އައްޑޫ ހަންކެޑެ ލިންކް ރޯޑު އާންމުންނަށް ހުޅުވާލައިފި

އައްޑޫ ސިޓީގެ ހިތަދޫއާއި މަރަދޫ ގުޅުވައިދޭ  ހަންކެޑެ ލިންކް ރޯޑު އާންމުންނަށް ހުޅުވާލައިފިއެވެ. މި ލިންކު ރޯޑު އާންމުންނަށް ހުޅުވާލާފައިވަނީ، ރޭގެ 12:00އިން ފެށިގެންނެވެ.

މި ލިންކް ރޯޑަކީ، އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓް ފެސިލިޓީގެ ދަށުން އައްޑޫގައި ކުރިއަށް ގެންދާ ރޯޑް އެންޑް ސްޓޯމް ވޯޓަރ ޑްރެއިނޭޖް ޑިވެލޮޕްމަންޓް ޕްރޮޖެކްޓްގައި ހިމެނޭ މަސައްކަތެކެވެ. 

ދިގުމިނުގައި 1.4 ކިލޯމީޓަރުގެ ހުންނަ މި ލިންކު ރޯޑަކީ 4 ލޭނަށް ތަރައްޤީކުރެވިފައިވާ މަގެކެވެ. މި މަގުގެ ޢަމަލީ މަސައްކަތް ފެށީ 2021 ވަނަ އަހަރުގެ އޮކްޓޯބަރު މަހުއެވެ. އަދި ޕްރޮޖެކްޓް ކުރިއަށް ގެންދިޔަ އެފްކޮންސްއިން މަސައްކަތް ނިންމައި ދިވެހި ސަރުކާރާ ހަވާލުކުރީ މިދިޔަ އަހަރުގެ އޮގަސްޓް މަހުއެވެ.

މަގު ހަވާލުކުރިތާ ގިނަ ދުވަސްތަކެއްވެފައިވީ ނަމަވެސް، މަގު އާންމު ދަތުރުފަތުރަށް ހުޅުވާލުން ލަސްވެފައިވަނީ އިތުރު ބައެއް ޓެކްނިކަލް ސަރވޭތައް ކުރިއަށް ގެންދަން ޖެހުމުގެ ސަބަބުންކަމަށް އިމާރާތްކުރުމާ ބެހޭ ވުޒާރާއިން ކުރިން ހާމަކޮށްފައިވެއެވެ.

މި މަގު ހުޅުވުމާގުޅިގެން އައްޑޫ ސިޓީ ކައުންސިލުން  ވަނީ އެ ސަރަޙައްދުގެ ޓްރެފިކް ފްލޯއަށް ބޮޑެތި ބަދަލުތަކެއް ގެނަސްފައެވެ. އޭގެ ތެރޭގައި، މިހާރު ބޭނުންކުރަމުންދާ ހަންކެޑެ ލިންކް ރޯޑް މަރަދޫއާ ގުޅޭ ހިސާބުން ބަންދުކުރުމާއި، ކުރިން ބޭނުންކުރަމުންދިޔަ ލިންކް ރޯޑް އާންމު ދަތުރުފަތުރަށް މުޅިން ބަންދުވާނެއެވެ. މީގެ އިތުރުން، ބައެއް މަގުތައް ވަން-ވޭ މަގުތަކުގެ ގޮތުގައި ބަދަލުކުރުމާއި، މަގުތަކުގައި ޕާކުކުރާ އުސޫލުތަކަށްވެސް ވަނީ ބަދަލުގެނަސްފައެވެ.

ހަންކެޑެ ލިންކް ރޯޑުގެ މަސައްކަތް ކުރިއަށް ގެންގޮސްފައިވަނީ އެ ސިޓީގެ މަގު ހެދުމަށް ކުރިއަށްގެންދާ 1 ބިލިއަން ރުފިޔާގެ ބިޔަ މަޝްރޫޢާ އެކުގައެވެ. މި ބްރިޖް ހުޅުވުމުން އައްޑޫ ސިޓީގެ ދަތުރުފަތުރުގެ ނިޒާމަށް ބޮޑު ލުޔެއް ލިބި، ރައްޔިތުންނަށް ފަސޭހަކަމާއެކު ދަތުރުފަތުރު ކުރެވޭނެއެވެ.