ކުޅިވަރު
ޗެމްޕިއަންސް ލީގު: މެޑްރިޑާއި މެންޗެސްޓަރ ސިޓީ ހިމެނޭހެން ވަރުގަދަ ޓީމުތަކެއް ޕްލޭ-އޮފަށް

ލީގު ފޭސްގެ ފަހު މެޗުގައި މެންޗެސްޓަރ ސިޓީގެ ކުޅުންތެރިއަކު ގޯލު ކާމިޔާބު ކުރުމަށްފަހު އުފާފާޅުކުރަނީ، ފޮޓޯ: ގެޓީ
ހުލާސާ
ޕްލޭ-އޮފް ބުރަށް ދިޔަ ޔޫރަޕްގެ ވަރުގަދަ ނަންތަކުގެ ތެރޭގައި ޕީއެސްޖީ އާއި ޖުވެންޓަސް އަދި އެންމެ ފަހުން ޔޫރޮޕާ ލީގު ކާމިޔާބުކުރި އެޓަލާންޓާ ވެސް ހިމެނޭ.
ޔޫރަޕްގެ ވަރުގަދަ ގިނަ ޓީމުތަކަކަށް ޗެމްޕިއަންސް ލީގުގެ ލީގު-ފޭސްގެ ގަދަ އަށަކުން ފުރުސަތު ނުލިބި، ޕްލޭ-އޮފް ކުޅެންޖެހިއްޖެއެވެ.
ޗެމްޕިއަންސް ލީގު މި ސީޒަނުގައި އައު ފޯމެޓަކަށް ކުޅެމުންދާއިރު، ލީގު-ފޭސްގައި ކޮންމެ ޓީމެއް ހޯމް އެންޑް އަވޭ އުސޫލުން 8 މެޗު ކުޅެންޖެހެއެވެ. އޭގެ ތެރެއިން 4 މެޗު ހޯމްގައި ކުޅޭއިރު، އަނެއް 4 މެޗު ކުޅޭނީ އަވޭގައެވެ.
އަދި ޓީމުތަކުގެ ފެންވަރަށް ބަލައި 4 ޕޮޓަކަށް ސީޑުކޮށްގެން ގްރޫޕް-ފޭސްގެ މެޗުތައް ކަނޑައެޅިއިރު، ކޮންމެ ޓީމަކަށް ވެސް ހަތަރު ޕޮޓުގެ ދެ ޓީމަކާ ބައްދަލުކުރަން ޖެހެއެވެ. އެތަނުން އެއް ޓީމާ ހޯމްގައި ކުޅެންޖެހޭއިރު، އަނެއް ޓީމާ ކުޅުމަށް ދަތުރުކުރަން ޖެހޭނީ އެ ޓީމެއްގެ ދަނޑަށެވެ.
މީގެއިތުރުން ލީގު-ފޭސްގައި ޓީމުތައް ނެރޭ ނަތީޖާއަށް ބަލައި، ގަދަ 8 ޓީމު ދާނީ ސީދާ ނޮކް-އައުޓް ބުރަށެވެ. އަދި ޖެހިގެން އޮންނަ 16 ޓީމު ޖެހޭނީ، ހޯމް އެންޑް އަވޭ އުސޫލުން ޕްލޭ-އޮފް މެޗުތަކެއް ކުޅޭށެވެ. އެގޮތުން ލީގު ތާވަލުގައި 9-16 އާއި ދޭތެރޭ ހިމެނޭ ޓީމުތައް ބައްދަލުކުރާނީ 17-24 އާއި ދޭތެރޭގައި ހިމެނޭ ކޮންމެވެސް އެއް ޓީމަކާއެވެ.
ލީގު ބުރުގެ ފަހު މެޗުތައް ބުދަދުވަހުގެރޭ ކުޅުނުއިރު، ފާއިތުވި 10 އަހަރު ތެރޭގައި މި މުބާރާތް ކާމިޔާބުކުރި ކްލަބުތަކުގެ ތެރޭގައި ހިމެނޭ، އަދި ޗެމްޕިއަންސް ލީގު އެންމެ ގިނަ ފަހަރު ކާމިޔާބުކޮށްފައިވާ ރެއާލް މެޑްރިޑް ވެސް ޖެހެނީ ޕްލޭ-އޮފް މެޗް ކުޅޭށެވެ. އެ ޓީމު ލީގު-ފޭސްގައި ލިވަޕޫލް، އޭސީ މިލާން އަދި ލިލްއާ ދެކޮޅަށް ކުޅުނު މެޗުތަކުން ބަލިވެފައިވާއިރު، 15 ޕޮއިންޓާއެކު ލިބުނީ ތާވަލުގެ 11 ވަނައެވެ.
މީގެ އިތުރުން ބެޔާން މިއުނިކް ވެސް ވަނީ ތިން މެޗުން ބަލިވެފައެވެ. އަދި އެ ޓީމު އޮތީ މެޑްރިޑާ ޖެހިގެން 12 ވަނައިގައެވެ.
މި ސީޒަންގައި ފޯމު ގެއްލިފައިވާ މެންޗެސްޓަރ ސިޓީ ޕްލޭ-އޮފް ބުރަށް ލައްވާލީ ވެސް ކިރިޔާއެވެ. އެ ޓީމު 3 މެޗުން ބަލިވެ 2 މެޗުން އެއްވަރުވެފައިވާއިރު، ޕްލޭ-އޮފް ބުރަށް ލައްވާލީ ގޯލުގެ ތަފާތުންނެވެ.
ޕްލޭ-އޮފް ބުރަށް ދިޔަ ޔޫރަޕްގެ ވަރުގަދަ ނަންތަކުގެ ތެރޭގައި ޕީއެސްޖީ އާއި ޖުވެންޓަސް އަދި އެންމެ ފަހުން ޔޫރޮޕާ ލީގު ކާމިޔާބުކުރި އެޓަލާންޓާ ވެސް ހިމެނެއެވެ.
ލީގު-ފޭސް ނިމުނުއިރު ތާވަލުގެ އެއްވަނައިގައި އޮތީ، ލިވަޕޫލްއެވެ. އެ ޓީމުން މި ބުރުގައި ބަލިވީ، ބުރާސްފަތި ދުވަހުގެރޭ ކުޅުނު ގްރޫޕް-ފޭސްގެ ފަހު މެޗުގައި ޕީއެސްވީ އެންދޮވޭން އަތުން އެކަންޏެވެ. އެ މެޗުގައި އެ ޓީމުން ބޭނުންކޮށްފައިވަނީ މުޅިން އައު ޓީމެކެވެ.
ގިނަ ބަޔަކު ހައިރާންކޮށްލީ އެސްޓަން ވިލާ ވެސް ގަދަ-8 އިން ޖާގަ ހޯދުމުންނެވެ. އެ ޓީމު ވަނީ ގްރޫޕް-ފޭސްގައި ބެޔާން މިއުނިކް ބަލިކޮށްފައެވެ.