ޚަބަރު
ހަންކެޑެ ބްރިޖް ހުޅުވުމާއެކު އައްޑޫގެ ޓްރެފިކް ފްލޯއަށް ބޮޑެތި ބަދަލުތަކެއް

އައްޑޫ ސިޓީ ހަންކެޑެ ބްރިޖް ފޮޓޯ:އައްޑޫސިޓީ ކައުންސިލް
އައްޑޫ ސިޓީގެ ހިތަދޫއާއި މަރަދޫ ގުޅުވައިދޭ ހަންކެޑެ ބްރިޖް އާންމު ދަތުރުފަތުރަށް ހުޅުވާލުމާ ގުޅިގެން، އެ ސަރަހައްދުގެ ޓްރެފިކް ފްލޯއަށް ބޮޑެތި ބަދަލުތަކެއް އަންނާނެކަމަށް އައްޑޫ ސިޓީ ކައުންސިލުން ހާމަކޮށްފިއެވެ.
އައްޑޫ ސިޓީ ކައުންސިލުން ގެންނަ ބަދަލުތަކުގެ ތެރޭގައި، މިހާރު ބޭނުންކުރަމުންދާ ހަންކެޑެ ލިންކް ރޯޑް މަރަދޫއާ ގުޅޭ ހިސާބުން ބަންދުކުރުން ހިމެނެއެވެ. މިއާއެކު، މިހާރު ބޭނުންކުރަމުންދާ ލިންކް ރޯޑް އާންމު ދަތުރުފަތުރަށް މުޅިން ބަންދުވާނެއެވެ. މީގެ އިތުރުން، ބައެއް މަގުތައް ވަން-ވޭ މަގުތަކުގެ ގޮތުގައި ބަދަލުކުރުމާއި، މަގުތަކުގައި ޕާކުކުރާ އުސޫލުތަކަށްވެސް ބަދަލު ގެނެވޭނެއެވެ.
ޓްރެފިކަށް ގެންނަ މި ބަދަލުތަކުގެ ތަފްސީލު، އައްޑޫ ސިޓީ ކައުންސިލުން ވަނީ އެ ކައުންސިލްގެ ސޯޝަލް މީޑިއާ ޕޭޖުތަކާއި ގެޒެޓުގައި ޝާއިޢުކޮށްފައެވެ.
އިޢުލާން - އައްޑޫސިޓީ ހަންކެޑެ ބުރިޖް ސަރަހައްދުގެ ޓްރެފިކް ފްލޯ މެނޭޖްކުރުމާއި ގުޅޭhttps://t.co/jjONRGHCvRhttps://t.co/wILeuYryj1 pic.twitter.com/4MLTszMY54
— Addu City Council (@AdduCityCouncil) January 30, 2025
1.4 ކިލޯމީޓަރުގެ މި ބްރިޖަކީ 4 ލޭނަށް ތަރައްޤީކުރެވިފައިވާ ބްރިޖެކެވެ. މި ބްރިޖުގެ ޢަމަލީ މަސައްކަތް ފެށުނީ 2021 ވަނަ އަހަރުގެ އޮކްޓޯބަރު މަހުއެވެ. ޕްރޮޖެކްޓް ކުރިއަށް ގެންދިޔަ އެފްކޮންސްއިން މަސައްކަތް ނިންމައި ދިވެހި ސަރުކާރާ ހަވާލުކުރީ މިދިޔަ އަހަރުގެ އޮގަސްޓް މަހުއެވެ.
މަގު އާންމު ދަތުރުފަތުރަށް ހުޅުވާލުން ލަސްވެފައިވަނީ އިތުރު ބައެއް ޓެކްނިކަލް ސަރވޭތައް ކުރިއަށް ގެންދަން ޖެހުމުގެ ސަބަބުންކަމަށް އިމާރާތްކުރުމާ ބެހޭ ވުޒާރާއިން ކުރިން ހާމަކޮށްފައިވެއެވެ.
އައްޑޫ ބްރިޖުގެ މަސައްކަތް ކުރިއަށް ގެންގޮސްފައިވަނީ އެ ސިޓީގެ މަގު ހެދުމަށް ކުރިއަށްގެންދާ 1 ބިލިއަން ރުފިޔާގެ ބިޔަ މަޝްރޫޢާ އެކުގައެވެ. މި ބްރިޖް ހުޅުވުމުން އައްޑޫ ސިޓީގެ ދަތުރުފަތުރުގެ ނިޒާމަށް ބޮޑު ލުޔެއް ލިބި، ރައްޔިތުންނަށް ފަސޭހަކަމާއެކު ދަތުރުފަތުރު ކުރެވޭނެއެވެ.