ޚަބަރު
ރަމަޟާން މަހަށް ތައްޔާރުވުމުގެ ގޮތުން މާލެ އާއި އަތޮޅު ތެރޭގައި ދަރުސްތަކެއް ބާއްވަނީ

އިސްލާމީ ކަންތައްތަކާ ބެހޭ ވުޒާރާގެ ދަރުހެއް---
ހުލާސާ
މި ދަރުސްތަކުގައި ރަމަޟާން މަހުގެ މާތްކަމާއި، ރަމަޟާން މަހުގެ ރޯދައިގެ ޙުކުމާއި، ރޯދައިގެ މާތްކަމާއި، ރަމަޟާން މަހުގެ ރޭއަޅުކަމުގެ ޙުކުމްތަކަށް އަލިއަޅުވާލުމަށް ވަނީ ހަމަޖެހިފައި.
މި އަހަރުގެ މާރިޗު މަހުގައި ފެށޭ ރަމަޟާން މަހަށް ތައްޔާރުވުމުގެ ގޮތުން 'މަޖާސިލް ރަމަޟާން'ގެ ނަމުގައި ސިލްސިލާ ދަރުސްތަކެއް ބޭއްވުމަށް އިސްލާމީ ކަންތައްތަކާ ބެހޭ ވުޒާރާއިން ނިންމައިފިއެވެ.
އެ ވުޒާރާއިން ހާމަކޮށްފައިވާ ގޮތުގައި މި ދަރުސްތަކުގެ އަމާޒަކީ، ރަމަޟާން މަހަށް ފުރިހަމައަށް ތައްޔާރުވުމަށް ކޮންމެހެން އެނގެންޖެހޭ މަޢުލޫމާތުތައް ރައްޔިތުންނަށް ފޯރުކޮށްދިނުމެވެ. އަދި މަޝްހޫރު ޢިލްމުވެރިޔާ، އިބްނު އުތައިމީން ރަޙިމަޙުﷲ ލިޔުއްވާފައިވާ ފޮތެއްގެ މަޢުލޫމާތު ވެސް މި ދަރުސްތަކުގައި ހިމެނޭނެކަމަށް އެ ވުޒާރާއިން ވަނީ ހާމަކޮށްފައެވެ.
މި ދަރުސްތަކުގައި އަލިއަޅުވާލަން ހަމަޖެހިފައިވާ ބައެއް މަޢުޟޫއުތަކުގެ ތެރޭގައި ރަމަޟާން މަހުގެ މާތްކަމާއި، ރަމަޟާން މަހުގެ ރޯދައިގެ ޙުކުމާއި، ރޯދައިގެ މާތްކަމާއި، ރަމަޟާން މަހުގެ ރޭއަޅުކަމުގެ ޙުކުމްތައް ހިމެނެއެވެ.
މި ދަރުސްތައް މާލޭގެ އިތުރުން 16 ރަށެގައި ކުރިޔަށް ގެންދާނެކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ހާމަކޮށްފައެވެ. އަދި ދަރުސްތައް ކުރިއަށް ގެންދިއުމަށް ހަމަޖެހިފައިވަނީ ފެބްރުއަރީ މަހުގެ ފުރަތަމަ ތިން ހަފްތާގެ، ހުކުރު އަދި ހޮނިހިރު ދުވަހުގެ ރޭތަކުގައެވެ.
ރަށްރަށުގައި ކުރިޔަށް ގެންދިއުމަށް ހަމަޖެހިފައިވާ ދަރުސްތައް ކުރިޔަށް ގެންދިއުމަށް ހަމަޖެހިފައިވަނީ އެ ރަށްރަށުގެ ކައުންސިލާ ގުޅިގެންނެވެ.