ސަލާޙްގެ ދެ ގޯލުން ބޯނެމައުތު ބަލިކޮށް، ލިވަޕޫލުން ލީގު ރޭހުގައި ބޮޑުތަނުން ކުރިޔަށް ޖެހިލައިފި

ސަލާޙްގެ ދެ ގޯލުން ބޯނެމައުތު 2-0 އިން ބަލިކޮށް، ލިވަޕޫލުން އެ ޓީމުގެ ލީޑު 9 ޕޮއިންޓަށް އިތުރުކޮށް ލީގު ރޭހުގައި ބޮޑުތަނުން ކުރިޔަށް ޖެހިލައިފިއެވެ. 

މި މެޗުގައި ލިވަޕޫލުން ލީޑު ނެގީ މެޗުގެ 30ވަނަ މިނެޓުގައި، ބޯނެމައުތުގެ ޑިފެންޑަރ ލެވިސް ކުކް، ލިވަޕޫލްގެ ފޯވާޑް ކޯޑީ ގަކްޕޯއަށް ކުރި ފައުލަކަށް ލިބުނު ޕެނަލްޓީއަކުންނެވެ. އަދި ސަލާޙްވަނީ މެޗު ނިމެން 15 މިނެޓަށްވެފައި ވަނިކޮށް، ދުރު ކަނަށް ބޯޅަ ފޮނުވާލުމަށްފަހު ލިވަޕޫލްގެ ލީޑު ފުޅާކޮށްދީފައެވެ.

ބޯނެމައުތުން މި މެޗަށް ނިކުތީ ބަލިނުވެ 11 މެޗު ހަމަކުރުމަށްފަހުއެވެ. ނަމަވެސް ބަލިނުވެ 18 މެޗު ހަމަކޮށްފައިވާ ލިވަޕޫލް މިވަނީ އެކަން ބަދަލުކޮށްފައެވެ. 

މެޗުން ބަލިވި ނަމަވެސް ބޯނެމައުތުން ވަނީ ގިނަ ހަމަލާތަކެއް ލިވަޕޫލްގެ ގޯލަށް ފޮނުވާލާފައެވެ. އެގޮތުން ޑޭވިޑް ބްރޫކްސް ފޮނުވާލި ބޯޅަ ލިވަޕޫލްގެ ގޯލަށް ވަތް ނަމަވެސް، އެ ފުރުސަތު ތަނަވަސްކުރުމުގެ ތެރޭގައި އެ ޓީމުގެ ކުޅުންތެރިއަކު އޮފްސައިޑްކަމަށް ވީޑިއޯ އެސިސްޓެންޓު ރެފްރީ (ވީއޭއާރު) ނިންމުމުން، އެ ގޯލެއް ނުގުނައެވެ. އޭގެފަހުން ދެވަނަ ހާފުގައި ޖަސްޓިން ކްލައިވާޓްއަށް ލިބުނު ރީބައުޑު ބޯޅަ ހުސްގޯލަށް އަމާޒުނުކުރެވި ބޭކާރުވީއެވެ.

ލިވަޕޫލްގެ މި މޮޅާއެކީ ދެވަނައިގައި އޮތް އާސެނަލްއަށް ކުރިމަތިވެފައިވާ ޕްރެޝަރު ބޮޑެވެ. އެ ޓީމުން މިރޭ ނިކުންނާނީ މެންޗެސްޓަރ ސިޓީއާ ދެކޮޅަށެވެ. މި ދެ ޓީމު މި ސީޒަނުގައި ސީޓީގެ ދަނޑުގައި ކުޅުނު މެޗު ވަނީ 2-2 އިން އެއްވަރުވެފައެވެ. ސިޓީގެ ޕްލޭމޭކަރ ރޮޑްރީއަށް އަނިޔާވެފައި ވަނީ ވެސް އެ މެޗުގައެވެ.