އީ-ފާސް މެދުވެރިކޮށް ސިޔާސީ ޕާޓީތަކުގައި ރަޖިސްޓަރީވުމާއި ގުޅޭގޮތުން މަޝްވަރާކޮށްފި

އިލެކްޝަންސް ކޮމިޝަނުން (އީސީ) ވަނީ ނެޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ (އެންސީއައިޓީ) އާއެކު، ސިޔާސީ ޕާޓީތަކުގެ ދަފްތަރުގައި އީ-ފާސް މެދުވެރިކޮށް ރަޖިސްޓަރީވެވޭނެ ގޮތް ހެދުމާ ބެހޭގޮތުން މަޝްވަރާކޮށްފައެވެ.

އިލެކްޝަންސް ކޮމިޝަނުގެ މެންބަރު ޙަސަން ޒަކަރިއްޔާ ވިދާޅުވި ގޮތުގައި، މި މަޝްވަރާތަކުގައި އީ-ފާސް ބޭނުންކޮށްގެން ޕާޓީތަކުގައި ރަޖިސްޓަރީވުމުން ޕާޓީތަކަށާއި އާންމުންނަށް ދިމާވެދާނެ ދަތިތަކާ ބެހޭގޮތުން ވާހަކަދެކެވުނެވެ. އަދި މިހާރު އީ-ފާސްގެ ތެރެއިން ޕާޓީތަކުގައި ރަޖިސްޓަރީވެވޭނެ ޕޯޓަލެއް ޑިޒައިންކޮށް ނިމިފައިވާ ކަމަށްވެސް އޭނާ ވިދާޅުވިއެވެ.

އިލެކްޝަންސް ކޮމިޝަނުން ނިންމާފައިވަނީ މި މަހުގެ 15 ވަނަ ދުވަހުން ފެށިގެން، ސަރުކާރުގެ ޑިޖިޓަލް އައިޑެންޓިޓީ ނިޒާމު ކަމަށްވާ އީ-ފާސް މެދުވެރިކޮށް ސިޔާސީ ޕާޓީތަކުގެ ދަފްތަރުގައި ރަޖިސްޓަރީވުމަށް އެދި ހުށަހެޅޭނެ ގޮތް ހެދުމަށެވެ. މިއާ ގުޅިގެން، މިދިޔަ މަހުގެ 30 ވަނަ ދުވަހުން ފެށިގެން ޕާޓީތަކަށް ވަނުމަށް އެދި ހުށަހަޅާ ކަރުދާސް ފޯމު ބަލައިގަތުން ވަނީ ހުއްޓާލާފައެވެ.

ސިޔާސީ ޕާޓީތަކަށް މެންބަރުން ދަފްތަރުކުރުމުގައި އީ-ފާސް ބޭނުންކުރުމާ ގުޅޭޮތުން، ނެޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީގެ އިސްބޭފުޅުންނާއެކު، ކޮމިޝަނުން މިއަދު ބޭއްވި ބައްދަލުވުމުގެ ތެރެއިން @ncitmv pic.twitter.com/MLWnQKOFcN

— Elections Commission (@ElectionsMv) February 2, 2025

އިލެކްޝަންސް ކޮމިޝަނުން ފާހަގަކުރި ގޮތުގައި، މި އައު ނިޒާމުގެ ސަބަބުން މީހުންނަށް ނޭނގި އެކި ޕާޓީތަކަށް ވައްދާ މައްސަލަ ނިމުމަކަށް އަންނާނެއެވެ. އަދި މީގެ ސަބަބުން ޕާޓީތަކުގެ ދަފްތަރުގެ ޞައްޙަކަން އިތުރަށް ކަށަވަރުކުރެވޭނެ ކަމަށްވެސް އީސީން ވިދާޅުވެފައިވެއެވެ.

ކޮންމެ އަހަރެއްގެވެސް ނިމޭ ހިސާބާ ދިމާކޮށް ޕާޓީތަކަށް މެންބަރުން އިތުރުކުރުމަށް ހިންގާ ހަރަކާތްތަކުގެ ތެރެއިން މީހުންނަށް ނޭނގި ޕާޓީތަކަށް ވައްދާ މައްސަލަ ފެންމަތިވަމުން އައި ނަމަވެސް، މިހާރު އިލެކްޝަންސް ކޮމިޝަނުން ކުރަމުންދާ މަސައްކަތާއެކު މި މައްސަލައަށް ދާއިމީ ޙައްލެއް ލިބޭނެ ކަމަށް ބެލެވެއެވެ.