ދުނިޔޭގެ ސިއްޙަތު ޖަމްޢިއްޔާގެ އެގްޒެކެޓިވް ބޯޑުގެ ބައްދަލުވުމަށް ސިއްޙީ ވަޒީރު ފުރާވަޑައިގެންފި

ދުނިޔޭގެ ޞިއްޙަތު ޖަމުޢިއްޔާގެ 156 ވަނަ އެގްޒެކެޓިވް ބޯޑު ބައްދަލުވުމުގައި ބައިވެރިވެ ވަޑައިގެންނެވުމަށް ސިއްހީ ވަޒީރު، ޢަބްދުﷲ ނާޡިމް އިބްރާހިމް ސްވިޒަލޭންޑުގެ ޖެނީވާއަށް ފުރާވަޑައިގަންނަވައިފިއެވެ. މި ބައްދަލުވުމުގައި ވަޒީރު ތަމްސީލުކުރައްވާނީ ދެކުނު އިރުމަތީ އޭޝިއާ ސަރަޙައްދެވެ.

މި ބައްދަލުވުމަކީ ދުނިޔޭގެ ޞިއްޙަތު ޖަމްޢިއްޔާގެ އެންމެ މަތީ ފަންތީގެ ބައްދަލުވުމެކެވެ. އަދި މި ބައްދަލުވުމުގައި ދުނިޔޭގެ 34 ޤައުމަކުން ޞިއްޙީ ދާއިރާގެ ބޭފުޅުން ބައިވެރިވެ ވަޑައިގަންނަވާއިރު، މި ބައްދަލުވުމުގައި ބައިނަލް އަޤްވާމީ މުހިއްމު ނިންމުންތަކެއް ނިންމާނެއެވެ.

މި މަހުގެ 3 އިން 11 އަށް ކުރިއަށްދާ މި ބައްދަލުވުމުގައި ދުނިޔޭގެ ޞިއްޙަތު ޖަމުޢިއްޔާގެ އެގްޒެކެޓިވް ބޯޑުގެ މެމްބަރު ޤައުމުތަކާއި އެހެން މެމްބަރު ޤައުމުތައްވެސް ބައިވެރިވުމަށް ވަނީ ހަމަޖެހިފައެވެ. 

ދުނިޔޭގެ ސިއްޙަތު ޖަމްޢިއްޔާގެ އެގްޒެކެޓިވް ބޯޑުގައި ދިވެހިރާއްޖެ ހިމެނުނީ 2022 ވަނަ އަހަރެވެ. އަދި އެ މުއްދަތުން ފެށިގެން ތިން އަހަރު ދުވަހުގެ މުއްދަތުއް މި ސަރަޙައްދު ތަމްސީލުކުރާނީ ދިވެހިރާއްޖެއިންނެވެ. އަދި މިފަހަރުގެ ބައްދަލުވުމުގެ ވައިސް-ޗެއަރގެ މަޤާމު ފުރުއްވުމަށް ހަމަޖެހިފައިވަނީ ވެސް ރާއްޖޭގެ ސިއްޙީ ވަޒީރެވެ.

މި ބައްދަލުވުމުގައި، މިދިޔަ އަހަރުގެ ދުނިޔޭގެ ޞިއްޙަތު ޖަމުޢިއްޔާގެ 6 ސަރަޙައްދުގައި ކުރިއަށް ގެންދިޔަ ރީޖަނަލް ކޮމިޓީ ބައްދަލުވުންތަކުގައި ނިންމި ނިންމުންތަކާއި، ޕްރޮގްރާމް، ބަޖެޓް އެންޑް އެޑްމިނިސްޓްރޭޓިވް ކޮމިޓީ ބައްދަލުވުމުގެ ރިޕޯޓުތަކާގުޅޭ މަޝްވަރާތަކާއި ގުޅޭގޮތުން ގޮތެއް ނިންމުމަށް ހަމަޖެހިފައިވެއެވެ. 

އަދި މި އަހަރުގެ 78 ވަނަ ވާލްޑް ހެލްތު އެސެމްބްލީގައި މަޝްވަރާކުރުމަށް ހަމަޖެހިފައިވާ އެޖެންޑާތަކަށް އެގްޒެކަޓިވް މެމްބަރ ޤައުމުތަކުން މަޝްވަރާކޮށް ނިންމުންތައް ނިންމާނެއެވެ. މީގެ ތެރޭގައި ޞިއްޙީ ކުއްލި ނުރައްކަލުގެ ކާރިސާތަކުން ރައްކާތެރިވުމަށްޓަކައި ޤައުމުތަކުން ތައްޔާރުވެ އިޖާބަދިނުމުގެ ޤާބިލުކަން އިތުރުކުރުމާއި ދެމެހެއްޓެނި ތަރައްޤީގެ ލަނޑުދަނޑިތައް ޙާޞިލުކުރުމަށް ކަނޑައަޅާފައިވާ ޔުނިވަރސަލް ހެލްތު ކަވަރޭޖް، މޫސުމަށް އަންނަ ބަދަލުގެ ސަބަބުން ޞިއްޙަތަށް ކުރާ ނޭދެވޭ އަސަރު ކުޑަކުރުމަށް ކަނޑައަޅާފައިވާ މުހިންމުކަންކަން ކުރިއަށް ގެންދިއުމުގެ މުހިއްމު ނިންމުންތަކަށް މަޝްވަރާކޮށް ނިންމުންތައް ނިންމޭނެއެވެ.

ދުނިޔޭގެ ޞިއްޙަތު ޖަމުޢިއްޔާއިން ޤައުމުތަކަށް ފޯރުކޮށްދޭ އެހީތައް އެންމެ ފައިދާހުރި ގޮތެއްގައި ފޯރުކޮށްދިނުމާ ގުޅޭގޮތުންވެސް މި ބައްދަލުވުމުގައި މަޝްވަރާކޮށް އެކަމާގުޅޭ ކަންތައްތައް ހުށަހެޅުމަށް ހަމަޖެހިފައިވެއެވެ. 
މި ފަހަރުގެ ބައްދަލުވުމުގެ ހަވާސާގައި ދިވެހިރާއްޖޭގެ ޞިއްޙީ ދާއިރާ ކުރިއެރުވުމަށް ދޭދޭ ޤައުމުތަކާއެކު ބައްދަލުވުންތައް ބޭއްވުމަށް ވަނީ ރާވާފައެވެ. މި ބައްދަލުވުންތަކުގައި ޞިއްޙީ ދާއިރާގެ އިންސާނީ ވަސީލަތްތައް ތަރައްޤީ ކުރުމާއި އާއްމު ޞިއްޙަތު ރައްކާތެރިކުރުމުގެ މަސައްކަތަށް އަދި ޞިއްޙީ ދާއިރާ ކުރިއެރުވުމަށް ބޭނުންވާ އެހީތެރިކަން ހޯދުމަށް މަޝްވަރާކުރުމަށްވެސް ހަމަޖެހިފައިވެއެވެ.