މިނިސްޓްރީގެ ޙުއްދަ ނެތި ތިނަދޫ ސިޓީ ކައުންސިލުން ހައުސިން ޔުނިޓުތަކަކަށް ކުރިމަތިލުމަށް ކުރި އިޢުލާން ބާޠިލްކުރަން އަންގައިފި

މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ޙުއްދަ ނެތި ތިނަދޫގައި އިމާރާތްކުރަމުންދާ 200 ހައުސިން ޔުނިޓަށް އެދި ހުށަހެޅުމަށް، އެ ސިޓީގެ ކައުންސިލުން ކުރި އިޢުލާން ބާޠިލްކުރުމަށް މިނިސްޓްރީން އަންގައިފިއެވެ.

މި ނޫހަށް މަޢުލޫމާތު ލިބިފައިވާ ގޮތުގައި، މިނިސްޓްރީން މި އެންގުން އަންގާފައިވަނީ ބުރާސްފަތި ދުވަހުއެވެ.

މި މައްސަލައާ ގުޅިގެން މިނިސްޓްރީން ހާމަކޮށްފައިވާ ގޮތުގައި، ރާއްޖޭގެ އެކި ސަރަޙައްދުތަކުގައި އިމާރާތްކުރުމަށް ހަވާލުކުރެވޭ ހައުސިންގް ޔުނިޓުތައް ހަވާލުކުރެވެމުން ދަނީ މިނިސްޓްރީން އެންޑޯޒްކޮށް ޙުއްދަދޭ އުސޫލަކާއި އެއްގޮތަށެވެ. 

އެގޮތުން، އެ ސިޓީގައި އިމާރާތްކުރަމުންދާ ހައުސިންގް ޔުނިޓުތައް ދޫކުރުމަށް އިޢުލާންކުރުމުގެ ކުރިން އެ ހައުސިންގް ޔުނިޓުތައް ދެވޭނެ އުސޫލު ފައިނަލްކުރުމާއި އެޕްލިކޭޝަންގެ މަރުހަލާ ކުރިޔަށް ގެންދަންޖެހޭނީ މިނިސްޓްރީގެ ޙުއްދައާއެކުކަމަށް ވެސް އަންގާފައިވެއެވެ. 

ނަމަވެސް، އެ ކައުންސިލުން މިނިސްޓްރީގެ ޙުއްދަ ހޯދުމަކާނުލައި، މި 200 ހައުސިންގް ޔުނިޓަށް ކުރިމަތިލުމަށް 29 ޖެނުއަރީ 2025ގައި އިޢުލާންކޮށްފައިވާކަމަށް މިނިސްޓްރީން އެނގިފައިވާކަމަށް ހާމަކޮށްފައިވެއެވެ.

އެހެންކަމުން، އެ އިޢުލާން ބާޠިލްކޮށް، ހައުސިންގް ޔުނިޓުތައް ލިބޭފަރާތްތައް ހޯދުމަށް އިޢުލާންކުރުމަށް ބޭނުންވާ އުސޫލު އެންޑޯޒްކުރުމަށް މިނިސްޓްރީއަށް ފޮނުވުމަށާއި، އެ ހައުސިންގް ޔުނިޓުތައް ކުރިޔަށް ގެންދަންޖެހޭނީ މިނިސްޓްރީގެ އިރުޝާދުގެ ދަށުންކަމަށް ވެސް ތިނަދޫ ސިޓީ ކައުންސިލަށް ވަނީ އަންގާފައެވެ.

ސަރުކާރުން އިމާރާތްކުރާ ހައުސިންގް ޔުނިޓުތައް އިމާރާތްކުރުމާއި އެ ތަންތަން އެކިފަރާތްތަކަށް ދޫކުރުމުގެ މަސައްކަތް ކުރުމާއި ވިލަރެސްކުރުމުގެ މަސައްކަތް ހިމަނާފައިވަނީ މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގައެވެ.