ޚަބަރު
ޚާރިޖީ ވަޒީރުގެ ސަޢުދީ ދަތުރުފުޅު ނިމުމަކަށް: ދެ ޤައުމުގެ ގުޅުމަށް އިތުރު ކުރިއެރުމެއް

ޚާރިޖީ ވަޒީރު ޑރ. ޢަބްދުﷲ ޚަލީލް ސަޢުދީ ޢަރަބިއްޔާއަށް ކުރެއްވި ރަސްމީ ދަތުރުފުޅު ފޮޓޯ:ވުޒާރާ
ޚާރިޖީ ވަޒީރު ޑރ. ޢަބްދުﷲ ޚަލީލް ސަޢުދީ ޢަރަބިއްޔާއަށް ކުރެއްވި ރަސްމީ ދަތުރުފުޅު ނިންމަވާލައްވައިފިއެވެ. މި ދަތުރުފުޅަކީ ސަޢުދީގެ ޚާރިޖީ ވަޒީރު ޕްރިންސް ފައިސަލް ބިން ފަރުހާން އަލް ސައުދުގެ ދަޢުވަތަކަށް ކުރެއްވި ދަތުރުފުޅެކެވެ.
ދަތުރުފުޅުގެ ތެރޭގައި، ޑރ. ޚަލީލް ވަނީ ސަޢުދީ ސަރުކާރުގެ އިސް ވެރިންނާ ބައްދަލުކުރައްވައި، ދެ ޤައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރައްވާފައެވެ. މީގެ އިތުރުން، ކުރިއަށް އޮތްތަނުގައި ގުޅިގެން މަސައްކަތްކުރެވިދާނެ ދާއިރާތަކާ ބެހޭގޮތުންވެސް ވަނީ މަޝްވަރާކުރެވިފައެވެ.
ބައްދަލުވުންތަކުގައި ޚާރިޖީ ވަޒީރު ވަނީ ރާއްޖޭގެ އިޤްތިޞާދީ އިސްކަންދޭ ދާއިރާތަކާއި، ފަތުރުވެރިކަމާއި، އުމްރާނީ ތަރައްޤީއާއި، އިއާދަކުރަނިވި ހަކަތައިގެ ދާއިރާ ކުރިއެރުވުމަށް ކުރެވޭ މަސައްކަތްތަކުގެ މަޢުލޫމާތު ހިއްސާކުރައްވާފައެވެ.
ދަތުރުފުޅުގެ ތެރޭގައި، ޑރ. ޚަލީލް ވަނީ ސަޢުދީގެ ރިޔާދު އަދި މަދީނާގައި އުޅޭ ދިވެހިންނާއި ކިޔަވާކުދިންނާވެސް ބައްދަލުކުރައްވާފައެވެ. އަދި ރިޔާޒުގައި ހުންނަ ރާއްޖޭގެ އެމްބަސީއާއި ޖިއްދާގައި ހުންނަ ރާއްޖޭގެ ކޮންސުލޭޓަށް ޒިޔާރަތްކުރައްވައި، ސަޢުދީގައި ދިރިއުޅޭ އަދި ދަތުރުކުރާ ދިވެހިންނަށް އެހީތެރިވުމުގެ މުހިންމުކަން ފާހަގަކުރައްވާފައެވެ.
ޚާރިޖީ ވަޒީރުގެ މި ދަތުރުފުޅުގައި ބައިލެޓްރަލް ސެކްރެޓަރީ ޑރ. ހާލާ ހަމީދާއި ޖޮއިންޓް ސެކްރެޓަރީ ޚަދީޖާ ނަޖީހާވެސް ބައިވެރިވެވަޑައިގެންނެވިއެވެ.