ޖަޕާނުގައި އުފެދުނު ސިންކް ހޯލްއަށް ވެއްޓުނު ޓްރަކް ޑްރައިވަރު ސަލާމަތްކުރުމުގެ މަސައްކަތް ކުރަނީ

ޖަޕާނުގެ ވެރިރަށް ޓޯކިޔޯ އާއި ކައިރި ސައިތަމާ ޕްރިފެކްޗަރގައި މަގެއްގެ މެދުތެރެއިން ސިންކް ހޯލެއް އުފެދި، އެތަނަށް ވެއްޓުނު ޓްރަކެއްގެ ޑްރައިވަރު ސަލާމަތްކުރުމުގެ މަސައްކަތް ކުރާތާ މިއަދަށްމިއީ ހަތަރުވަނަ ދުވަސް ކަމަށް ޖަޕާނުގެ އިދާރާތަކުން މައުލޫމާތު ދީފިއެވެ.

މިދިޔަ އަންގާރަ ދުވަހު ޓޯކިޔޯ އާއި 29 ކިލޯމީޓަރު އުތުރުގައި އޮންނަ ސައިތަމާ ޕްރިފެކްޗަރގެ މަގެއްގެ މެދުތެރެއިން ސިންކް ހޯލެއް އުފެދި، އެތަނަށް ވެއްޓުނު ތިން ޓަނުގެ ޓްރަކެއްގެ 74 އަހަރުގެ ޑްރައިވަރު ސަލާމަތްކުރުމުގެ މަސައްކަތް ކުރާތާ މިހާރު ވަނީ ހަތަރުވަނަ ދުވަހަށް ވެފައެވެ. މި ހާދިސާ ހިނގިތަނުގަ އުފެދުނު ސިންކް ހޯލް މިހާރުވަނީ 40 މީޓަރަށް ފުޅާވެފައެވެ. މިއީ ފުރަތަމަ ސިންކް ހޯލް އުފެދުނުއިރު އޮތް ސައިޒުގެ ހަތަރު ގުނައެވެ.

ސައިތަމާ ޕްރިފެކްޗަރގެ ނަރުދަމާ މަސައްކަތްތަކުގެ ޑިވިޝަނުގެ އޮފިޝަލެއް ސީއެންއެންއަށް ވިދާޅުވި ގޮތުގައި ހޯޯލްގެ އެތެރެއިން ވެލި ފައިބަމުންދާތީ ކޮންމެ ދުވަހަކު ހޯލް ބޮޑުވަމުންދެއެވެ. އަދި ޓްރަކް ނެގުމަށް ކްރޭން ބޭނުންކޮށްގެން މަސައްކަތް ކުރި ނަމަވެސް، އަންގާރަ ދުވަހުން ފެށިގެން ޑްރައިވަރާ މުއާމަލާތް ކުރެވިފައެއް ނުވެއެވެ.

އޮފިޝަލުން ގަބޫލުކުރާ ގޮތުގައި ނަރުދަމާ ހޮޅިތައް ދަބަރުޖެހި ހަލާކުވުމުގެ ސަބަބުން ބިންގަނޑު ވެއްޓިފައި ވާ ކަމަށް ބެލެވެއެވެ. އަދި ނަޖިސްފެން ލީކުވުމުގެ ސަބަބުން ވަށައިގެންވާ ވެލި ފައިބައި، ހޯލް އިތުރަށް ބޮޑުވެފައިވާ ކަމަށް ވެސް ބެލެވެއެވެ.

މި ހާދިސާއާ ގުޅިގެން އަންގާރަ ދުވަހުން ފެށިގެން 200 ގޭބިސީއަށް ސަރަހައްދު ދޫކޮށް ދިއުމަށް އަންގާފައިވެއެވެ. އަދި 1.2 މިލިއަން މީހުންނަށް ފެންވަރުމާއި ދޮވެ އިސްތިރިކުރުން މަދުކުރުމަށް އެދިފައިވެއެވެ. މިއީ ނަޖިސްފެން މަދުކޮށް، ސަލާމަތްކުރުމުގެ މަސައްކަތަށް ފަސޭހަކުރުމަށް ކަމަށް ބުނެފައިވެއެވެ.

މި ހާދިސާއާ ގުޅިގެން ޖަޕާނުގެ ބިމާއި، އުމްރާނީ ތަރައްގީ އަދި ދަތުރުފަތުރުގެ މިނިސްޓްރީން ބުނެފައިވަނީ ސައިތަމާ އާއި އިތުރު ހަ ޕްރިފެކްޗަރއެއްގައި ހުރި މިފަދަ ނަރުދަމާ ހޮޅިތައް ކުއްލި ގޮތަކަށް ބަލައި ފާސްކުރުމަށް އަންގާފައިވާ ކަމަށެވެ. މި ހަތް ޕްރިފެކްޗަރގައި ދިރިއުޅެނީ 39 މިލިއަން މީހުންނެވެ.