ޚަބަރު
ޖަމްޢިއްޔާތަކަށް މިއަހަރުވެސް ދައުލަތުގެ ބަޖެޓުން ފައިސާ ދޭން ނިންމައިފި
ޖަމްޢިއްޔާތަކަށް ދައުލަތުގެ ބަޖެޓުން ފައިސާ ދިނުން ފޮޓޯ: ވުޒާރާ
ޖަމްޢިއްޔާތައް މާލީގޮތުން ބާރުވެރިކުރުވުމަށް ކުރާ މަސައްކަތުގެ ދަށުން މިއަހަރުވެސް ޖަމްޢިއްޔާތަކަށް ދައުލަތުގެ ބަޖެޓުން ފައިސާ ދިނުމަށް ނިންމާފައިވާކަމަށް ޒުވާނުން ބާރުވެރިކުރުމާއި ފަންނިއްޔާތާބެހޭ ވުޒާރާއިން މިއަދު ހާމަކޮށްފިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ޖަމްޢިއްޔާތަކުގެ ރަޖިސްޓްރަރ އަލީ ޝަކީލް ވިދާޅުވީ، މިއަހަރުގެ ގްރާންޓަށް އެދުމުގެ ފުރުޞަތު މިމަހުގެ ތެރޭގައި ހުޅުވާލެވޭނެ ކަމަށެވެ. އަދި ގްރާންޓް ދޭނީ އެ ވުޒާރާގައި ރަޖިސްޓްރީކޮށްފައިވާ ހަރަކާތްތެރި މަދަނީ ޖަމްޢިއްޔާތަކަށް ކަމަށް އޭނާ ވިދާޅުވިއެވެ.
އަޅުގަނޑުމެންވެސް ބޭނުންވޭ ރާއްޖޭގެ ގިނަ ޖަމްޢިއްޔާތަކުން ގިނަ ކަންތައްތަކެއް ކުރަން. ގްރާންޓް ދިނުމުގައި ވަރަށް ވިސްނުން ހުރޭ މެންޑޭޓާ ގުޅޭ ގިނަ ކަންތައްތަކަކަށް އިސްކަންދޭން
އަލީ ޝަކީލް
ޖަމްޢިއްޔާތަކަށް މާލީ އެހީތެރިކަން ފޯރުކޮށްދެނީ އިޖުތިމާޢީ ގޮތުން މުޖުތަމަޢު ބާރުވެރިކުރުވުމަށް ހިންގާ އެކި އެކި މަޝްރޫޢުތަކަށެވެ. މި ފައިސާ ދެނީ ތިން މަރުހަލާއަކަށް ބަހާލައިގެންނެވެ. މިދިޔަ އަހަރު ވަނީ 15 ޖަމްޢިއްޔާއަކަށް ދައުލަތުގެ ބަޖެޓުން ފައިސާގެ އެހީތެރިކަން ދީފައެވެ.
ރާއްޖޭގައި 3000 އެއްހާ ޖަމްޢިއްޔާ ރަޖިސްޓްރީކޮށްފައިވާ ނަމަވެސް އޭގެތެރެއިން އެކްޓިވް ޖަމްޢިއްޔާތަކުގެ ގޮތުގައި އޮތީ ހާހެއްހާ ޖަމްޢިއްޔާއެވެ. އެހެންކަމުން ޒުވާނުން ބާރުވެރިކުރުމާ ބެހޭ ވުޒާރާއިން ވަނީ ޖަމްޢިއްޔާތައް އަދާހަމަކުރުމުގެ މަސައްކަތް ފަށާފައެވެ. އަދި ރާއްޖޭގައި ހަރަކާތްތެރިވާ ޖަމްޢިއްޔާތަކުގެ ތެރެއިން އެކްޓިވް ނޫން ޖަމްޢިއްޔާތައް މިއަހަރުގެ ނިޔަލަށް އުވޭނެކަމަށް އެ ވުޒާރާއިން ވަނީ ވިދާޅުވެފައެވެ.
ޝަކީލް ވިދާޅުވީ މިފަހަރުގެ ގްރާންޓް ދިނުމުގެ އުޞޫލަށް ބައެއް ބަދަލުތަކެއް އައުމަކީ އެކަށީގެންވާ ކަމެއްކަމަށާއި، ގެންނަ ބަދަލަކީ ރަނގަޅު ބަދަލަކަށް ވާނެ ކަމަށެވެ.
