ދެމެހެއްޓެނިވި ފަތުރުވެރިކަމުގެ ދާއިރާގައި ކުރިއަށްދާން ސަޢޫދީ ޢަރަބިއްޔާއިން ގިނަ މަސައްކަތްތަކެއް

2030 ވަނަ އަހަރާ ހަމައަށް އަހަރަކު 150 މިލިއަން ފަތުރުވެރިން ޤައުމަށް ގެނައުމުގެ ލަނޑުދަނޑިއާއެކު، ސަޢޫދީ ޢަރަބިއްޔާއިން ދަނީ އައު ފަތުރުވެރިކަމުގެ ރިސޯޓުތަކެއް ތަރައްޤީކުރަމުންނެވެ. އަދި މިހާރު ވެސް ފަތުރުވެރިންގެ މެދުގައި މަޤްބޫލު ތަންތަން ދަނީ އިތުރަށް ތަރައްޤީކުރަމުންނެވެ.

މީގެ އިތުރުން، ފަތުރުވެރިކަމުގެ ސިނާޢަތުގެ ތަރައްޤީގެ މަސައްކަތްތަކުގައި ތިމާވެށި ރައްކާތެރިކުރުމަށް އިސްކަންދީ، އިކޮލޮޖިކަލް އަދި ސަޤާފީ ރައްކާތެރިކަމުގެ ފިޔަވަޅުތައް އަޅަމުންދާކަމަށް ވެސް ވަނީ ފާހަގަކޮށްފައެވެ.

ކިއަރނީ މިޑްލް އީސްޓް އެންޑް އެފްރިކާގެ ޕާޓްނަރ ޕަސްކަލް އަރމޫދޮމް ވިދާޅުވި ގޮތުގައި މި ހަމަހަމަ އުސޫލުން ކުރިއަށްދިއުމުގެ ސަބަބުން ފަތުރުވެރިކަމުގެ ދާއިރާ ފުޅާވަމުންދާއިރު ޤައުމުގެ ޤުދުރަތީ އަދި ސަޤާފީ މުއްސަނދިކަން އިތުރުވެގެންދާނެއެވެ.

ނިއޯމް އަދި ރެޑް ސީ ޕްރޮޖެކްޓް ފަދަ ބޮޑެތި މަޝްރޫޢުތަކުގައި އިއާދަކުރަނިވި ހަކަތައަށް އިންވެސްޓްކުރުމަކީ މުހިންމު ބައެއް، މި މަންޒިލްތައް ފަރުމާކޮށްފައިވަނީ މުޅިން އިއާދަކުރަނިވި ހަކަތައިން ހިންގޭ ގޮތަށް، މިކަމުގެ ސަބަބުން ކާބަން ބޭރުކުރާ މިންވަރު ވަރަށް ބޮޑަށް ދަށްވެގެންދާނެ، އިޤްތިޞާދީ ކުރިއެރުން ސާފު ހަކަތައާ ގުޅުވާލުމުގެ ސަބަބުން ތިމާވެއްޓަށް ސަމާލުކަންދޭ ފަތުރުވެރިން އައުމުގެ އިތުރުން ދެމެހެއްޓެނިވި ވަޒީފާތައް އުފެދި، ތެލަށް ބަރޯސާވުން ކުޑަކުރުމަށް މަގުފަހިވެގެންދާނެ

 އަރމޫދޮމް 

އޭނާ އިތުރަށް ވިދާޅުވި ގޮތުގައި ސަޢޫދީ ގްރީން އިނީޝިއޭޓިވްގެ ދަށުން 10 ބިލިއަން ގަސް އިންދުމާއި މިލިއަނުން ގުނާ ހެކްޓަރު ބިން އާރާސްތުކުރުމުގެ މަސައްކަތް ކުރިއަށްދާނެއެވެ. މިކަމުގެ ސަބަބުން ކާބަން މަދުވެ، އީކޯ ޓޫރިޒަމަށް މުހިންމު ޤުދުރަތީ މަންޒަރުތައް އިތުރަށް ރީތިވެގެންދާނެއެވެ.

އާތަރ ޑީ. ލިޓްލްގެ ޕާޓްނަރ ކަމިލާ ބެވިލަކުއާ ވިދާޅުވި ގޮތުގައި ފަތުރުވެރިކަމުގެ ދާއިރާގައި ތަޖުރިބާ ލިބިފައިވާ ޤައުމުތަކުން ފިލާވަޅު ލިބިގަތުމުގެ ފުރުޞަތު ސަޢޫދީ ޢަރަބިއްޔާއަށް ލިބިގެންދާނެއެވެ. އޭނާ ފާހަގަކުރެއްވި ގޮތުގައި ފަތުރުވެރިކަމުގެ  ސަބަބުން އިޤްތިޞާދީ ކުރިއެރުން ލިބުނު ނަމަވެސް، ރަނގަޅަށް ރޭވިފައިނުވާ ނަމަ ތިމާވެއްޓަށާއި އިޖްތިމާޢީ ގޮތުން ގެއްލުން ލިބިދާނެއެވެ.

ދެމެހެއްޓެނިވި ތަރައްޤީގެ ފުރިހަމަ ފައިދާ ހޯދުމަށްޓަކައި، އިކޮލޮޖިކަލް، އިޖްތިމާޢީ، ސަޤާފީ އަދި އިޤްތިޞާދީ ދާއިރާތައް އެއް ނިޒާމެއްގެ ދަށުން ގުޅުވާލުމަކީ  ވަރަށް މުހިންމު ކަމެއް، މިކަމުގެ ސަބަބުން މުޖުތަމަޢު ތަރައްޤީގެ ބެލެނިވެރިންނަށް ވެ، ތަރައްޤީގެ މަސައްކަތުން ޤުދުރަތީ އަދި ސަޤާފީ މުއްސަނދިކަން އިތުރުވެގެންދާނެ

 ބެވިލަކުއާ 

އޮލިވަރ ވައިމަންގެ ސަރުކާރާއި ޢާންމު މުއައްސަސާތަކުގެ ޕްރެކްޓިސްގެ ޕާޓްނަރ އަދި ރިޔާޟް އޮފީހުގެ ވެރިޔާ ސައިފް ސަމްމާކިއާ ވިދާޅުވި ގޮތުގައި ފަތުރުވެރިކަމުގެ ދާއިރާގައި އިޤްތިޞާދީ ތަރައްޤީއާއި ތިމާވެށި ރައްކާތެރިކުރުމަކީ އެކަތި އަނެކައްޗާ ފުށުއަރާ ދެ ކަމެއް ނޫނެވެ. އޭނާ ފާހަގަކުރެއްވި ގޮތުގައި ސަޢޫދީ ޢަރަބިއްޔާއިން މިހާރު ވެސް މި ވިސްނުމާއެކު މަސައްކަތް ކުރަމުންދެއެވެ.

މުޅި ނިޒާމުގައި ޤުދުރަތީ އަދި ސަޤާފީ ތަރިކަ ރައްކާތެރިކުރުމަށް ފުން އިލްތިޒާމެއް އޮތްކަން ސާފުކޮށް ފެނޭ އަދި މި ވަސީލަތްތަކަކީ ޤައުމުގެ ފަތުރުވެރިކަތުރުވެރިކަމުގެ ދާއިރާގެ މުހިންމު ބައެއްކަން ޤަބޫލުކުރެވިފައިވޭ

ސަމްމާކިއާ 

ސަމްމާކިއާ އިތުރަށް ފާހަގަކުރެއްވި ގޮތުގައި ރަތްކަނޑުގެ މުއްސަނދި އަދި ތަފާތު މުރަކަތަކަކީ އެ ސަރަޙައްދުގެ ޚާއްސަކަން އިތުރުކޮށްދޭ އެއްޗެކެވެ. އެހެންކަމުން، އެ ސަރަޙައްދުގެ އިޤްތިޞާދީ ކާމިޔާބީ ބިނާވެފައިވަނީ ތިމާވެށި ރައްކާތެރިކުރުމަށް ކުރެވޭ މަސައްކަތްތަކުގެ މައްޗަށެވެ.

ކިއަރނީގެ އަރމޫދޮމް ފާހަގަކުރެއްވި ގޮތުގައި ރަތްކަނޑުގެ އަމާލާ މަޝްރޫޢަކީ މުޅިން އިއާދަކުރަނިވި ހަކަތައިން ހިންގޭ ލަގްޒަރީ ވެލްނެސް މަންޒިލެކެވެ. އަދި ދިރިއްޔާ ގޭޓް މަޝްރޫޢަކީ ސަޤާފީ ތަރިކަ ރައްކާތެރިކުރުމާއި ދެމެހެއްޓެނިވި އުސޫލުތައް އެއްކޮށްލާފައިވާ މަޝްރޫޢެކެވެ.

