ރެކޯޑު އަގެއްގައި ވިއްކާލި އައިސެކް ނިއުޓަންގެ ދަތުން ހެދީ އަނގޮޓިއެއް

މިދިޔަ 200 އަހަރު ކުރިން ލަންޑަނުގައި ވިއްކާލެވުނު ދަތަކުން ދުނިޔޭގެ އެންމެ އަގުބޮޑު ދަތުގެ ރެކޯޑު ހަދައިފިއެވެ. މި ދަތަކީ މަޝްހޫރު ސައިންޓިސްޓް ސަރ އައިސެކް ނިއުޓަންގެ ދަތެކެވެ.

1816 ވަނަ އަހަރު ލަންޑަނުގައި ވިއްކާލެވުނު މި ދަތުގެ އަގަކީ 3,633 އެމެރިކާ ޑޮލަރެވެ. މިއަދުގެ އަގުން ބަލާއިރު މިއީ 35,700 އެމެރިކާ ޑޮލަރެވެ. މި ދަތް ގަތް މީހާ މި ދަތްވަނީ އަނގޮޓިއެއްގައި ހަރުކޮށްފައިވާ ކަމަށް ބުނެވެއެވެ. ގިނަސް ވޯލްޑް ރެކޯޑްސްއިން މިއީ މިހާތަނަށް ވިއްކާލެވުނު އެންމެ އަގުބޮޑު ދަތް ކަމަށް ވަނީ ރަސްމީކޮށް ނިންމާފައެވެ.

ސަރ އައިސެކް ނިއުޓަނަކީ ތާރީޚުގައި އެންމެ ނުފޫޒު ގަދަ ސައިންޓިސްޓުންގެ ތެރެއިން އެކެކެވެ. އޭނާ 1726 ގައި މަރުވިއިރު، ދުނިޔޭގެ ޤުދުރަތީ ކަންކަން ދެނެގަތުމަށް އިންޤިލާބީ ބަދަލުތަކެއް ގެނެސްދިން ތަރިކައެއް ދޫކޮށްފައެވެ. 

1666 ވަނަ އަހަރު ވޫލްސްތޯޕް މެނަރގައި ހުރި އޭނާގެ ގޯތިތެރޭގެ ގަހަކުން ވެއްޓުނު އާފަލެއް ފެނުމުން ގްރެވިޓީ ހޯދުނު ކަމަށް  ބުނެވެއެވެ. އާފަލް ވެއްޓުމަށް މެދުވެރިވި ބާރަކީ ހަނދު ބިމުގެ ވަށައިގެން ދައުރުވުމަށާއި އެހެނިހެން ގުރަހަތައް އިރުގެ ވަށައިގެން ދައުރުވުމަށްވެސް މެދުވެރިވާ ބާރުކަން އޭނާއަށް ވިސްނުނެވެ. މީގެ އިތުރުން، ކެލްކިއުލަސް އީޖާދުކުރުމާއި، އެންމެ ފުރަތަމަ ޢަމަލީގޮތުން ބޭނުންކުރެވޭ ރިފްލެކްޓިންގ ޓެލެސްކޯޕް އުފެއްދުމާއި، އަލީގެ ނަޒަރިއްޔާއެއް ތަރައްޤީކުރުމުންވެސް އޭނާ މަޝްހޫރުވެފައިވެއެވެ.