މިއަަހަރަކީ ކުދި ވިޔަފާރިތަކަށް ފަހި ފުރުސަތުތަކެއް ހުޅުވިގެންދާނެ އަހަރެއް: ވަޒީރު ސައީދު

ކުދި ވިޔަފާރިތައް ކުރިއަރުވައި ފުޅާކުރުމަށް މިއަހަރުގެ ތެރޭގައި ފަހި ގިނަ ފުރުސަތުތަކެއް ހުޅުވިގެންދާނެކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ދިވެހިންގެ އުފެއްދުންތެރިކަމުގެ މައުރަޒް 2025 އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އުފެއްދުންތެރިކަމުގެ މައުރަޒަކީ ރައީސުލްޖުމްހޫރިއްޔާގެ އިސްނެންގެވުމާއެކު އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާގެ ލަފައާއެކު ބިޒްނަސް ސެންޓަރ ކޯޕަރޭޝަން (ބީސީސީ) އިން ކުރިއަށްގެންދާ މައުރަޒެކެވެ. މި މައުރަޒު ބޭއްވުމަށް ހަމަޖެހިފައިވަނީ މެއި މަހުގެ 23 އިން 31 އަށް ހުޅުމާލޭ ސެންޓްރަލް ޕާކުގައެވެ.

ވަޒީރު ސައީދު ވިދާޅުވީ، މިއަހަރުގެ އުފެއްދުންތެރިކަމުގެ މައުރަޒަކީ ޒަމާނީ ވަސީލަތްތަކާއި ބައިތައް ހިމެނޭހެން އެކްސްޕޯއެއްގެ ސިފައިގައި ރާއްޖޭގައި ބޭއްވޭ ފުރަތަމަ މައުރަޒުކަމަށެވެ. އަދި މި މައުރަޒުގައި ބައިނަލްއަޤްވާމީ ވިޔަފާރިތަކާއި އިންވެސްޓަރުންގެ އިތުރުން ކުރިއަރާފައިވާ ޤައުމުތަކުގެ އީޖާދީ މަސައްކަތްތައް ދައްކާލެވޭނެކަމަށް ވަޒީރު ފާހަގަކުރެއްވިއެވެ.

މިއަހަރު އިރާދަކުރެއްވިއްޔާ ކުދި ވިޔަފާރިތަކަށް ރައީސުލްޖުމްހޫރިއްޔާ، މި ސަރުކާރުން ވަރަށް ބޮޑު އިސްކަމެއް ދެއްވާނެ. ޓްރޭޑްމާރކްލުން، ބްރޭންޑް ރައްކާތެރިކުރުން، ވިޔަފާރި އެ ކުރައްވާ ފަރާތްތަކަށް ޔަޤީންކަން ދިނުމުގެ ގޮތުން ޤާނޫނީ އޮނިގަނޑު އަޅުގަނޑުމެން އެބަ އެކުލަވާލަން. ހަމަ އެއާއެކު އަޅުގަނޑުމެން އޮންލައިން ވިޔަފާރިކުރާ ފަރާތްތަކަށް މިއަހަރުގެ ތެރޭގައި މީގެކުރިން ފަހިނުވާ ހަމަގައިމުވެސް ފަހި ނުވެ އޮތް ފުރުސަތުތައް ފަހިވާނެ

 ވަޒީރު 

މި މައުރަޒު ކުރިއަށްދަނީ މުޅި ރާއްޖެއަށް ހުޅުވާލެވިގެންނެވެ. ބީސީސީން ވިދާޅުވެފައިވާ ގޮތުގައި މި މައުރަޒުގެ ތެރެއިން ރާއްޖޭގައި ތިބި ފަންނުވެރިން ޕްރޮމޯޓްކޮށް އެމީހުންގެ ހުނަރު ތަރައްޤީކުރުމަށް ގިނަ ކަންތައްތަކެއް ކުރިއަށް ގެންދާނެއެވެ. އަދި މި މައުރަޒު ވެގެންދާނީ ރާއްޖޭގައި ހުރި ވިޔަފާރީގެ ފުރުސަތުތަކާއި ކުދި ވިޔަފާރިތަކާއި އެހެން ވިޔަފާރިތަކާއި ގުޅުވާލަދޭ ފަންނުވެރިންނާއި ވިޔަފާރިތަކާއިވެސް ގުޅުވާލަދޭ މައުރަޒަކަށެވެ.