Ads by Exprox

ޚަބަރު

މިސްކިތްތަކުގައި ފަންޑުފޮށި ބަހައްޓައިގެން ފަންޑު ހޯދުން ރެގިއުލޭޓްކުރަން ނިންމައިފި

މިސްކިތްތަކުގައި ފަންޑުފޮށި ބަހައްޓައިގެން ފަންޑު ހޯދުން ރެގިއުލޭޓްކުރަން ނިންމައިފި

ކިންގް ސަލްމާން މިސްކިތް---

މިފްތާޙް މުޙައްމަދު

މިފްތާޙް މުޙައްމަދު

01 ފެބްރުއަރީ 2025، 09:02

01 ފެބްރުއަރީ 2025، 09:02

ހުލާސާ

މި އުސޫލާއެކު ފަންޑު ފޮށި ބެހެއްޓުމުގެ ޙުއްދައަށް އެދެވޭނީ ޚަރަދުކުރާނެ ގޮތުގެ ތަފްސީލާއެކު.

ޙުއްދަ ތަކުރާރު ކުރެވޭނީ، ޚަރަދުކުރިގޮތުގެ ތަފްޞީލާއި އޮޑިޓް ރިޕޯޓް ހުށަހެޅުމުން.

މިސްކިތްތަކުގައި ފަންޑުފޮށި ބަހައްޓައިގެން ފަންޑު ހޯދުމުގެ ކަންތައް ރެގިއުލޭޓްކުރަން ނިންމާފައިވާކަމަށް، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ، މިކަމާ ގުޅިގެން ސޯޝަލް މީޑިއާގައި ކުރެއްވެވި ޕޯސްޓެއްގައެވެ.

ވަޒީރު ވިދާޅުވީ، މިސްކިތްތަކުގައި އެކިއެކި ޖަމްޢިއްޔާ ޖަމާޢަތްތަކުން ފަންޑު ފޮށި ބަހައްޓައިގެން ފަނޑު ހޯދުން އިތުރުވެފައިވާ ކަމަށާއި، އެހެންކަމުން މިކަން ވަކިގޮތަކަށް ރެގިއުލޭޓްކުރުން މުހިންމު ކަމަށެވެ.

އެގޮތުން، މިކަން ރެގިއުލޭޓްކުރުމަށް ނިންމާފައިވަނީ ދީނީ އެއްބައިވަންތަކަން ހިމާޔަތްކުރުމުގެ ޤާނޫނާއި ޤަވާއިދުގެ ތެރެއިންކަމަށް ވެސް ވަޒީރުވަނީ ވިދާޅުވެފައެވެ. އަދި އެ މަނިކުފާނު އެ ވިދާޅުވާ ގޮތަށް އިސްލާހު ގެނައުމަށްފަހު، ދެން ފަންޑު ފޮށި ބެހެއްޓުމުގެ ޙުއްދައަށް އެދެވޭނީ، ފަންޑުފޮށި ބަހައްޓައިގެން ހޯދާ ފައިދާ ޚަރަދުކުރާނެ ގޮތުގެ ތަފްސީލު ޙިއްސާކުރުމުންކަމަށް ހާމަކޮށްފައިިވެއެވެ.

މީގެ އިތުރުން، ދެވަނަ ފަހަރަކަށް މި ޙުއްދަ ހޯދުމަށް ހުށަހެޅޭނީ، ފުރަތަމަ ފަހަރު ހޯދި ފައިސާ ޚަރަދުކުރިގޮތުގެ އޮޑިޓް ރިޕޯޓު ހުށަހެޅުމުންކަމަށް ވެސް ވަޒީރު ވަނީ ވިދާޅުވެފައެވެ.

މިގޮތަށް ހުއްދަދެވޭނީ ހޯދާ ފައިސާ ޚަރަދުކުރާނެ ގޮތުގެ ތަފްސީލު ހުށަހެޅުމުން. އަދި ހުއްދަ ތަކުރާރު ކުރެވޭނީ ޚަރަދުކުރިގޮތުގެ ތަފްޞީލާއި އޮޑިޓް ރިޕޯޓް ހުށަހެޅުމުން ކަމުގައި ވެސް އުޞޫލުގައި ބަޔާންވާނެ.

ވަޒީރު ވިދާޅުވިއެވެ.

މިސްކިތްތަކުގައި ފަންޑު ފޮށި ބަހައްޓައިގެން އާންމު ގޮތެއްގައި ފަންޑު ހޯދަމުން އަންނަނީ ދީނީ ހަރަކާތްތައް ބޭއްވުމަށެވެ. އަދި މި ވޭތުވެދިޔަ އަހަރެއްހާ ދުވަހުގެ ތެރޭގައި، ޙާލުގައިޖެހިފައިވާ ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން ވެސް، މިސްކިތްތަކުގައި ފަނޑު ފޮށި ބަހައްޓައިގެން ފަންޑު ހޯދާފައިވާކަން ފާހަގަކޮށްލެވެއެވެ. 

މި ލިޔުން ކިޔާލުމުން

Ads by MSS