ދުނިޔެ
ޢައްޒާގެ ދެ އަހަރުގެ ކުޑަކުއްޖަކު ފަރުވާއަށް ބޭރަށް ގެންދިއުމަށް ހުއްދަ ނުލިބި މަރާ ހަނގުރާމަކުރަނީ

ހަބީބާ އަލް-އަސްކަރީ ފޮޓޯ:ސީއެންއެން
ޢައްޒާގައި ދިރިއުޅޭ ދެ އަހަރުގެ ކުޑަކުއްޖެއް ކަމަށްވާ ހަބީބާ އަލް-އަސްކަރީގެ ފުރާނައަށް ނުރައްކާވެފައިވާކަމަށް ޑޮކްޓަރުން ބުނެފިއެވެ. އޭނާގެ އަތްތަކާއި ފައިތަކުގައި ގޭންގްރީން ޖެހި، އަވަހަށް ބޭސްފަރުވާއަށް ބޭރަށް ނުގެންގޮސްފިނަމަ މަރުވެދާނެކަމުގެ ބިރު އޮތްކަމަށް ޑޮކްޓަރުން ވަނީ ބުނެފައެވެ.
ހަބީބާއަށް ވަނީ ލޭ ގަނޑުވުމުގެ ސަބަބުން ލޭ ދައުރުވުން ހުއްޓި، މަރުވުމަށް މަގުފަހިވާ ވަރަށް މަދުން ޖެހޭ ބައްޔެއް ޖެހިފައެވެ. މި ބައްޔަކީ ފަސޭހައިން ފަރުވާ ކުރެވޭނެ ބައްޔެއް ނަމަވެސް، އިޒްރޭލުގެ ހަނގުރާމައިގެ ސަބަބުން ގާޒާގެ ސިއްހީ ނިޒާމު ވީރާނާވެފައިވާތީ، އެތާނގައި މި ބައްޔަށް ފަރުވާ ކުރުމަކީ ދަތިކަމެކެވެ.
މި މަހުގެ ކުރީކޮޅު، ބައިނަލްއަޤްވާމީ އެހީދޭ ޖަމާއަތްތަކުން ވަނީ ހަބީބާ ގާޒާއިން ބޭރަށް ގެންދިއުމަށް އިޒްރޭލުގެ އިދާރާތަކުގެ ހުއްދަ ހޯދުމަށް މަސައްކަތްކޮށްފައެވެ. އަދި ހަބީބާ ގާޒާއިން ބޭރަށް ގެންދިއުމަށް ރަސްމީ ހުއްދަ ލިބުނު ކަމަށް އިޒްރޭލުގެ ކޯގެޓް އިދާރާއިން ބުނެފައިވެއެވެ. އަދި ޖޯޑަނުގެ އިދާރާތަކުން ވެސް އޭނާ އައްމާނަށް ގެންގޮސް ފަރުވާ ދިނުމަށް ތައްޔާރުވެފައިވާ ކަމަށް ބުނެފައިވެއެވެ.
ނަމަވެސް، އެންމެ ފަހު ވަގުތު އިޒްރޭލުގެ އިދާރާތަކުން މި މިޝަން ލަސްކޮށްލި ކަމަށް ޖޯޑަނުގެ އިދާރާތަކުން ސީއެންއެންއަށް މައުލޫމާތު ދީފައިވެއެވެ. މިއީ ހަބީބާގެ އާއިލާއާއި ޑޮކްޓަރުންނަށް ލިބުނު ވަރަށް ބޮޑު ހިތްދަތިކަމެކެވެ. މިހާރު ހަބީބާ ވަނީ ގެއަށް ދޫކޮށްލެވި، އޭނާގެ ހާލަތު ގަޑިއަކުން ގަޑިއަކަށް ގޯސްވަމުންދާ ކަމަށް ބުނެފައެވެ.
"ހަބީބާގެ ފުރާނައަށް މިހާރު ވަރަށް ބޮޑަށް ނުރައްކާވެފައި," ހަބީބާގެ މަންމަ ރަނާ ކަރުނަ އޮއްސަމުން ސީއެންއެންއަށް ބުނެފައިވެއެވެ.
އޭނާއަށް ބޭސްފަރުވާ ހޯދުމަށް ބޭރަށް ދިއުމުގެ ހުއްދަ ނުދޭ ސަބަބެއް އަހަރެންނަކަށް ނޭނގޭ. އޭނާ ކުރި ކުށަކީ ކޮބައިތޯ؟
ކުއްޖާގެ މަންމަ
ޢައްޒާގައި ކުއްލި ބޭސްފަރުވާއަށް ބޭނުންވާ މަދުވެގެން 2,500 ކުޑަކުދިން ތިބިކަމަށް އދ. އިން ބުނެފައިވެއެވެ.
ފާއިތުވި ދެ ހަފްތާގައި ޢައްޒާއިން އެއްވެސް މީހަކު ބޭސްފަރުވާއަށް ބޭރަށް ގެންގޮސްފައެއް ނުވެއެވެ. އެންމެ ފަހުން މީހުން ބޭރަށް ގެންދިޔައީ ޖަނަވަރީ 16 ގައި ކަމަށާއި، އެ ދުވަހު އެންމެ 12 ބަލިމީހުން ޔޫރަޕުގެ ގައުމުތަކަށް ގެންދިޔަ ކަމަށް ދުނިޔޭގެ ސިއްހަތު ޖަމްއިއްޔާއިން ބުނެފައިވެއެވެ. އދ. އިން ބުނާ ގޮތުގައި މިހާރުވެސް ޢައްޒާގައި ގާތްގަނޑަކަށް 12,000 މީހުން ބޭސްފަރުވާއަށް ބޭރަށް ދިއުމަށް އިންތިޒާރު ކުރަމުންދެއެވެ.