ޝެއިން އަނބުރާ އިންޑިޔާއަށް

އިންޑިޔާގެ މަހުޖަނު މުކޭޝް އަންބާނީގެ ކުންފުނި ރިލަޔަންސް ރީޓެއިލްއިން ޗައިނާގެ މަޝްހޫރު ފެޝަން ބްރޭންޑް ޝެއިންގެ އުފެއްދުންތައް ވިއްކުމަށް އައު އެޕެއް ލޯންޗްކޮށްފިއެވެ. މިއީ 2020 ވަނަ އަހަރު އިންޑިޔާއިން ޝެއިންގެ އެޕް ބަންދުކުރުމަށްފަހު، ގާތްގަނޑަކަށް 5 އަހަރު ފަހުން އަނބުރާ އިންޑިޔާގެ މާކެޓަށް ވަދެވުނު ފުރަތަމަ ފަހަރެވެ.

"ޝެއިން އިންޑިޔާ ފާސްޓް ފެޝަން" ގެ ނަމުގައި ހޮނިހިރު ދުވަހު ލޯންޗްކުރެވުނު މި އެޕްގައި، އިންޑިޔާގައި އުފައްދާ ޝެއިންގެ ބްރޭންޑްގެ އަންނައުނު ވިއްކުމަށް ހަމަޖެހިފައިވެއެވެ. މި އެޕް މެދުވެރިކޮށް ގަންނަ ތަކެތި ފުރަތަމަ ޑެލިވަރީ ކުރެވޭނީ ނިއު ދިއްލީ އާއި މުންބާއީ ފަދަ ބޮޑެތި ސިޓީތަކަށެވެ. އަދި އަވަސް މުސްތަޤުބަލެއްގައި މުޅި އިންޑިޔާއަށް ޑެލިވަރީ ޚިދުމަތް ފޯރުކޮށްދޭން ވަނީ ރޭވިފައެވެ.

ޝެއިންގެ އުފެއްދުންތައް އިންޑިޔާގެ މާކެޓަށް އަނބުރާ ގެނައުމުގެ މަސައްކަތް ކުރެވެމުންދާކަން ފާހަގަކޮށް، އިންޑިޔާގެ ސަރުކާރުން ވަނީ ރިލަޔަންސް އާއި ޝެއިން އާ ދެމެދު އެއްބަސްވުމެއް ވެފައިވާކަން ޕާލިމަންޓަށް ހާމަކޮށްފައެވެ. މި އެއްބަސްވުމުގެ ދަށުން، ޝެއިންގެ ބްރޭންޑްގެ އުފެއްދުންތައް އިންޑިޔާގައި އުފައްދައި، އިންޑިޔާގެ މާކެޓަށް ނެރުމަށް ވަނީ ހަމަޖެހިފައެވެ.

2012 ވަނަ އަހަރު ޗައިނާގައި އުފެދުނު ޝެއިންއަކީ، ކުޑަ އަގުގައި ހުޅަނގުގެ ފެޝަންގެ އަންނައުނު ވިއްކާ މަޝްހޫރު ބްރޭންޑެކެވެ. ނަމަވެސް 2020 ވަނަ އަހަރު އިންޑިޔާ އާއި ޗައިނާ އާ ދެމެދު ޖެހުނު ބޯޑަރު ހަމަނުޖެހުމަކާ ގުޅިގެން، އިންޑިޔާއިން ވަނީ ޝެއިންގެ އެޕް ހިމެނޭ ގޮތަށް ގިނަ އަދަދެއްގެ ޗައިނާގެ އެޕްތައް ބަންދުކޮށްފައެވެ.

މި އައު އެޕްގައި ވިއްކާ އަންނައުނުގެ އަގުތައް ވަރަށް ކުޑަކަން ފާހަގަކުރެވެއެވެ. މިގޮތުން 350 ރުޕީސް (ގާތްގަނޑަކަށް 4 އެމެރިކާ ޑޮލަރު) އަށް ހުންނަ ހެދުންވެސް މި އެޕްގައި ލިބެން ހުރިކަން ފާހަގަކުރެވެއެވެ.