Ads by Exprox

ޚަބަރު

ތުޅާދޫގައި އަޅަމުންދާ 30 އެނދުގެ ހޮސްޕިޓަލުގެ މަސައްކަތް ބާރަށް ކުރިއަށް

ތުޅާދޫގައި އަޅަމުންދާ 30 އެނދުގެ ހޮސްޕިޓަލުގެ މަސައްކަތް ބާރަށް ކުރިއަށް

ބ. ތުޅާދޫގައި ތަރައްޤީކުރަމުންދާ 30 އެނދުގެ ހޮސްޕިޓަލް ފޮޓޯ:އެމްޓީސީސީ

އާމިނަތު ޔުމްނާ

އާމިނަތު ޔުމްނާ

02 ފެބްރުއަރީ 2025، 01:07

02 ފެބްރުއަރީ 2025، 01:07

ބ. ތުޅާދޫގައި ތަރައްޤީކުރަމުންދާ 30 އެނދުގެ ހޮސްޕިޓަލުގެ މަސައްކަތްތައް މިހާރު ބާރަށް ކުރިއަށްދާ ކަމަށް މަޝްރޫޢުގެ ކޮންޓްރެކްޓަރ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުދަ ދުވަހު ހާމަކޮށްފިއެވެ.

އެމްޓީސީސީން މަޢުލޫމާތު ދެއްވިގޮތުގައި މިވަގުތު ކުރިއަށްދަނީ އިމާރާތުގެ ދެވަނަ ފަންގިފިލާގައި ޝީޓް އެޅުމުގެ މަސައްކަތްތަކެވެ. މުޅި ހޮސްޕިޓަލުގެ ފައުންޑޭޝަނާއި ފުރަތަމަ ފަންގިފިލާގެ ތަނބުތަކާއި ޝީޓް އެޅުމުގެ މަސައްކަތް މިހާރު ވަނީ ނިމިފައެވެ.

ތުޅާދޫގައި 30 އެނދުގެ ހޮސްޕިޓަލެއް އެޅުމުގެ ޢަމަލީ މަސައްކަތް ފެށިފައިވަނީ 2023 ވަނަ އަހަރުގެ ޖުލައި މަހުއެވެ. މި ހޮސްޕިޓަލު ތަރައްޤީކުރެވެނީ ދެ ފަންގިފިލާގެ އިމާރާތެއްގައެވެ. މި ޕްރޮޖެކްޓަކީ ބ. އަތޮޅުގެ އިތުރުވަމުން އަންނަ އާބާދީއާއެކު، މިހާރު އޭދަފުށީގައި ހިންގާ އަތޮޅު ހޮސްޕިޓަލުގެ ބާރު ކުޑަކުރުމަށް ތަރައްޤީކުރަން ފަށާފައިވާ މަޝްރޫޢެކެވެ.

އައު ހޮސްޕިޓަލު އިމާރާތުގެ އެންމެ ބޮޑު ބޭނުމަކީ، ހޮސްޕިޓަލުގައި ސްޕެޝަލިޓީ ފަރުވާގެ އިތުރު ޚިދުމަތްތައް ޤާއިމުކުރުމެވެ. މީގެ އިތުރުން ރަށުގައި ތިބެގެން އެކިއެކި ބަލިތަކަށް ތަހުލީލުކުރާ އިތުރު ޓެސްޓްތައް ހެދޭނެ އިންތިޒާމުވެސް އެ ރަށުގައި ޤާއިމުކުރެވޭނެއެވެ.

ބ. އަތޮޅުގައި ދެވަނައަށް އެންމެ އާބާދީ ބޮޑު ތުޅާދޫގައި 3000 އަށްވުރެ ގިނަ މީހުން ދިރިއުޅެމުން ދާއިރު، އެވްރެޖްކޮށް ދުވާލެއްގެ މައްޗަށް 40 އަށްވުރެ ގިނަ މީހުން ތުޅާދޫ ސިއްޙީ މަރުކަޒުގެ އޯޕީޑީއަށް ދައްކާކަމަށް އަތޮޅު ހޮސްޕިޓަލުން މަޢުލޫމާތު ދެއެވެ.



މި ހޮސްޕިޓަލާއެކު ތުޅާދޫ ކައިރީގައި ދެން އޮންނަ ހިތާދޫ، ގޮއިދޫ، ފުޅަދޫ އަދި ފެހެންދޫގެ ރައްޔިތުންނަށްވެސް ސިއްޙީ ޚިދުމަތް ހޯދުމުގައި ބޮޑު ލުއިފަސޭހައެއް ލިބޭނެކަމަށް ބެލެވެއެވެ.

ތުޅާދޫގައި 30 އެނދުގެ ހޮސްޕިޓަލެއް ތަރައްޤީކުރުމުގެ މަޝްރޫޢުއަކީ 114.50 މިލިޔަން ރުފިޔާގެ މަޝްރޫޢުއެކެވެ. އެމްޓީސީސީން ވިދާޅުވީ، މަސައްކަތްތައް ވީހާވެސް އަވަހަށް ނިންމުމަށް މަސައްކަތް ކުރަމުންދާ ކަމަށެވެ.
                    

މި ލިޔުން ކިޔާލުމުން

Ads by MSS