މި ތާރީޚީ ސަރަޙައްދު ތަރައްޤީކުރެވެމުންދަނީ ސަޤާފީ މަރުކަޒެއްގެ ގޮތުގަ، މީގެ ތެރޭގައި ހަކަތަ ޚަރަދުކުޑަ ޑިޒައިންތަކާއި، ފެން ސަލާމަތްކުރުމުގެ ފިޔަވަޅުތަކާއި، އެ ސަރަޙައްދަށް ޚާއްޞަ ގަސްގަހާގެހި ހިމެނޭ، މިކަމުގެ ސަބަބުން ފަތުރުވެރިންނަށް ސަޢޫދީ ތަރިކަ ޒިންމާދާރު ގޮތެއްގައި ތަޖުރިބާކުރުމުގެ ފުރުޞަތު ލިބިގެންދާނެ

 އަރމޫދޮމް 

އޭޑީއެލްގެ ބެވިލަކުއާ ފާހަގަކުރެއްވި ގޮތުގައި ސަޢޫދީ ޢަރަބިއްޔާގެ ވިޝަން 2030 ގައި ސައުދާ، އަލްއުލާ، ނިއޯމް، ރެޑް ސީ  އަދި އެތައް ރޯޔަލް ރިޒާވްތަކަކާއި ނެޝަނަލް ޕާކުތަކެއްގައި ދެމެހެއްޓެނިވި ފަތުރުވެރިކަމުގެ މަސައްކަތްތައް ހިމެނެއެވެ. މި މަސައްކަތްތަކުގެ އަމާޒަކީ އިކޮލޮޖިކަލް އާރާސްތުކުރުމާއި، އިޤްތިޞާދީ ބަދަލު އަދި މުޖުތަމަޢު ބާރުވެރިކުރުވުމެވެ.

ސައުދީ ޑިވެލޮޕްމަންޓްގެ އިކޮލޮޖިކަލް އާރާސްތުކުރުމުގެ މަޝްރޫޢުގެ ދަށުން 2030 ވަނަ އަހަރާ ހަމައަށް 1 މިލިއަނަށްވުރެ ގިނަ ގަސް އިންދުމަށް ވަނީ ރޭވިފަ، މީގެ ސަބަބުން ފަރުބަދަ ސަރަޙައްދުތަކުގެ އިކޯސިސްޓަމް އަލުން އާރާސްތުވެގެންދާނެ، މީގެ އިތުރުން، ނޫބިއަން އައިބެކްސް ފަދަ ދިރޭތަކެތި އަލުން އެ ސަރަޙައްދުތަކަށް ތަޢާރަފުކުރުމުގެ މަސައްކަތުން ބަޔޯޑައިވަރސިޓީ އިތުރުވެގެންދާނެ، އަދި 300 އަށްވުރެ ގިނަ ރަށުގެ ރައްޔިތުންނަށް އީކޯ-ގައިޑުންނާއި ފޮރެސްޓް ސްޓިވާޑުންގެ ގޮތުގައި ތަމްރީނު ދެވިފައިވޭ، މިކަމުގެ ސަބަބުން ފަތުރުވެރިކަމުގެ ކުރިއެރުމަށް ސީދާ އެހީތެރިވެ، މުޖުތަމަޢުގެ ބައިވެރިވުން އިތުރުވެގެންދާނެ،

 ބެވިލަކުއާ 

ރެޑް ސީ ޕްރޮޖެކްޓާ ގުޅޭގޮތުން ބެވިލަކުއާ ފާހަގަކުރެއްވި ގޮތުގައި މުރަކަތަކާއި ކަނޑުފަޅުގެ ގަސްގަހާގެހި އާރާސްތުކުރުމުގެ މަސައްކަތުން ބަޔޯޑައިވަރސިޓީ 40 އިންސައްތަ އިތުރުވެ، އަހަރަކު 500،000 ޓަނުގެ ކާބަން ޑައިއޮކްސައިޑް ނައްތާލެވޭނެއެވެ. މީގެ އިތުރުން، 500 އަށްވުރެ ގިނަ ވަޒީފާ އުފެދި، އީކޯ-ޓޫރިޒަމްގެ މަސައްކަތްތަކާއެކު ތިމާވެށި ރައްކާތެރިކުރުމާއި އިޤްތިޞާދީ ތަރައްޤީ ގުޅުވާލެވިގެންދާނެއެވެ.

