ޚަބަރު
ތިމާވެށި ހިމާޔަތްކުރަން ރޭންޖަރސް ތަމްރީނުކުރުމަށް ތިމާވެއްޓާއި ބެހޭ ވުޒާރާއާއި އެމްއެންޔޫ ސޮއިކޮށްފި

އެއްބަސްވުމުގައި ސޮއިކުރުމުގެ ރަސްމިއްޔާތު ފޮޓޯ:ވުޒާރާ
ރާއްޖޭގެ ތިމާވެށި ހިމާޔަތްކުރުމަށް ޚާއްޞަ ރޭންޖަރސް ތަމްރީނުކުރުމަށްޓަކައި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އާއި ދިވެހިރާއްޖޭގެ ޤައުމީ ޔުނިވަރސިޓީއާ ދެމެދު މިއަދު އެއްބަސްވުމެއްގައި ސޮއިކުރެވިއްޖެއެވެ. މި އެއްބަސްވުމުގެ ދަށުން ބޭސިކް ރޭންޖަރސް ޓްރެއިނިންގް ކޯހެއް ފަރުމާކޮށް، އެ ކޯހުގެ ތަމްރީނުތައް ދިނުމަށް ވަނީ އެއްބަސްވެފައެވެ.
އެމްއެންޔޫ ސެންޓްރަލް އެޑްމިނިސްޓްރޭޝަން ބިލްޑިންގްގައި ބޭއްވުނު ރަސްމިއްޔާތުގައި މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޑިރެކްޓަރ ޖެނެރަލް، މުޙައްމަދު ޒާހިރެވެ. އަދި ޤައުމީ ޔުނިވަރސިޓީގެ ފަރާތުން ސޮއިކުރެއްވީ ވައިސް ޗާންސެލަރ ޑރ. އައިޝަތް ޝެހެނާޒް އާދަމެވެ.
އެންދެރި މަޝްރޫޢުގެ ދަށުން ވެވުނު މި އެއްބަސްވުމުގެ މައިގަނޑު މަޤްޞަދަކީ ރާއްޖޭގެ ތިމާވެށްޓާއި، އިޖްތިމާޢީ އަދި އިދާރީ ހިންގުމުގެ ޚާއްޞަ ސިފަތަކަށް ބައްޓަންކޮށްގެން ކޯހެއް ފަރުމާކުރުމެވެ. މީގެ އިތުރުން، ތިމާވެށީގެ ގޮތުން ހިމާޔަތްކޮށްފައިވާ ސަރަޙައްދުތައް އެންމެ އެކަށޭނަ ގޮތެއްގައި ބެލެހެއްޓުމަށް ބޭނުންވާ މަޢުލޫމާތާއި ހުނަރު ހުރި ރޭންޖަރުންތަކެއް އުފެއްދުމަކީވެސް މި އެއްބަސްވުމުގެ މުހިންމު މަޤްޞަދެކެވެ.
ފުރަތަމަ ބުރު ލާމު އަތޮޅަށް ޚާއްޞަކޮށްގެން ހިންގާ މި ކޯހުގައި ތިމާވެށީގެ ސައިންސް، ތިމާވެށީގެ ޤާނޫނާއި ތަންފީޒީ މަސައްކަތް، އިޖްތިމާޢީ ބައިވެރިވުން އިތުރުކުރުމާއި ހޭލުންތެރިކަން އިތުރުކުރުން، އަސާސީ ކޮމްޕިއުޓަރުގެ މަސައްކަތް އަދި ނިޔަމިކަމުގެ މާއްދާތައް ހިމެނޭނެއެވެ. މި ކޯސް ފުރިހަމަކުރާ ފަރާތްތަކަށް ނިޔަމި 2 ކޯހުގެ ސެޓްފިކެޓް ލިބޭނެކަން ވެސް ފާހަގަކޮށްފައިވެއެވެ.
މި ރަސްމިއްޔާތުގައި ކްލައިމެޓް ޗޭންޖް މިނިސްޓްރީއާއި ޤައުމީ ޔުނިވަރސިޓީއާއި ޔުނިވަރސިޓީގެ ދަށުން ހިންގާ ކޮލެޖް ފެކަލްޓީތަކުގެ އިސްވެރިން ބައިވެރިވެވަޑައިގެންނެވިއެވެ.