ރަމަޟާން މަހަށް ތައްޔާރުވުމުގެ ގޮތުން "ފަޔަރ ޕްރިވެންޝަން ވީކް 2025" ފަށައިފި

އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ކުރިއަށް ގެންދާ "ފަޔަރ ޕްރިވެންޝަން ވީކް 2025"  ފަށައިފިއެވެ. މި ހަރަކާތަކީ ކުރިއަށް އޮތް ރަމަޟާން މަހާ ދިމާކޮށް، އަލިފާނުގެ ހާދިސާތަކުން ރައްކާތެރިވުމަށް ހޭލުންތެރިކަން އިތުރުކުރުމުގެ ގޮތުން ކުރިއަށް ގެންދާ ޚާއްޞަ ހަރަކާތެކެވެ.

މިއަދު ފެށުނު މި ހަރަކާތުގެ ފުރަތަމަ ދުވަހު، އަމީނިއްޔާ ސްކޫލުގައި ދެ ދަންފަޅިއަކަށް ބަހާލައިގެން ކުރިއަށް ގެންދިޔަ އިވެންޓުގައި 580 އަށް ވުރެ ގިނަ ދަރިވަރުން ބައިވެރިވިއެވެ. މި އިވެންޓް ޚާއްޞަކޮށްފައިވަނީ މާލޭގެ ސްކޫލުތަކުގައި ކިޔަވާ  ދަރިވަރުންނަށެވެ.

"ފަޔަރ ޕްރިވެންޝަން ވީކް" ގައި ކައްކާ ގޭހާއި، ކަރަންޓުގެ ސަބަބުން ދިމާވެދާނެ އަލިފާނުގެ ހާދިސާތަކާއި، އަލިފާންނިވި ބޭނުންކުރާނެ ގޮތްތަކާއި، އަލިފާނުގެ ހާދިސާއެއް ދިމާވެއްޖެނަމަ ޢަމަލުކުރާނެ ގޮތްތަކާ ބެހޭ މަޢުލޫމާތު ހިއްސާކުރެވޭނެއެވެ.

މި އަހަރުގެ ޖަނަވަރީ 30 އިން ފެބުރުވަރީ 7 އަށް ކުރިއަށްދާ މި ހަރަކާތް، ގްރޭޓަރ މާލެ އޭރިއާގެ އިތުރުން އެމްއެންޑީއެފްގެ އެހެން އޭރިއާ ކޮމާންޑްތަކުގައިވެސް ކުރިއަށް ގެންދިއުމަށް ވަނީ ހަމަޖެހިފައެވެ. މާލެ ސަރަހައްދުގައި މި ހަރަކާތްތައް ހިންގުމަށް ހަމަޖެހިފައިވަނީ މިނިސްޓްރީ އޮފް އެޑިޔުކޭޝަނާއި، މާލޭ ސްކޫލުތަކާއި، މާލޭ ސިޓީ ކައުންސިލް އަދި އެހެނިހެން މުއައްސަސާތަކާ ގުޅިގެންނެވެ.

ހިނގާފާނެ އަލިފާނުގެ ހާދިސާތަކުން ރައްކާތެރިވުމަށް ހޭލުންތެރިކަން އިތުރުކުރުމަށް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން "ފަޔަރ ޕްރިވެންޝަން ވީކް 2025" ފަށައިފި.https://t.co/uM2J4dOH2t pic.twitter.com/eArcL5LeyV

— Maldives National Defence Force (@MNDF_Official) January 31, 2025

ގްރޭޓަރ މާލެ އޭރިއާގައި މި ހަރަކާތްތައް ކުރިއަށް ގެންދިއުމަށް ހަމަޖެހިފައިވަނީ އަމީނިއްޔާ ސްކޫލު، ހުޅުމާލޭ ފޭސް 2 ހިޔާ ސަރަހައްދު، މުޙްޔިއްދީން ސްކޫލު، ޢާޒީ ސްކޫލު، ތިލަފުށީ ބަނދަރު ސަރަހައްދު، ރަސްފަންނު އަދި ހުޅުމާލެ ރުއްގަނޑު 1 ސަރަހައްދުގައެވެ.