ސްޕެނިޝް ލީގު: އެސްޕެންޔޯލް މެޗުން ބަލިވެ، ރެއާލް މެޑްރިޑުގެ ލީޑު ހަނިވެއްޖެ

ސްޕެނިޝް ލަ ލީގާގައި އެސްޕެންޔޯލްއާ ދެކޮޅަށް ކުޅުނު މެޗުން 1-0 އިން ބަލިވުމުން، ލީގުގެ އެއްވަނައިގައި އޮތް ރެއާލް މެޑްރިޑުގެ ލީޑު އެއް ޕޮއިންޓަށް ހަނިވެއްޖެއެވެ. 

މުޅި މެޗު އެއްކޮށް ޕްރެޝަރުގައި ކުޅެމުންދިޔަ އެސްޕެންޔޯލްއިން، ކާލޯ އެންޗެލޮޓީގެ ޓީމު ބަލިކުރީ މެޗު ނިމެން 5 މިނެޓަށްވެފައިވަނިކޮށް، އެ ޓީމުން އުފެއްދި ކައުންޓަރ- އެޓޭކެއްގައެވެ. އެސްޕެންޔޯލްގެ ގޯލު ކާމިޔާބުކޮށްދިނީ އެ ޓީމުގެ ފަހަތުން ކަނަޓްފަރާތަށް ކުޅެމުން އަންނަ ކާލޯސް ރޮމޭރޯއެވެ.

މެޑްރިޑަށް ލިބުނު ރަގަޅު ފުރުސަތެއްގައި، ފުރަތަމަ ހާފުގައި ވިނީސިއަސް ޖޫނިއަރ ވަނީ އޮޅާލުމަށްފަހު ދުރުކަނަށް ބޯޅަ ފޮނުވާލާފައެވެ. ނަމަވެސް އެ ފުރުސަތު އޭނާއަށް ތަނަވަސްކުރުމުގެ ތެރޭގައި އެ ޓީމުގެ ކީލިއަން އެމްބައްޕޭ ފައުލްކޮށްފައިވާކަމަށް ރެފްރީ ނިންމައި، ވިނީސިއަސްގެ ގޯލު ނުގުނުމަށް ނިންމިއެވެ.

ދެވަނަ ހާފުގައި ރޮޑްރީގޯ އައި އެމްބައްޕޭ އެސްޕެންޔޯލްގެ ގޯލަށް ފޮނުވާލި ހަމަލާތައް ވަނީ އެ ޓީމުގެ ގޯލްކީޕަރު ޖޮއަން ގާސިއާ ދިފާއުކޮށްފައެވެ.

މިއީ މި ސީޒަނުގައި މެޑްރިޑް ބަލިވި ތިންވަނަ ލީގު މެޗެވެ. އަދި މި މޮޅާއެކު އެސްޕެންޔޯލް ވަނީ ރެލިގޭޝަން ޒޯނުން މައްޗަށް ޖެހިލާފައެވެ. 

ލީގުގެ ދެވަނައިގައި އޮތް އެތުލެޓިކޯ މެޑްރިޑުން ވަނީ 2-0 އިން މަޔޯކާ ބަލިކޮށްފައެވެ. އަދި އެ ޓީމަށް 48 ޕޮއިންޓު ލިބިފައިވާއިރު، މެޑްރިޑަށް ލިބިފައިވަނީ 49 ޕޮއިންޓެވެ.

މި މެޗުގައި މެޑްރިޑުގެ ޑިފެންޑަރ، އެންޓޮނީ ރުޑީގާގެ ފަލަމަސްގަނޑަށް އަނިޔާވެގެން އޭނާ ވަނީ ބަދަލުކޮށްފައެވެ. މި މަހުގެ 11ގައި ޗެމްޕިއަންސް ލީގުގެ ޕްލޭ-އޮފްގައި އެ ޓީމުން މެންޗެސްޓަރ ސިޓީއާ ދެކޮޅަށް ނިކުންނަންޖެހޭއިރު، ރުޑީގާއަކީ މުހިންމު ކުޅުންތެރިއެކެވެ.