޕާޓީގެ ސެނެޓުން ނިންމައި، ފުރިހަމަ ކުރަންޖެހޭ ކަންކަން ފުރިހަމަކޮށް ހުށަހަޅާފައިވާތީ، މިއަދުން ފެށިގެން އެ ޕާޓީ އުވާލާފައިވާ ކަމަށެވެ.
ޕީޕީއެމްއަކީ ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމް އިސްވެ ހުންނަވައިގެން 2011 ވަނަ އަހަރު އުފެއްދެވި ސިޔާސީ ޕާޓީއެކެވެ. މި ޕާޓީ ރަސްމީކޮށް ރަޖިސްޓްރީކުރެވުނީ 27 އޮކްޓޫބަރު 2011 ގައެވެ. އިލެކްޝަންސް ކޮމިޝަނުން ޕީޕީއެމް އުވާލިއިރު އެ ޕާޓީގެ ދަފްތަރުގައި މިދިޔަ އަހަރު ނިމުނުއިރު 12،174 މެންބަރުން ތިއްބެވެ.
މީގެއިތުރުން، ކުރީގެ ރައީސް މައުމޫން އަބްދުލްޤައްޔޫމް އިސްކޮށް ހުންނަވައިގެން އުފެއްދެވި މޯލްޑިވްސް ރިފޯމް މޫވްމަންޓް (އެމްއާރުއެމް) ވެސް އިލެކްޝަންސް ކޮމިޝަނުން ވަނީ އުވާލާފައެވެ. އެމްއާރުއެމް އުވާލީ ސިޔާސީ ޕާޓީގެ ޤާނޫނުގެ ދަށުން ސިޔާސީ ޕާޓީގައި ހަމަވާންޖެހޭ މެންބަރުންގެ އަދަދު ހަމަނުވާތީއެވެ.