ޕީޑަބްލިއުސީ މިޑްލް އީސްޓްގެ ޕާޓްނަރ އަދި ގްލޯބަލް ޓޫރިޒަމް އިންޑަސްޓްރީ ލީޑް ނިކޮލަސް މޭޔަރ ވިދާޅުވި ގޮތުގައި ޤުދުރަތީ ތަޖުރިބާތަކަށް ޝައުޤުވެރިވާ ފަތުރުވެރިންނަކީ ޚަރަދުކުރުމުގައި ކުރިއަރާފައިވާ ބައެކެވެ. އެހެންކަމުން މިފަދަ ފަތުރުވެރިންގެ ސަބަބުން އެ ސަރަޙައްދުގެ އިޤްތިޞާދަށް ބޮޑު ކުރިއެރުމެއް ލިބިގެންދާނެއެވެ.

ޚާއްޞަކޮށް އީކޯ-ޓޫރިޒަމްގެ ސަބަބުން ދުރު އަދި އިޤްތިޞާދީ ގޮތުން ނިކަމެތި ސަރަޙައްދުތަކަށް ބޮޑު އިޤްތިޞާދީ ފައިދާއެއް ލިބިގެންދާނެ، ފަތުރުވެރިންގެ ޚަރަދުކުރުމުގެ ސަބަބުން ވަޒީފާތައް އުފެދި، ރަށު ފެންވަރުގެ ވިޔަފާރިތަކަށް ކުރިއެރުން ލިބި، ރައްޔިތުންނަށާއި ފަތުރުވެރިންނަށް ފައިދާވާނެ ގޮތަށް އިންފްރާސްޓްރަކްޗަރ ތަރައްޤީވެގެންދާނެ،

 މޭޔަރ 

އޭނާ އިތުރަށް ވިދާޅުވި ގޮތުގައި މިފަދަ ފަތުރުވެރިކަމަކީ ޚާއްޞަކޮށް އެތެރޭގެ ފަތުރުވެރިންނަށް މުހިންމުވާނެ ކަމެކެވެ. އެތެރޭގެ ފަތުރުވެރިންގެ ސަބަބުން ބޮޑު އިޤްތިޞާދީ ފައިދާއެއް ލިބޭއިރު، ބޭރުގެ ފަތުރުވެރިންނާ އަޅާބަލާއިރު ތިމާވެއްޓަށް ކުރާ އަސަރު ކުޑައެވެ. އެތެރޭގެ ފަތުރުވެރިކަން ކުރިއެރުވުމުގެ ސަބަބުން މަތިންދާބޯޓު ދަތުރުތަކާ ގުޅިގެން ބޭރުވާ ކާބަން މަދުވެ، ދެމެހެއްޓެނިވި ތަރައްޤީގެ ލަނޑުދަނޑިތަކާ އެއްގޮތްވާނެއެވެ.

ޕީޑަބްލިއުސީގެ  ފަރާތުން މޭޔަރ އިތުރަށް ފާހަގަކުރެއްވި ގޮތުގައި ރީޖެނެރޭޓިވް ޓޫރިޒަމްގެ ޚިޔާލަކީ ސަޢޫދީ ޢަރަބިއްޔާގެ އުސޫލުތަކުގެ މައިގަނޑު ބައެކެވެ.

އާންމު ފަތުރުވެރިކަމާ ޚިލާފަށް، ރީޖެނެރޭޓިވް ޓޫރިޒަމްގެ ސަބަބުން ވަސީލަތްތައް ބޭނުންކުރެވުމުގެ ބަދަލުގައި ޤުދުރަތީ އަދި ސަޤާފީ ތަންތަން އާރާސްތުކޮށް، އިތުރަށް ރަނގަޅުކުރެވިގެންދާނެ، މި އުސޫލުގެ ސަބަބުން މަންޒިލްތަކުގެ އިކޮލޮޖިކަލް އަދި ސަޤާފީ އަގު ދެމެހެއްޓުމުގެ އިތުރުން، ވަގުތު ފާއިތުވަމުންދާއިރު އިތުރަށް ރަނގަޅުވެގެންދާނެ،މިކަމުގެ ސަބަބުން ކުރިމަގުގެ ފަތުރުވެރިންނަށް އިތުރަށް މުއްސަނދި ތަޖުރިބާއެއް ލިބި، ރަށުގެ މުޖުތަމަޢުތަކަށް ދާއިމީ ލާބައެއް ލިބިގެންދާނެ،

 މޭޔަރ