މަސްދޯނިތަކުން މި އަހަރު 80 ފަޅުވެރިއަކު "ރެސްކިއު ޑައިވަރ" ކޯސް ފުރިހަމަކުރާނެ: މިނިސްޓަރ ޝިޔާމް

ރާއްޖޭގައި މަސްވެރިކަންކުރާ ކޮންމެ ދޯންޏެއްގައި މަދުވެގެން އެއް ފަޅުވެރިޔަކު "ރެސްކިއު ޑައިވަރ" ފެންވަރުގެ ސަނަދެއް ހާސިލްކޮށްފައިވާ ފަރާތަކަށް ހެދުމަށް، މިނިސްޓްރީ އޮފް ފިޝަރީޒް އެންޑް އޯޝަން ރިޒޯސަސްއިން ފަށާފައިވާ ޕްރޮގްރާމުގެ ދަށުން، މި އަހަރު އިތުރު 80 ފަޅުވެރިއަކަށް ތަމްރީނު ދިނުމަށް ނިންމާފައިވާކަމަށް މިނިސްޓަރ އޮފް ފިޝަރީޒް އެންޑް އޯޝަން ރިޒޯސަސް، އަޙުމަދު ޝިޔާމް ވިދާޅުވެއްޖެއެވެ.

މިނިސްޓަރ ޝިޔާމް މިހެން ވިދާޅުވީ، ސިންގަލް އޯޕަން ވޯޓަރ ޑައިވް"ގެ ފުރަތަމަ ފިޔަވަހި އިފްތިތާޙު ކުރެއްވުމުގެ ގޮތުން ހޮނިހިރު ދުވަހު ހުޅުމާލޭގައި ބޭއްވި ހަރަކާތެއްގައެވެ.

"ސިންގަލް އޯޕަން ވޯޓަރ ޑައިވް"ގެ ނަމުގައި ހިންގާ މި ހަރަކާތް ހަވާލުކޮށްފައިވަނީ އޯޝަން ސިކްސް ފިފްޓީއާއެވެ. އަދި މި މަސައްކަތް ކުރިޔަށް ގެންދިއުމަށް ނިންމާފައިވަނީ ދެ ފިޔަވައްސަކަށް ބަހާލައިގެންނެވެ.

މި ހަރަކާތުގައި މިހާތަނަށް 56 ފަޅުވެރިއަކު ޑައިވިންގ ކޯސް ފުރިހަމަކޮށްފައިވާކަމަށް، ހޮނިހިރު ދުވަހު ބޭއްވި ރަސްމިއްޔާތުގައި މިނިސްޓަރު ވަނި ވިދާޅުވެފައެވެ. އަދި މި އަހަރު ތަމްރީނު ކުރުމަށް މަސައްކަތްކުރާ 80 ފަޅުވެރިންނާއެކު، މި އަންނަ އަހަރު މުޅި ރާއްޖެ ކަވަރުކޮށް މި ހަރަކާތް އެއްކޮށް ނިންމާލެއްވުމަށް މަސައްކަތްކުރައްވާކަމަށް ވެސް މިނިސްޓަރު ވަނީ ވިދާޅުވެފައެވެ.

ފިޝަރީޒް މިނިސްޓްރީން ހިންގާ މި ހަރަކާތުގެ މަޤުސަދަކީ ފުޅިއަޅައިގެން ފީނާ ފަރާތްތަކަށް އަޑިއަށް ފީނުމުގެ ސަބަބުން ދިމާވާ އެކިއެކި ކަންކަމަށާއި، އެފަދަ ކަމަކުން ފުރާނަ ނުރައްކަލަކަށް ހުށަހެޅިއްޖެނަމަ، އެ ފަރާތްތަކުގެ ފުރާނަ ސަލާމަތް ކުރުމަށް ފަޅުވެރިން ތައްޔާރުކުރުމެވެ. 

ފިޝަރީޒް މިނިސްޓްރީން ހާމަކޮށްފައިވާ ގޮތުގައި، މި ޕްރޮގްރާމުގެ ތެރެއިން އޯޕަން ވޯޓަރ ޑައިވިން، އެޑްވާންސް ލެވެލް އަދި ފަސްޓް އެއިޑްގެ ތަމްރީނު ދެވޭނެއެވެ. އަދި މި ޕްރޮގްރާމް ފުރިހަމަ ކުރާ ފަރާތްތަކަށް ޑައިވްކުރުމުގެ ތެރޭގަ އާއި އެ ނޫންވެސް ކަނޑުމަތީގެ ހާދިސާތަކުގައި ކުއްލި އެހީތެރިކަން ފޯރުކޮށްދިނުމަށް ބޭނުންވާ ހުނަރުތައް ދަސްކޮށްދެވޭނެކަމަށް ވެސް މިނިސްޓްރީން ފާހަގަކުރެއެވެ.