Ads by Exprox

ޚަބަރު

ރާއްޖޭގެ އުފާވެރިކަން މިންކުރުމުގެ ޤައުމީ މަޝްރޫޢު މެޑަމް ސާޖިދާ އިފްތިތާޙުކޮށްދެއްވައިފި

ރާއްޖޭގެ އުފާވެރިކަން މިންކުރުމުގެ ޤައުމީ މަޝްރޫޢު މެޑަމް ސާޖިދާ އިފްތިތާޙުކޮށްދެއްވައިފި

ރާއްޖޭގެ އުފާވެރިކަން މިންކުރުމުގެ ޤައުމީ މަޝްރޫޢު އިފްތިތާޙު ކުރުން، ފޮޓޯ: ރައީސް އޮފީސް

މިފްތާޙް މުޙައްމަދު

މިފްތާޙް މުޙައްމަދު

03 ފެބްރުއަރީ 2025، 06:42

03 ފެބްރުއަރީ 2025، 06:42

ހުލާސާ

މި މަޝްރޫޢު ކުރިޔަށް ގެންދާނީ އިސްލާމިކް ޔުނިވަރސިޓީ އޮފް މޯލްޑިވްސްގެ އެހީތެރިކަމާއެކު.

މި ރަސްމިއްޔާތުގައި "އުފާވެރި ރާއްޖެ" ލޯގޯ ވެސް ވަނީ އިފްތިތާޙިކޮށްފައި.

ރާއްޖޭގެ އުފާވެރިކަން މިންކުރުމުގެ ޤައުމީ މަޝްރޫޢު، ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު އިފްތިތާޙުކޮށްދެއްވައިފިއެވެ. މި މަޝްރޫޢު ރަސްމީކޮށް އިފްތިތާޙުކޮށްފައި ވަނީ، މިކަމަށްޓަކައި އާދީއްތަދުވަހު ސަލްޓަންޕާކުގައި ބޭއްވި ޙާއްސަ ރަސްމިއްޔާތެއްގައެވެ. 

މި ރަސްމިއްޔާތުގައި "އުފާވެރި ރާއްޖެ" ލޯގޯ ވެސް ވަނީ އިފްތިތާޙުކޮށްފައެވެ.



މި މަޝްރޫޢަކީ ސިޓީތަކާއި އިދާރީ ދާއިރާތަކާއި އާންމު ޚިދުމަތްތަކާއި ބެހޭ ވުޒާރާއިން އިސްލާމިކް ޔުނިވަރސިޓީ އޮފް މޯލްޑިވްސްގެ އެހީތެރިކަމާއެކު ކުރިޔަށް ގެންދިއުމަށް ނިންމާފައިވާ މަޝްރޫޢެކެވެ. އަދި މި މަޝްރޫޢުގެ ދަށުން، ފަރުދީ ފެންވަރުގައާއި ރަށު ފެންވަރުގަ އާއި ޤާއުމީ ފެންވަރުގައި އުފާވެރިކަން ވަޒަންކުރެވޭނެ މިންގަނޑުތަކެއް، ސިޓީތަކާއި އިދާރީ ދާއިރާތަކާއި އާންމު ޚިދުމަތްތަކާއި ބެހޭ ވުޒާރާއިން ކަނޑައަޅުމަށް ވަނީ ހަމަޖެހިފައެވެ. 

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު އާދަމް ޝަރީފް އުމަރު ވިދާޅުވީ، އެކި ރަށްރަށުގެ އުފާވެރިކަން މިންކުރުމުގައި އިސްކަންދޭނީ، އެ ރަށްރަށުގައި ހުރި ކަންބޮޑުވުންތައް ޙައްލު ކުރެއްވުމަށްކަމަށެވެ. އެހެންކަމުން ކޮންމެ ރަށެއްގައި ކަންކަން ބައްޓަންވެފައިވާގޮތް ތަފާތުކަމުން، އެކި ރަށްރަށުގައި ގެންގުޅޭ މިންގަނޑުތައް ވެސް ތަފާތުވާނެކަމަށް ވަޒީރު ވިދާޅުވިއެވެ.

އެހެންވީމަ ދެމެހެއްޓެނިވި ތަރައްޤީ މިންކުރުމުގައި އަޅުގަނޑުމެން ގެންގުޅެން ޖެހޭ މިންގަނޑުތައް އެބަ ތަފާތުވޭ. ބައެއް ރަށްތަކުގައި މަސްތުވާތަކެއްޗާއި އެހާ ބޮޑު ސަމާލުކަމެއް ނުދޭއިރު، އެކަމުގެ ހޭލުންތެރިކަން އިތުރުކުރަން މަސައްކަތް ކުރާ ރަށްތައް އެބަހުރި. އަޅުގަނޑުމެން ކަންކަން މިންކުރުމުގައި މި ހުރިހާ ތަފާތުތަކަށް ރިއާޔަތް ކުރަން ޖެހޭ.

ވަޒީރު އާދަމް ޝަރީފް ވިދާޅުވިއެވެ.

މި ހަފްލާގައި މުޖުތަމަޢުގެ އެކިފަރުންދުން އުފާވެރިކަން މާނަކުރާ ގޮތް ވެސް ވަނީ ހުށަހަޅާދީފައެވެ. އެގޮތުން އިސްރަށްވެހިންނާއި، ނުކުޅެދުންތެރިކަން ހުންނަ މީހުންނާއި، އަންހެނުންނާއި ކިޔަވާ ކުދިންނާއި ޒުވާނުން އުފާވެރިކަން މާނަކޮށް އެކަމާއި މެދު ދެކޭގޮތް ވަނީ ހާމަކޮށްފައެވެ.

މި މަޝްރޫޢު އެކަށައެޅުމުގައި ސިޓީތަކާއި އިދާރީ ދާއިރާތަކާއި އާންމު ޚިދުމަތްތަކާއި ބެހޭ ވުޒާރާއާއެކު މަސައްކަތްކުރަމުން އަންނަ އިސްލާމިކް ޔުނިވަރސިޓީ އޮފް މޯލްޑިވްސްއިން ވަނީ އުފާވެރިކަމުގެ މިންގަނޑު އެކުލަވާލުމުގެ މަސައްކަތް ކުރައްވާނެ ގޮތުގެ މަޢުލޫމާތު ވެސް ޙިއްސާކޮށްފައެވެ. 

އަދި މި ހަފްލާގެ ތެރެއިން، މި ހަރަކާތަށް ޙާއްސަކޮށްފައިވާ ލަވައެއް ވެސް ވަޒީރު އާދަމް ޝަރީފް ވަނީ އިފްތިތާޙުކޮށްދެއްވާފައެވެ.

މިއީ ދިވެހިރާއްޖޭގައި އުފާވެރިކަމުގެ މިންގަނޑެއް ކަނޑައެޅުމަށް މަސައްކަތްކުރަމުން އަންނަ ފުރަތަމަ ފަހަރެވެ. މީގެ އިތުރުން ވެސް، ދެމެހެއްޓެނިވި ތަރައްޤީއަށް ވާސިލްވުމަށް އިޖުތިމާޢީ ގޮތުން ކުރަންޖެހޭ ގިނަ ކަންކަން ތަންފީޒުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.

މި ލިޔުން ކިޔާލުމުން

Ads by MSS